މާލޭގައި މިއަދު ފެށި ފައިވް ނޭޝަންސް ޗެމްޕިއަންޝިޕް ބާސްކެޓްބޯޅަ މުބާރާތުގައި ރާއްޖެ ކުޅުނު ފުރަތަމަ މެޗުގައި ބަންގްލަދޭޝް އަތުން ބަލިވެއްޖެ އެވެ.
މިއަދުން ފެށިގެން މި މަހުގެ 23 އާ ހަމައަށް ކުރިއަށްދާ މުބާރާތުގައި ރާއްޖޭން ކުޅުނު މެޗުގައި ބަންގްލަދޭޝް އަތުން ބަލިވީ 52-42 އިންނެވެ.
ޒުވާނުންގެ މަރުކަޒު އިންޑޯ ކޯޓުގައި ރާއްޖެ އާއި ބަންގްލަދޭޝް ސަޕޯޓަރުންގެ ކުރިމަތީގައި ކުޅުނު މިރޭގެ މެޗު ފަށައިގެން ރާއްޖެއިން ރަނގަޅަށް ކުޅެ ލީޑެއްވެސް ނެގި އެވެ. އެ ގޮތުން، 10-6 އިން ލީޑުގައި އޮއްވައި، ބަންގްލަދޭޝް އިން ކުޅުން ރަނގަޅުކޮށް ގިނަ ސްކޯތަކެއްކޮށް ލީޑު ނެގި އެވެ. ފުރަތަމަ ކުއާޓާގައި ރާއްޖޭގެ އަބްދުﷲ އަމްޒަރު ރަނގަޅު ސްކޯތަކެއް ކުރިއިރު، ބަންގްލަދޭޝް ޓީމުގެ އެމްޑީ ސުލައިމާން ޓަނޫ ބޯޑު ދަށުން ގިނަ ބާސްކެޓްތަކެއް ވެއްޓި އެވެ.
މިރޭގެ މެޗުގެ ތެރެއިން ރާއްޖެ ޓީމުގެ އަމްޒަރު: ފުރަތަމަ ކުއާޓަރުގައި ރަނގަޅު ކުޅުމެއް ދެއްކި.--- ފޮޓޯ: މުހައްމަދު ޝާބިން/ އަދަދު
ދެ ވަނަ ކުއާޓާގައިވެސް ފެނުނީ އެއް މަންޒަރެކެވެ. ބަންގަލަދޭޝުން އެ ޓީމުގެ އިސްކޮޅުން ދިގު ކުޅުންތެރިން ބޮކްސްތެރެއަށް ގިނަކޮށް ސްކޯކުރި އެވެ. މި ކުއާޓާގެ ފަހުކޮޅު ނޭޕާލުން ނުވަ ޕޮއިންޓްގެ ލީޑެއް ނެގި ނަމަވެސް ފަހު ދޮޅު މިނެޓުގައި ޖެހިޖެހިގެން ހަތް ޕޮއިންޓް ސްކޯކޮށް މި ކުއާޓާ ނިމުމުގެ ކުރިން ރާއްޖެއިން ސްކޯ ދެ ޕޮއިންޓަށް ކައިރިކުރި އެވެ. މި ކުއާޓާ ނިމުނީ 23-21 އިން ބަންގްލަދޭޝް ކުރީގައި އޮވެގެންނެވެ.
މި މެޗުގެ އެންމެ ބޮޑު ތަފާތަކަށްވީ ތިން ވަނަ ކުއާޓާ އެވެ. މި ކުއާޓާގައި ބަންގްލަދޭޝް އިން ގިނަ ދިމާލުން ސްކޯތަކެއްކުރިއިރު، ރާއްޖެ އަށް ލިބުނު ހުސް ގިނަ ފުރުސަތުތަކެއް ބޭކާރު ކޮށްލެވުނެވެ. ނަތީޖާއެއްގެ ގޮތުން ބަންގްލަދޭޝް މި ކުއާޓާ ނިންމާލީ ނުވަ ޕޮއިންޓްގެ ލީޑަކާއެކުގަ އެވެ.
