ބޮސްޓަން، އެމެރިކާ (ޖޫން 20) - ނޯތު އެޓްލާންޓިކް ކަނޑު އަޑީގައި ޓައިޓޭނިކް ބޯޓު އޮތް ހިސާބަށް ފަތުރުވެރިން ގޮވައިގެން ދަތުރު ކުރާ ސަބްމެރީން އުޅަނދެއް ގެއްލިގެން ފެށި އޮޕަރޭޝަން ފުޅާކޮށްފި އެވެ.
އެމެރިކާގެ ކޯސްޓު ގާޑުން ބުނީ ކަނޑާއި ވައިގެ މަގުން ހިންގި އޮޕަރޭޝަން ފުޅާކޮށް ކަނޑު އަޑިން ވެސް ގިނަ މަސައްކަތްތަކެއް މިހާރު ކުރަމުންދާ ކަމަށެވެ.
ބޯޓުތަކާއި ވައިގެ އުޅަނދުތަކުގެ އެހީގައި 5000 އަކަމޭލުގެ ސަރަހައްދެއް ބަލައި ފާސްކޮށްފައިވާ އިރު، ސޯނާ ބޮއިގެ އެހީގައި ވެސް ސަބްމެރީންގެ ހިލަމެއްވޭތޯ ދަނީ ބަލަމުންނެވެ.
ސަބްމެރީން ގެއްލުނީ ފަސް މީހުންނާ އެކު އެވެ. ޓައިޓޭނިކް ކައިރިއަށް ދިޔުމަށް ދަތުރު ފެށު ފަހުން ގެއްލުނީ 21 ފޫޓުގެ ޓައިޓަން އުޅަނދެކެވެ.
ސަބްމެރީންގައި ތިބީ އިނގިރޭސި ދެ ވިޔަފާރިވެރިންނާއި، އެ ތަނުން އެކަކުގެ ދަރިއަކާއި ފްރާންސްގެ ނޭވީ ޑައިވަރަކާއި އުޅަނދު ނިސްބަތްވާ އޯޝަންގޭޓް ކުންފުނީގެ ޗީފް އެގްޒެކްޓިވް އެވެ.
އިންގްލޭންޑުން ނިއު ޔޯކަށް 1912 ވަނަ އަހަރު ޓައިޓޭނިކް ފެށި ފުރަތަމަ ދަތުރުގެ ތެރެއިން ބޮޑު ގަނޑުފެންގަނޑެއްގައި ޖެހި ބޯޓު އަޑިއަށް ދިޔައީ 2،224 މީހުންނާ އެކު އެވެ. އެ ހާދިސާގައި 1،500 އަށް ވުރެ ގިނަ މީހުން މަރުވި އެވެ.
