ލަންޑަން (ޖޫން 20) - ޔޫރޯ ކޮލިފައިންގައި ރޭ ބުކާޔޯ ސަކާ ހެދި ހެޓްރިކާ އެކު، އިންގްލެންޑުން 7-0 އިން ނޯތު މެސެޑޯނިއާ އަތުން މޮޅުވެއްޖެ އެެވެ.
މިއީ، ސަކާ, 21، އޭނާގެ ކެރިއަރުގައި ހެދި ފުރަތަމަ ހެޓްރިކް އެވެ. ސަކާ އަކީ 2008 ވަނަ އަހަރު ތިއޯ ވޮލްކޮޓް އަށް ފަހު އިންގްލެންޑަށް ރަސްމީ މެޗެއްގައި ހެޓްރިކެއް ހެދި އެންމެ ޒުވާން ކުޅުންތެރިޔާ އެވެ.
އިންގްލެންޑުން ވަނީ މި ފަހަރު ކޮލިފައިންގައި މިހާތަނަށް ކުޅުނު ހަތަރު މެޗުން ވެސް މޮޅުވެފަ އެވެ. އެ ޓީމު އޮތީ ވެސް ކޮލިފައިން ގްރޫޕް ސީގެ އެއް ވަނައިގަ އެވެ.
އަމިއްލަ ދަނޑުގައި ކުޅުނު އިންގްލެންޑް ޓީމަށް ރޭގެ މެޗުގައި 29 ވަނަ މިނިޓްގައި ހެރީ ކޭން ވަނީ ލީޑުނަގައިދީފަ އެވެ. ސަކާ ވަނީ އޭގެ ފަހުން އިންގްލެންޑްގެ ލީޑުފުޅާކޮށްދީފަ އެވެ. އަދި ފުރަތަމަ ހާފު ނިމުމުގެ ކުރިން މާކަސް ރަޝްފޯޑް ވަނީ އިންގްލެންޑަށް ތިން ވަނަ ގޯލެއް ޖަހައިދީފަ އެވެ.
ދެ ވަނަ ހާފުގައި ވެސް ގިނަ އެޓޭކްތަކެއްކޮށް ގޯލު ޖަހާނެ ފުރުސަތުތަކެއް އިންގްލެންޑުން ތަނަވަސްކުރިއިރު، އެ ޓީމުގެ ސަކާ ވަނީ އިތުރު ދެ ގޯލު ޖަހައި، ހެޓްރިކް ފުރިހަމަކޮށްފަ އެވެ. ކޭން މި ހާފުގައި ގޯލު ޖެހީ ޕެނަލްޓީ އަކުންނެވެ. އިންގްލެންޑްގެ އަނެއް ގޯލު ކާމިޔާބުކުރީ ކަލްވިން ފިލިޕްސް އެވެ.
އިންގްލެންޑް އެކޭ އެއް ގޮތަށް ފްރާންސް ވެސް ވަނީ ރޭ ގްރީސް 1-0 އިން ބަލިކޮށް ކޮލިފައިންގައި ސައްތަ އިން ސައްތަގެ ރެކޯޑް ދަމަހައްޓައިފަ އެވެ.
ގްރީސް ކޮޅަށް ފްރާންސް އިން ޖެހި ހަމައެކަނި ލަނޑު ކާމިޔާބުކުރީ 55 ވަނަ މިނިޓްގައި ޕެނަލްޓީ އަކުން ކީލިއަން އެމްބާޕޭ އެވެ. މިއީ، މި ފަހަރު ކޮލިފައިންގައި އެމްބާޕޭގެ ހަތަރު ވަނަ ގޯލެވެ. މި ގޯލު ޖަހަން ލިބުނު ޕެނަލްޓީ އަކީ ފްރާންސްގެ އެންޓޮއިން ގްރީޒްމަން އަށާް ގްރީސްގެ ކޮންސްޓަންޓީނޯސް މަވްރަޕޯނަސް ކުރި ފައުލަކަށެވެ.
މެޗުގެ ބާކީ 25 ވަރަކަށް މިނިޓް ހުއްޓައި، މަވްރަޕޯނަސް އަށް ރަތް ކާޑެއް ދައްކައި ދަނޑުން ފޮނުވާލުމުން ގްރީސް އިން ބާކީ ބައި ކުޅުނު ކުޅުންތެރިއަކު މަދުކޮށެވެ. މަވްރަޕޯނަސް އަށް ރަތް ކާޑު ދެއްކި ފައުލު ކުރީ ފްރާންސްގެ ރަންޑަލް ކޯލޯ މުއާނީ އަށެވެ.
