ފަހު ސިކުންތު ކޮޅުގައި ބަންގްލަދޭޝް ބަލިކޮށް ބޫޓާނުން މާލޭގައި ކުރިއަށްދިޔަ ފައިވް ނޭޝަންސް ޗެމްޕިއަންޝިޕް ބާސްކެޓްބޯޅަ މުބާރާތުގެ ތަށި އުފުލާލައިފި އެވެ.
ފަސް ގައުމާ އެކު މިމަހުގެ 14 ވަނަ ދުވަހު ފެށި މުބާރާތުގެ ފައިނަލް މެޗު ބޫޓާނުން 62-60 ޕޮއިންޓުންނެވެ. ފައިނަލް މެޗު ކާމިޔާބުކޮށް ބޫޓާން ހޯދި ރަން މެޑައްޔަކީ ބައިނަލްއަގްވާމީ ލެވެލްގައި އެ ޓީމުން ހޯދި ފުރަތަމަ މެޑައްޔެވެ.
ފައިނަލް މެޗު ފަށައިގެން ރަނގަޅަށް ކުޅެ ލީޑު ނެގީ ބަންގަލްދޭޝް އިންނެވެ. އެ ގޮތުން ފުރަތަމަ ކުއާޓާ ނިންމާލިއިރު ދެ ޕޮއިންޓްގެ ލީޑުގައި އެ ޓީމް އޮތްއިރު ދެ ވަނަ ކުއާޓާގައި ބޫޓާނުން ތަފާތު ދައްކައި ލީޑު ނެގި އެވެ. މި ކުއާޓާގައި ބޫޓާނުން 18 ޕޮއިންޓް ސްކޯކުރިއިރު ބަންގްލަދޭޝަށް ސްކޯކުރެވުނީ އެންމެ ހަ ޕޮއިންޓެވެ.
މެޗުގެ ތިން ވަނަ ކުއާޓާގައި ބޫޓާނުން 22 ޕޮއިންޓް ލީޑެއް ވެސް ނެގި އެވެ. ނަމަވެސް ފަހު ކުއާޓާގައި ބަންގްލަދޭޝްގެ ކެޕްޓަން މިތުން ކުމާރު ބިސްވާސް ދެއްކި ތަފާތު މޮޅު ކުޅުމާ އެކު އެ ޓީމުން ނަތީޖާ ހަމަހަމަކޮށް ފަހު ވަގުތު ލީޑުވެސް ނެގި އެވެ. މެޗު ނިމެން ހަ ސިކުންތަށްވެފައި އޮތްއިރު، ސްކޯ އޮތީ 59-60 އިން ބަންގަލަދޭޝް ކުރީގަ އެވެ. ނަމަވެސް ފަހު ސިކުންތުގައި ސްކޯކޮށް ބޫޓާން އިން 62-60 އިން މެޗު ކާމިޔާބުކޮށް މުބާރާތުގެ ތަށި ހޯދި އެވެ.
މިއީ ސަރަހައްދީ ފައިނަލަކަށް ބޫޓާން ނުކުތް ފުރަތަމަ ފަހަރެވެ. މި ފަހަރުގެ މުބާރާތުގެ ސެމީ ފައިނަލުން އެ ޓީމަށް ޖާގަ ލިބުނީ ވެސް ހަތަރު ވަނަ ޓީމުގެ ގޮތުގަ އެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމާއި މުބާރާތުގެ އެންމެ މޮޅު ކުޅުންތެރިޔާގެ މަގާމް ހޯދީ ބަންގްލަދޭޝްގެ ކެޕްޓަން މިތުން އެވެ. ފައިވް ނޭޝަންސް ޗެމްޕިއަންޝިޕްގައި ވާދަކުރީ ބޫޓާން އާއި ބަންގްލަދޭޝްގެ އިތުރުން، ނޭޕާލް، ޕާކިސްތާން އަދި ރާއްޖެ އެވެ. ރާއްޖެ މުބާރާތުން ކެޓީ ސެމީ ފައިނަލުގެ ފުރުސަތެއް ވެސް ނުލިބި އެވެ.
