ވޮޝިންޓަން، އެމެރިކާ (ޖޫން 19) - ނޯތު އެޓްލާންޓިކް ކަނޑު އަޑީގައި ޓައިޓޭނިކް ބޯޓު އޮތް ހިސާބަށް ފަތުރުވެރިން ގޮވައިގެން ދަތުރު ކުރާ ސަބްމެރީން އުޅަނދެއް ގެއްލިގެން ހޯދަން ފަށައިފި އެވެ.
އޯޝަންގޭޓް އެކްސްޕެޑިޝަން ކުންފުނިން އޮޕަރޭޓް ކުރާ އުޅަނދު ގެއްލުނު އިރު އޭގައި ތިބީ ކިތައް މީހުން ކަަމެއް ޔަގީނެއް ނޫނެވެ. އެކަމަކު ކްރޫ މެމްބަރުން ތިބިކަން ވަނީ ކަށަވަރުވެފަ އެވެ.
އެމެރިކާގެ ކޯސްޓު ގާޑުން ބުނީ އެ އުޅަނދު ހޯދުމުގެ އޮޕަރޭޝަނެއް ކުރިއަށްދާ ކަމަށެވެ.
އޯޝަންގޭޓްގެ ވެބްސައިޓުގައި ބުނެފައިވާ ގޮތުން ޓައިޓޭނިކް ސައިޓަށް ކުރާ ދަތުރެއް މި ވަގުތު ކުރިއަށް އެބަދެ އެވެ. އެހެންކަމުން އުޅަނދު ގެއްލުނީ ފަތުރުވެރިންނާ އެކު ކުރި ދަތުރެއްގެ ތެރެއިން ކަމަށް ވުން އެކަށީގެންވެ އެވެ.
ގާޑިއަން ނޫހުން ބުނީ ފަސް މީހުން އުޅަނދުގައި ތިބި ކަމަށެވެ. އެކަމަކު އޯޝަންގޭޓުން އެކަން ކަށަވަރުކޮށްދީފައެއް ނުވެ އެވެ.
އެ ކުންފުނިން ނެރުނު ބަޔާނެއްގައި ބުނީ ސަބްމެރީން ހޯދުމުގެ މަސައްކަތަށް އެކި ގައުމުތަކުން ފޯރުކޮށްދެމުންދާ އެހީއަށް ޝުކުރުވެރިވާ ކަމަށެވެ. އެމެރިކާގެ އިތުރުން ކެނެޑާއިން ވެސް އެ އޮޕަރޭޝަންގައި ބައިވެރިވެ އެވެ.
އިންގްލޭންޑުން ނިއު ޔޯކަށް 1912 ވަނަ އަހަރު ޓައިޓޭނިކް ފެށި ފުރަތަމަ ދަތުރުގެ ތެރެއިން ބޮޑު ގަނޑުފެންގަނޑެއްގައި ޖެހި ބޯޓު އަޑިއަށް ދިޔައީ 2،224 މީހުންނާ އެކު އެވެ. އެ ހާދިސާގައި 1،500 އަށް ވުރެ ގިނަ މީހުން މަރުވި އެވެ.
