މިހާތަނަށް ރާއްޖޭގައި ބާއްވާ އެންމެ ބޮޑު ކާބޯތަކެތީގެ ކާނިވަލު މާދަމާ ފެށުމަށް އާބަންކޯއިން ތައްޔާރުވެއްޖެ އެވެ.
މާދަމާ ހަވީރު 5:00 ގައި ހުޅުމާލެ ސެންޓުރަލް ޕާކުގައި ފަށާ ކާނިވާ ކުރިއަށް ދާނީ ރޭގަނޑު 00:00 އަށެވެ. އެއަށްފަހު ހޮނިހިރު ދުވަހުގެ ނިޔަލަށް ކޮންމެ ދުވަހެއްގެ ވެސް ހަވީރު 4:00 އިން ރޭގަނޑު 00:00 އަށް ކާނިވާ ކުރިއަށް ދާނެ އެވެ. އެ ކާނިވަލުގެ މެއިން ސްޕޮންސަރަކީ ދިރާގު އެވެ.
ރާއްޖޭގެ ބޮޑެތި ވިޔަފާރިތަކުން ކެއްކުމާ ގުޅުންހުރި ތަފާތު ތަކެއްޗާއި ވަގުތުން ތައްޔާރުކޮށްފައިވާ ކާނާ އަޖުމަ ބަލާލުމުގެ ފުރުސަތު އެ ކާނިވަލަށް ޒިޔާރަތްކުރާ ފަރާތްތަކަށް ލިބިގެންދާނެ އެވެ. ހަމަ އެއާއެކު ކުދި އަދި މެދުފަންތީގެ ވިޔަފާރިތަކުގެ ހުނަރުވެރި ކެއްކުމާއި ތަފާތު ރަހަތަށް ވެސް އެ ކާނިވަލުން ލިބެން ހުންނާނެ އެވެ.
އާބަންކޯ މޯލްޑިވްސް ފުޑް ކާނިވަލުގައި ކާބޯތަކެތީގެ އިތުރުން ކާނިވަލެއްގެ މަޖާ ހަރަކާތްތައް ވެސް ހިމެނިގެންދާނެ ކަމަށް އެ ކުންފުނިން ބުނެ އެވެ. އެގޮތުން, ކާނިވާ ކުޅިވަރުތަކަށް ހާއްސަ 'ފަން އެރީނާ' އާއި ކުރީގެ ހަނދާންތައް އާކޮށް ދިވެހިންގެތެރޭގައި މަޝްހޫރު، "ހަންޑިގަނޑުވަރުގެ" ނަމުގައި ބިރުވެރި ހޮހޮޅައެއް ވެސް އާބަންކޯއިން ފަރުމާކޮށްފައިވެ އެވެ.
އާބަންކޯގެ މީޑިއާ އޮފިޝަލް ވިދާޅުވީ އެ ކާނިވަލުގެ ތެރެއިން ރާއްޖޭގެ ކާބޯތަކެތީގެ އެހާރާއި މިހާރު ތަޖުރިބާ ކޮށްލަން ލިބޭނެ ކަމަށެވެ.
"އާބަންކޯ މޯލްޑިވްސް ފުޑް ކާނިވަލަކީ ރާއްޖޭގައި އޮތް ކާބޯތަކެތީގެ ކުލަގަދަ ސަގާފަތް ތަޖުރިބާކޮށްލައި ފެސްޓިވަލް ހަރަކާތްތަކުގެ ތެރެއިން ޒަމާނާ އެކު ކާބޯތަކެއްޗަށް އައި ބަދަލުތައް ފާހަގަކުރުމަށް ލިބޭ ރަނުގެ ފުރުސަތެއް، މިއީ 'ފުޑީސް'އަށް ނުވަތަ ތަފާތު ކެއުންތަކަށް ޝައުގުވެރިވާ ފަރާތްތައް ކޮންމެހެން ވެސް ޒިޔާރަތްކޮށްލަން ވާނެ ވަރުގެ އިވެންޓެއް،" އޭނާ ވިދާޅުވި އެވެ.
ތަފާތު ކާބޯތަކެތީގެ އަޖުމަ ބަލައިލުމާއި ފެސްޓިވަލް ހަރަކާތްތަކުގެ އިތުރުން އެ ކާނިވަލަށް ކޮންމެ ދުވަހަކު ވެސް ޒިޔާރަތް ކުރާ ފަރާތްތަކުގެ މެދުގައި ނަގާ ގުރުއަތުން ހޮވޭ ނަސީބުވެރިންނަށް އިނާމުަ ދިނުމަށް ވެސް ހަމަޖެހިފައިވެ އެވެ. އޭގެއިތުރުން ކާނިވަލު ނިންމާ ދުވަހު އޮންނަ ގުރުއަތުން ހޮވޭ ފަރާތަކަށް ވަރަށް ހާއްސަ އިނާމެއް ދިނުމަށް ހަމަޖެހިފައި ވާކަމަށް ވެސް އާބަންކޯއިން ބުނެ އެވެ.
މި ކާނިވަލަށް ޒިޔާރަތް ކުރާ މީހުންގެ މެދުގައި ނެގޭ ގުރުއަތަކުން ކޮންމެ ދުވަހަކުވެސް އިނާމު ލިބުމުގެ އިތުރަށް، ކާނިވާ ނިމޭ ދުވަހު ވަރަށް ހާއްސް އިނާމެއްގެ ގުރުއަތުނެގުން އޮންނާނެއެވެ.
