މާލޭގައި މިހާރު ކުރިއަށްދާ ފައިވް ނޭޝަންސް ޗެމްޕިއަންޝިޕް ބާސްކެޓްބޯޅަ މުބާރާތުގައި ކުޅުނު ފުރަތަަމަ ދެ މެޗުން މޮޅުވި، ބޫޓާން ޓީމު މިއަދު ކުޅުނު މެޗުން ބަންގްލަދޭޝް އަތުން 61-53 އިން ބަލިވެއްޖެ އެވެ.
ބަންގްލަދޭޝް އިން މި ވަނީ ކުޅުނު ދެ މެޗުން ވެސް މޮޅުވެފަ އެވެ. އެ ގޮތުން، ބަންގްލަދޭޝް އިން ފުރަތަމަ މެޗުގައި ވަނީ ރާއްޖެ ބަލިކޮށްފަ އެވެ. ބަންގްލަދޭޝް އަތުން ބަލިވިޔަސް، ބޫޓާން ވަނީ ނޭޕާލާއި ޕާކިސްތާން އަތުން މޮޅުވެފަ އެވެ.
ޒުވާނުންގެ މަރުކަޒު އެތެރެ ކޯޓުގައި މިއަދު ހަވީރު ކުޅުނު މެޗުގެ ފުރަތަމަ ތިން ކުއާޓަރު ވެސް ދިޔައީ ވަރަށް ފޯރިގަދަކޮށެވެ. ދެ ޓީމުން ވެސް ގާތްގާތުގައި ގިނަ ޕޮއިންޓްތަކެއް އެއްކުރަމުންދިޔަ މި މެޗުގެ ފުރަތަމަ ކުއާޓަރު ނިމުނުއިރު، ދެ ޓީމު އޮތީ އެއްވަރުވެފަ އެވެ. ދެ ވަނަ ކުއާޓަރުގައި ބަންގްލަދޭޝް އިން ހަތް ޕޮއިންޓްގެ ލީޑެއް ނެގި އެވެ. ބޫޓާނުން ދެން ކުޅުނު ކުއާޓަރުގައި އެއް ޕޮއިންޓަށް ފަރަގު ކުޑަކުރި އެވެ. އެކަމަކު، ފަހު ކުއާޓަރުގައި ބަންގްލަދޭޝް އިން ތަފާތު ދައްކައި މެޗުން މޮޅުވީ އެވެ.
ފައިވް ނޭޝަންސް ކަޕްގައި މިއަދު ބަންގްލަދޭޝް އާއި ބޫޓާން ބައްދަލުކުރި މެޗުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
މި މެޗުގައި ބަންގްލަދޭޝްގެ އެންމެ ބޮޑު ތަފާތަކަށްވީ އެ ޓީމަށް މި މުބާރާތުގައި މޮޅު ކުޅުމެއް ދައްކަމުން އަންނަ އާރިފް ހުސެއިން ބައްޕީ އާއި ސުލައިމާން ތާނޫ އެވެ. ބައްޕީ މި މެޗުގައި 14 ޕޮއިންޓް ސްކޯކުރިއިރު، އެ ޓީމަށް އެންމެ ގިނަ ޕޮއިންޓް ހޯދައިދިން ސުލެއިމާން ވަނީ 15 ޕޮއިންޓް ހޯދައިފަ އެވެ.
ބަންގްލަދޭޝް ޓީމުން މި ފަހަރުގެ މުބާރާތާ ކުރިމަތިލީ ގިނަ ޒުވާން ކުޅުންތެރިންތަކެއް ޓީމުގައި ހިމަނައިގެންނެވެ. އެ ޓީމުގެ ކޯޗު، ރަންޖިތު ޗަންދްރާ ބުނީ މި މުބާރާތުން ބަންގްލަދޭޝްގެ ބާސްކެޓްބޯޅައިގެ ކުރިމަގަށް ގިނަ ކަންތައްތަކެއް ހާސިލްކުރަން ބޭނުންވާ ކަމަށެވެ.
ކުރިން ދެ މެޗޭ އެއްގޮތަށް ބޫޓާނަށް މި މެޗުގައި ވެސް އެންމެ ރަނގަޅަށް ކުޅުނު އެއް ކުޅުންތެރިއަކީ ޓީމުގެ ކެޕްޓަން، ޑޯޖީ ގްޔެލްސްޓެން އެވެ. އޭނާ އަކީ މުޅި މެޗަށް ބަލާއިރު، ވެސް އެންމެ ސްކޯރިން ރަނގަޅު ކުޅުންތެރިޔާ އެވެ. އޭނާ ވަނީ މި މެޗުގައި 23 ޕޮއިންޓް ސްކޯކޮށްފަ އެވެ.
ފަސް ގައުމު ކުޅޭ މި މުބާރާތުގެ ލީގު ބުރު ނިމޭއިރު ފުލަށްދާ ޓީމެއް ކަޓާނެ އެވެ. އެ ގޮތުން ބަލާއިރު، މިރޭ ޕާކިސްތާނާއި ރާއްޖެ ކުޅޭ މެޗު ސެމީ އަށް ދިއުމަށް މި ދެ ޓީމަށް ވެސް މުހިންމު ވާނެ އެވެ. ރާއްޖެ ފުރަތަމަ ދެ މެޗުން ބަލިވިއިރު، ޕާކިސްތާން ވެސް ވަނީ ކުޅުނު މެޗުން ބަލިވެފަ އެވެ.
