މާލޭގައި މިހާރު ކުރިއަށްދާ ފައިވް ނޭޝަންސް ޗެމްޕިއަންޝިޕްގައި ޕާކިސްތާން ބަލިކޮށް ނޭޕާލުން މުބާރާތުގައި އެޓީމްގެ ފުރަތަމަ މޮޅު ހޯދައިފި އެވެ.
ފަސް ގައުމާ އެކު މާލޭގައި ކުރިއަށްދާ ބައިނަލްއަގްވާމީ މުބާރާތުގައި މިއަދު ޕާކިސްތާން އަތުން ނޭޕާލް މޮޅުވީ 62-66 އިންނެވެ. މިއީ މިދިޔަ ދިހަ އަހަރެއްހާ ދުވަހަށް ބަލާއިރު ޕާކިސްތާނުން ބައިނަލްއަގްވާމީ މުބާރާތެއްގައި ކުޅުނު ފުރަތަމަ މެޗެވެ.
މިއަދުގެ މެޗު ފަށައިގެން ރަނގަޅަށް ކުޅެ ލީޑު ނެގީ ޕާކިސްތާނުންނެވެ. އިސްކޮޅުން ދިގު ބިޔަ ކުޅުންތެރިން ބޭނުންކޮށްގެން އެޓީމުން ފުރަތަމަ ކުއާޓާ ނިންމާލީ 15-11 އިން ލީޑުގައި އޮވެ އެވެ. މެޗުގެ ދެވަނަ ކުއާޓާގައި ޕާކިސްތާނުން އެއް ފެންވަރެއްގައި ކުޅުން ދެމެހެއްޓި އިރު، ޓީމްގެ އެންމެ މުހިންމު ކުޅުންތެރިޔާ އަދި ކެޕްޓަން ސަދީޝް ޕްރަދާން ނުލައި ކުޅުނު ނޭޕާލް ޓީމަށް މި ކުއާޓާގައި ލިބުނު ގިނަ ފުރުސަތުތަކުގެ ބޭނުން ކުރެވޭ ގޮތެއް ނުވި އެވެ. ދެވަނަ ކުއާޓާ ނިމުނީ 33-28 އިން ޕާކިސްތާން ކުރީގައި އޮވެގެންނެވެ.
މެޗުގެ އެންމެ ފޯރިގަދަ ކުއާޓާއެއްގެ ގޮތުގައި ފެނުނީ ތިންވަނަ ކުއާޓާ އެވެ. މި ކުއާޓާގައި ޕާކިސްތާންގެ ކެޕްޓަން އަލީ މުހައްމަދު ޝަހުބާޒަށް އަނިޔާވެ ބަދަލު ކުރަން ޖެހުނު ވަގުތު އޭގެ ފައިދާ ނަގައި ނޭޕާލުން ޖެހިޖެހިގެން 13 ޕޮއިންޓް ސްކޯކޮށް ނަތީޖާ އަނބުރާލި އެވެ. މި ކުއާޓާ ނިމުނުއިރު ނޭޕާލް އޮތީ 45-49 އިން ލީޑުގަ އެވެ.
ހަތަރު ވަނަ ކުއާޓާގައި ޕާކިސްތާން ކުޅުންތެރިންނަށް ހުސްކޮށް ލިބުނު ގިނަ ފުރުސަތުތަކެއް ބޭކާރުކޮށްލިއިރު ނޭޕާލްގެ ކުޅުންތެރިން ފެނުނީ ކޮންފިޑެންސާއިއެކު ކުޅުނު ތަނެވެ. މި ކުއާޓާގައި ނޭޕާލްގެ ޒުވާން ދެ ކުޅުންތެރިންކަމަށްވާ ނިކޭޝް މަގަރު އަދި އަޔޫޝް ސިންގް މޮޅު ކުޅުމެއް ދެއްކި އެވެ.
މެޗުގައި ނޭޕާލް ޓީމަށް އެންމެ ގިނަ ޕޮއިންޓް ހޯދައިދިނީ 15 ޕޮއިންޓް ހޯދައިދިން ނިކޭޝް އާއި 14 ޕޮއިންޓް ހޯދައިދިން އަޔޫޝް އެވެ. ފަހު ކުއާޓާގައި ކުރި ސްކޯތަކާއިއެކު އަޝިމް ޝްރޭސްތާވެސް ނެޕާލަށް 12 ޕޮއިންޓް އެއްކޮށް ދިނެވެ.
ޕާކިސްތާނަށް ބަލާއިރު އެ ޓީމުގެ އިސްކޮޅުން ދިގު ދެ ކުޅުންތެރިންކަމަށް ޒައިނުލް ހަސަން 17 ޕޮއިންޓް އަދި ޝާހިދު މުހައްމަދު 13 ޕޮއިންޓް ސްކޯކޮށްދިނެވެ.
މުބާރާތުގައި ޕާކިސްތާން ކުޅޭ ދެވަނަ މެޗުގައި މާދަމާ ރޭ ނިކުންނާނީ ޕާކިސްތާނާ ދެކޮޅަށެވެ. ނޭޕާލަށް ދެން އޮތީ އަންނަ ހޮނިހިރު ދުވަހުގެ ހަވީރު ބަންގްލަދޭޝްއާ ދެކޮޅަށް ކުޅޭ މެޗެވެ.
