ފައިވް ނޭޝަންސް ބާސްކެޓްބޯޅަ މުބާރާތުގެ ފުރަތަަމަ މެޗުގައި ނޭޕާލް ބަލިކޮށް ބޫޓާނުން މުބާރާތުގެ ފެށުން ރަނގަޅުކޮށްފި އެވެ.
ސަރަހައްދީ ފަސް ގައުމާ އެކު މިއަދު މާލޭގައި ފެށި ފައިވް ނޭޝަންސް ކަޕްގެ ފުރަތަމަ މެޗުގައި ނޭޕާލް އަތުން ބޫޓާން މޮޅުވީ 61-55 އިންނެވެ. މިއީ، ސަރަހައްދީ ބާސްކެޓްބޯޅައިގެ ތާރީހުގައި ނޭޕާލް އަތުން ބޫޓާން މޮޅުވި ދެ ވަނަ ފަހަރެވެ. މީގެ ކުރިން ބޫޓާނުން ވަނީ 2021 ވަނަ އަހަރު ބަންގްލަދޭޝްގައި އޮތް ސާބާ ޗެމްޕިއަންޝިޕުގައި ނޭޕާލް ބަލިކޮށްފަ އެވެ.
ޒުވާނުންގެ މަރުކަޒުގެ އިންޑޯ ހޯލުގައި މިއަދު ހަވީރު ކުޅުނު މެޗު ފަށައިގެން ފުރަތަމަ ލީޑު ނެގީވެސް ބޫޓާނުންނެވެ. ނޭޕާލަށް ގޭމުގެ ތެރެއަށް ނުވަދެވިގެން އުޅެނިކޮށް ފުރަތަމަ ކުއާޓާގައި ހަ ޕޮއިންޓްގެ ލީޑެއް ނަގައި އެ ލީޑު ދެމެހެއްޓި އެވެ.
މެޗުގެ ދެ ވަނަ ކުއާޓާގައި ވެސް ބޫޓާން ފެނުނީ މާ ވަރުގަދަކޮށެވެ. ނޭޕާލުން ބަދަލުތައް ގެނެސް ސްކޯ ކައިރިކުރަން މަސައްކަތްކުރި ނަމަވެސް 10 ޕޮއިންޓްގެ ލީޑެއް ބޫޓާނުން ނެގި އެވެ. ފުރަތަމަ ދެ ކުއާޓާ އަށް ބަލާއިރު ނޭޕާލްގެ ޖިގްމޭ ޝެރިން އަދި ރިންޗެން ދޯޖީގެ ކުޅުން ފާހަގަކޮށްލެވުނެވެ.
ތިން ވަނަ ކުއާޓާގައި ނޭޕާލުން ކުޅުން ވަރުގަދަކޮށް ޑިފެންސް ރަނގަޅު ކުރި އެވެ. ސްކޯގެ ފަރަގު ފަސް ޕޮއިންޓަށް ކުޑަކުރި އެވެ. ނަމަވެސް ހަތަރު ކުއާޓާ ފެށި ގޮތަށް ލީޑު އަނެއްކާވެސް ފުޅާކޮށް ބޫޓާނުން ތަފާތު ދެއްކި އެވެ.
މުބާރާތުގައި ބޫޓާން ކުޅޭ ދެވަނަ މެޗުގައި އެޓީމް ނިކުންނާނީ ރާއްޖެއާ ދެކޮޅަށެވެ. ނޭޕާލް ދެ ވަނަ މެޗުގައި މާދަމާ ހަވީރު ނިކުންނާނީ ޕާކިސްތާނާ ދެކޮޅަށެވެ.
ފައިވް ނޭޝަންސް ކަޕްގައި މިރޭ ކުޅޭ މެޗުގައި ވާދަކުރާނީ ރާއްޖެ އާއި ބަންގްލަދޭޝް އެވެ. މެޗު ފަށާނީ 20:30 ގަ އެވެ. މި މެޗުގެ ކުރިން މުބާރާތުގެ ހުޅުވުމުގެ ރަސްމިއްޔާތު ވެސް އޮންނާނެ އެވެ.