ފަހު ކުއާޓާ ފާހަގަވީ ދެ ޓީމުން ވެސް ގިނަ މިސްޓޭކްތަކެއް ހެދި ކުއާޓާއެއްގެ ގޮތުގަ އެވެ. އެންމެ ސްކޯރިން ދަށްކޮށް ފެނުނު މި 10 މިނެޓުގައި ރާއްޖެއިން ބޭރުން ގިނަ ޝޫޓްތަކެއް ކުރި އެވެ. ފަހު ދެ މިނެޓަށް ދިޔައިރު ރާއްޖެއިން ފަސް ޕޮއިންޓަށް ސްކޯވެސް ކައިރިކުރި އެވެ. ނަމަވެސް އެ ދަނޑިވަޅުގައި އިންޑޯގައި ހަރުކޮށްފައި ހުރި ލައިޓްތަކެއްގައި މައްސަލައެއް ޖެހި ކުޅުން މެދު ކަނޑާލަން ޖެހުމުން ރާއްޖޭއިން ކުޅުނު ޓެމްޕޯ އެއްކޮށް ގެއްލުނެވެ. އަދި ޕްރެޝަރުގައި ތިބި ބަންގްލަދޭޝްގެ ކުޅުންތެރިންނަށް ހަމަޖެހިލަން ވަގުތު ލިބުނެވެ. ފަހު ދެ މިނެޓުގައިވެސް ސްކޯކުރަން މަސައްކަތްކުރި ތްރީ ޕޮއިންޓްތައް ކާމިޔާބުނުވެ ރާއްޖެ މި މެޗުން ބަލިވީ 52-42 އިންނެވެ.
މުޅި މެޗަށް ބަލާއިރު ރާއްޖޭގެ ކުޅުންތެރިން 31 ތްރީ ޕޮއިންޓް އެޓެމްޓް ކުރި އެވެ. ނަމަވެސް އޭގެެތެރެއިން ވެއްޓުނީ ހަަތަރު ބޯޅަ އެވެ. ރާއްޖޭގެ ކުޅުންތެރިން ޝޫޓް ކުރި 18 ފްރީ ތުރޯގެ ތެރެއިން ވެއްޓުނީ އަށް ބޯޅަ އެވެ.
ރާއްޖެ ޓީމުގެ ނަސީމް ބްލޮކްކުރަން ބަންގްލަދޭޝްގެ ކުޅުންތެރިން މަސައްކަތް ކުރަނީ.--- ފޮޓޯ: މުހައްމަދު ޝާބިން/ އަދަދު
މި މެޗުގައި ރާއްޖޭގެ ޓީމުން އެންމެ ރަނގަޅަށް ކުޅުނީ ހަތަރު އެސިސްޓްކޮށް ހަތް ސްޓީލްކުރި އިސްމާއިލް ވިލްދާން ޔޫސުފް އެވެ. ވިލްދާން މި މެޗުގައި ފަސް ޕޮއިންޓް ސްކޯކުރިއިރު ރާއްޖޭގެ ޑިފެންސް ލައިނުގައި ބުރަކޮށް މަސައްކަތްކޮށް ގިނަ ބޯޅަތަކެއް ހޯދި އެވެ.
ރާއްޖޭގެ ޓީމަށް އެންމެ ގިނަ ޕޮއިންޓް ސްކޯކޮށްދިނީ 14 ޕޮއިންޓް ސްކޯކުރި އަބްދުﷲ އަމްޒަރު މުހައްމަދު އެވެ. މީގެ އިތުރުން މުހައްމަދު ހުވައިލިދު އަލީ (ހުވޭ) އަށް ޕޮއިންޓް އަދި އިބްރާހިމް ނަސީމް ހަތް ޕޮއިންޓް ސްކޯކުރި އެވެ.
ބަންގްލަދޭޝް ޓީމަށް ބަލާއިރު އެޓީމްގެ މަސޫދް ރާނާ 19 ޕޮއިންޓް ސްކޯކޮށްދިނެވެ. މުޅި މެޗުގައި 12 ރީބައުންޑް އޭނާ ނެގިއިރު، ޝޫޓު ކުރި 11 ބޯލައިގެ ތެރެއިން އަށް ބޯޅަ ބާސްކެޓްކުރި އެވެ. އޭގެ ތެރޭގައި މުހިންމު ދަނޑިވަޅުތަކުގައި ތިން ފަހަރަށް ތްރީ ޕޮއިންޓް ސްކޯކުރި އެވެ. މަސޫދުގެ އިތުރުން ޓީމްގެ ކެޕްޓަން މިތުން ބިސްވާސްވެސް 11 ޕޮއިންޓް ސްކޯކޮށްދިނެވެ. އޭނާ ވަނީ މެޗުގައި 14 ރީބައުންޑް ނަގައި ހަތަރު އެސިސްޓްކޮށް ހަތް ސްޓީލްކޮށްފަ އެވެ.
ފައިވް ނޭޝަންސް ޗެމްޕިއަންޝިޕްގައި ބަންގްލަދޭޝް ކުޅޭ ދެވަނަ މެޗުގައި މާދަމާ ހަވީރު ނިކުންނާނީ ޕާކިސްތާނާ ދެކޮޅަށެވެ. ދިވެހިރާއްޖެ ކުޅޭ ދެވަނަ މެޗުގައި މާދަމާ ރޭ ނިކުންނާނީ ބޫޓާނާ ދެކޮޅަށެވެ.
