ލަންޑަން (ޖޫން 15) - ޗެލްސީ އަށް ކުޅެމުން އަންނަ އިނގިރޭސި މިޑްފީލްޑަރު، މޭސަން މައުންޓް ހޯދަން މެންޗެސްޓާ ޔުނައިޓެޑުން ކުރި 50 މިލިއަން ޑޮލަރުގެ ބިޑް ޗެލްސީން އަނބުރާ ފޮނުވާލައިފި އެވެ.
ޔުނައިޓެޑުން މައުންޓް ހޯދުމުގެ ރޭހުގައި ވާދަކުރަމުން އަންނައިރު، މިހާތަނަށް އެ ނޫން ކްލަބަކުން އޭނާ ހޯދުމުގެ މަސައްކަތުގައި ރަސްމީކޮށް ބައިވެރިވެފައިނުވެ އެވެ. މީގެ ކުރިން، ލިވަޕޫލް އާއި ޓޮޓެންހަމް ހޮޓްސްޕާސް އިން ވެސް މައުންޓް ގަންނަން ޝައުގުވެރިވާ ކަމަށް މީޑިއާ އިން ރިޕޯޓްކޮށްފައިވެ އެވެ.
ޗެލްސީން މައުންޓް، 24، ވިއްކާލަން ކިޔާ އަގު އުޅެނީ 70 މިލިއަން ޑޮލަރާ ގާތްކުރާ އަދަދަަކަށެވެ. މައުންޓާ އެކު ޗެލްސީން މި ވަގުތު ހަދާފައި އޮތް ކޮންޓްރެކްޓް އަންނަ އަހަރުގެ ޖޫން މަހުގެ ނިޔަލަށް ހަމަވާނެ އެވެ. އެހެންވެ، ޗެލްސީން އެ ކިޔާ އަގުދޭން ޔުނައިޓެޑުން ބޭނުމެއް ނުވެ އެވެ. އެހެންވެ، ޔުނައިޓެޑުން ދެން ބިޑެއް ކުރިޔަސް ޗެލްސީން ބުނާ އަގަށް ވުރެ ކުޑަކޮށް ހުށަހެޅުމުގެ ފުރުސަތު ބޮޑެވެ.
ނެދަލެންޑްސްގެ ވިޓެސޭ އާހެމް އާއި އިނގިރޭސި ދެ ވަނަ ޑިވިޝަންގެ ޑާބީ ކައުންޓީ އަށް ލޯން އުސޫލުން ކުޅެފައިވާ މައުންޓް އަށް އޭނާގެ ރަސްމީ ކްލަބް، ޗެލްސީ ޓީމުން ގަވާއިދުން ފުރުސަތު ލިބެން ފެށީ ފްރޭންކް ލަމްޕާޑް، 2019 ވަނަ އަހަރު ޗެލްސީ ކޯޗަކަށް ހުރިއިރު އެވެ.
އެކަމަކު، މި ފަހުން، ޗެލްސީގެ ވެރިޔާ ޓޮޑް ބޯލީގެ އެ ކްލަބް ހިންގުމާ ހަވާލުވެ ބޮޑު ހަރަދުކޮށް، ގިނަ ކުޅުންތެރިންތަކެއް ގެނެސްފައިވާއިރު، މައުންޓަށް ކުޅެލަން ލިބޭ ވަގުތު ވަނީ މަދުވެފަ އެވެ. އެހެންވެ، އިންގްލެންޑް ގައުމީ ޓީމުން ގަވާއިދުން ޖާގަ ހޯދުމުގެ ވިސްނުމުގައި މައުންޓް ކްލަބް ބަދަލުކުރަން ބޭނުންވާ ކަމަށް ރިޕޯޓްތައް ބުނެ އެވެ.
ޗެލްސީ އަށް ކުޅެމުން އަންނަ ޖަރުމަނުގެ ފޯވާޑް ކައި ހަވާޓްޒް ހޯދަން އާސެނަލުން މަސައްކަތް ކުރަމުން އަންނަ ކަމަށް ރިޕޯޓްތައް ބުނެ އެވެ. އެކަމަކު، ޗެލްސީން ހަވާޓްޒް ވިއްކާލަން ކިޔާ 87 މިލިއަން ޑޮލަރު ދީފައި އެ ޑީލްކުރިއަށް ގެންދަން އާސެނަލްގެ ޝައުގުވެރިކަމެއް ނެތެވެ.
