ކުރިއަސް އޮތް ރިޔާސީ އިންތިހާބުގައި ގުޅެން ޖެހުނު ބަޔާކާ ގުޅި އިންތިހާބު އެ ޕާޓީން ކާމިޔާބު ކުރާނެ ކަމަށް ދި ޑިމެކްރެޓްސްގެ ރައްޔިތުންގެ މަޖިލީހުގެ މެމްބަރު މުހައްމަދު ވަހީދު ވިދާޅުވެއްޖެ އެވެ.
މިވަގުތު އުފައްދަން މަސައްކަތް ކުރާ ޑިމޮކްރެޓްސްގެ ހަރުގޭގައި ވާހަކަ ދައްކަވަމުން އުނގޫފާރު ދާއިރާގެ މެމްބަރު ވައްޑެ ވިދާޅުވީ، އަންނަ ނޮވެމްބަރު މަހު އުފެދޭނީ އެ ޕާޓީ ހިއްސާވާ ސަރުކާރެއްކަން އޭނާ ޔަގީން ކުރައްވާ ކަމަށެވެ.
"އަޅުގަނޑުމެން އިރާދަ ކުރެއްވިއްޔާ ގުޅެން ޖެހުނު ބަޔަކާއެކު ނިކުމެ ކުރިއަށް އޮތް ރިޔާސީ އިންތިހާބު ކާމިޔާބު ކުރާނަން. އިރާދަ ކުރެއްވިއްޔާ އަންނަ ނޮވެމްބަރު މަހު އުފެދޭނީ އަޅުގަނޑުމެން ހިއްސާވާ ސަރުކާރެއް،" ވައްޑެ ވިދާޅުވި އެވެ.
އިންތިހާބު ކާމިޔާބު ކުރަން ކޯލިޝަން ހަދާނެ ކަމަށް ވައްޑެ ވިދާޅުވިއިރު، ޑިމޮކްރެޓްސް އާއި ޖުމްހޫރީ ޕާޓީއާއެކު ވާހަކަ ދެއްކި ނަމަވެސް ކޯލިޝަން ހެދިފައެއް ނުވެ އެވެ. އިންތިހާބުގެ ދެ ވަނަ ބުރުގައި ކޯލިޝަން ހައްދަވާނެ ކަމަށް އެ ޕާޓީގެ ފިކުރީ ލީޑަރު މުހައްމަދު ނަޝީދު، ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ޕްރައިމަރީގެ ތެރެއިން ވިދާޅުވެފައިވެ އެވެ.
އޭގެ އިތުރުން، ރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން ވައްޑެ ވިދާޅުވީ އެއް ޕާޓީއަކަށް އެކަނި އިންތިހާބު ކާމިޔާބު ނުކުރެވުމަކީ ރައީސް ސޯލިހުގެ ބަލި ފައި ކަމަށެެވެ.
"ރައީސް ސޯލިހު ދެންނެވީ އިންތިހާބު ކާމިޔާބު ކުރެވޭނެ ފޯމިއުލާ. އެއްވެސް ޕާޓީއަކަށް އެނގޭ އެއް ކަމަކީ، އެއްވެސް އެއް ޕާޓީއަކަށް ރާއްޖޭގައި ބާއްވާ ރިޔާސީ އިންތިހާބަކުން މެޖޯރިޓީއެއް ނުނެގޭނެ. އެހެންވެގެން މި ދަންނަވަނީ އެއީ ރަސްމީ ސިފައެއްގައި ރައީސް ސޯލިހުގެ ބަލި އިއުލާނު ކުރެއްވި ދުވަސް. އެމަނިކުފާނާ އެކީގައި ޕާޓީއަކަށް ވާ ކަހަލަ ޕާޓީއެއް ނެތް،" އޭނާ ވިދާޅުވި އެވެ.
"ރައީސް އިބްރާހިމް މުހައްމަދު ސޯލިހަކީ ރާއްޖޭގައި ހިނގާނެ ޗޮއިސްއެއް ނޫން. ކުރިއަށް މި އޮތް 84 ދުވަސް ފަހުން ފާރުގައި ބަހައްޓާ ފޮޓޯގަނޑެއް ފިޔަވައި އެއްވެސް ދަރަޖައެއް އެމަނިކުފާނަކަށް ރާއްޖެއަކު ނޯންނާނެ."
ސެޕްޓެމްބަރު 9، ގައި ރިޔާސީ އިންތިހާބު ބާއްވަން ހަމަޖެހިފައިވާއިރު ރައީސް ސޯލިހުގެ އިތުރުން ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމެވެ. ކުރީގެ ރައީސް ނަޝީދު ނިކުންނަވާކަން އަދި ނޭނގެ އެވެ. އެކަމަކު، ޑިމޮކްރެޓްސްގެ ފަރާތުން ކެންޑިޑޭޓަކު ނެރޭނެ ކަމަށް އެ ޕާޓީން ބުނެފައިވެ އެވެ.
އިންތިހާބުގައި ވާދަ ކުރުމަށް ވެރިކަން ހިންގާ އެމްޑީޕީން ކޯލިޝަން ހެދީ އަދާލަތު ޕާޓީ އަދި އެމްޑީއޭއާ އެވެ. ޖުމްހޫރީ ޕާޓީ އަދި ކުރީގެ ރައީސް މައުމޫން އަބްދުލްގައްޔޫމްގެ އެމްއާރްއެމަށް ކޯލިޝަން ހެދުމުގެ ދައުވަތު ފޮނުވި ނަމަވެސް އެކަން ގަބޫލުކޮށްފައެއްނުވެ އެވެ.
