ވޮޝިންޓަން، އެމެރިކާ (ޖޫން 20) - ގާނޫނާ ހިލާފަށް ބަޑިއެއް ގެންގުޅުމާއި އިންކަމް ޓެކްސް ނުދެއްކުމުގެ ކުށަށް ހަންޓާ ބައިޑެން އިއުތިރާފުވެއްޖެ އެވެ.
އުމުރުން 53 އަހަރުގެ ހަންޓާއަކީ އެމެރިކާގެ ރައީސް ޖޯ ބައިޑެންގެ ދަރިކަަލުންނެވެ. ހަންޓާއާ ގުޅުން ހުރި ކަންކަން ތަހުގީގު ކުރަން ބާރުއެޅީ އިދިކޮޅު ރިޕަބްލިކަން ޕާޓީންނެވެ.
ދައުލަތުގެ ވަކީލުންނާ އެކު ހަންޓާ ހެދި އެއްބަސްވުމުގައި ބުނީ މަސްތުވާތަކެތި ބޭނުންކުރި އިރު، ހަތިޔާރެއް ގެންގުޅުނު ކަމަށެވެ. އެއީ ގާނޫނުން މަނާ ކަމެކެވެ.
އޭގެ އިތުރުން 2017 އަދި 2018 ގައި އާމްދަނީގެ ގޮތުގައި 1.5 މިލިއަން ޑޮލަރަށް ވުރެ ބޮޑު އަދަދެއް ލިބުނު އިރު، އެ އާމްދަނީއަށް ދައްކަން ޖެހޭ ޓެކްސް ނުދައްކަ އެވެ. އެއީ ޓެކްސްގެ ގޮތުގައި ޖުމްލަ 200،000 ޑޮލަރަށް ވުރެ ބޮޑު އަދަދެކެވެ.
އެ އެއްބަަސްވުމަށް ފަނޑިޔާރުގެ ރުހުން ހޯދަން ޖެހޭނެ އެވެ. ބެލެވޭ ގޮތުގައި ޖަލު ހުކުމެއް އޭނާއަށް ކުރިމަތި ނުވާނެ އެވެ.
ބައިޑެން އާއި އަނބިކަނބަލުން ޖިލް ނެރުއްވި ބަޔާނެއްގައި ވިދާޅުވީ ހަންޓާ އަލުން ދިރިއުޅުން ބިނާކުރަން މަސައްކަތް ކުރާއިރު، ހުރިހާ އެއްބާރުމެއް ފޯރުކޮށްދެމުންދާ ކަމަށެވެ. މަސްތުވާތަކެއްޗަށް ދެވިހިފައި ދިރިއުޅުމަށް އަސަރުކޮށްފައިވާ ކަމަށް މީގެ ކުރިން ހަންޓާ ހާމަކުރި އެވެ.
