ރައްޔިތުންގެ މަޖިލީހުގެ މިއަދުގެ ޖަލްސާ ހުއްޓައިލުމުގެ ކުރިން މަޖިލިސް ހަލަބޮލިކުރަން ރިޔާސަތުން ފުރުސަތު ދިން ކަމަށް އެމްޑީޕީގެ ޕާލަމެންޓްރީ ގްރޫޕުން ތުހުމަތުކޮށްފި އެވެ.
މިއަދުގެ ޖަލްސާ ގައި މެމްބަރުންގެ އަރައިރުން ބޮޑުވުމުން، ވާހަކަ ދައްކައިގެން މައްސަލަ ހައްލުކުރަަން މެދުކަނޑައިލުމަށްފަހު އަލުން ފެށި އިރު ވެސް އެ އަރަައިރުން އުފެދުނު މައްސަލައާ މެދު އޮތީ ގޮތެއް ނުނިމި އެވެ. މަޖިލީހުގެ މެޖޯރިޓީ އޮންނަ އެމްޑީޕީގެ މެމްބަރުންނާއި އެޕާޓީން ވަކިވެވަޑައިގެން " ދަ ޑިމޮކްރެޓްސް" ގެ ނަމުގައި އާ ޕާޓީއެއް އުފެއްދުމުގެ މަސައްކަތްކުރައްވާ މެމްބަރުންނާ ދެމެދު އަރައިރުމެއް ފެށުނީ ކޮމިޓީތަކުގެ އެކުލެވުން ބަދަލުކުރުމުގެ މައްސަލައިގަ އެވެ.
އެ އަރައިރުމުގެ ތެރެއިން ޖަލްސާ ނިންމައިލި އިރު، ރިޔާސަތުގައި އިންނެވި ވިލުފުށި ދާއިރާގެ މެމްބަރު ހަސަން އަފީފު އެއްވެސް މެމްބަރަކަށް ފިޔަވަޅެއް ނާޅުއްވަ އެވެ. ޖަލްސާ ކުރިއަށް ދިޔަ އިރު ވެސް އެމްޑީޕީގެ މެމްބަރުން އެކަން ފާހަގަކުރައްވައި ކަންބޮޑުވުން ފާޅުކުރެއްވި އެވެ. އޭގެ ފަހުން އެ ޕާޓީން ނެރުނު ބަޔާނެއްގައި ބުނީ ޖަލްސާގައި އެއްވެސް ބަަހުސެއް ކުރުމުގެ ފުރުސަތު ނުދީ މަޖިލިސް ހަލަބޮލި ކުރި އިރު ގަވައިދާ އެއްގޮތަށް އަމަލުކުރަން ރިޔާސަތުން ފަސްޖެހުނު ކަމަށެވެ. މިއަދުގެ ޖަލްސާ ހޫނުވިި މައްސަލަ ކަމަށްވާ ކޮމިޓީތަކަށް އަލުން މެމްބަރުން ކަނޑައެޅުމުގެ މައްސަލަ އެޖެންޑާކުރީ ސިޔާސީ ޕާޓީތަކާއި ވަކިޕާޓީއަކަަށް ނިސްބަތް ނުވާ މެމްބަރުންނާ ތިން ފަހަރެއްގެ މަތިން މަޝްވަރާކުރުމަށް ފަހުގައި ކަަމަށް ވެސް އެ ބަޔާނުގައި ބުންޏެވެ.
"...މި މައްސަލާގައި [ކޮމިޓީތަކަށް މެމްބަރުން ލުމުގެ މައްސަލާގައި] މަޖިލީހުގެ އިދާރާއިން ދެގޮތެއް ހުށަހަޅާފައި ވަނިކޮށް އެއިން އެއްވެސް ކަމަކަށް ބަހުސްކުރުމުގެ ފުރުސަތު ނުދީ މިއަދުގެ ޖަލްސާ ފެށުމާ އެކު އިދިކޮޅު މެމްބަރުންނަށް މަޖިލިސް ހަލަބޮލިކުރަން ފުރުސަތުދީ، ގަވާއިދާ އެއްގޮތަށް އަމަލުކުރުމަށް ފަސްޖެހި މަޖިލީހުގެ ރިޔާސަތުން ވަނީ މިއަދުގެ ޖަލްސާ ހުއްޓައިލައިފަ އެވެ،" އެމްޑީޕީގެ ޕާލަމެންޓްރީ ގްރޫޕުގެ ބަޔާނުގައި ބުންޏެވެ.
މަޖިލީހުގައި ކުރަން ޖެހޭ މުހިއްމު މަސައްކަތްތަކެއް އެބަހުރި ކަމަށް ބުނެ، އެފަދަ ބައެެއް މަސައްކަތްތަކުގެ ތަފްސީލު ވެސް އެ ބަޔާނުގައި ހިމަނާފައި ވެ އެވެ. ފެނުމުން މަހުރޫމުވެފައިވާ މީހުންނަށް އެހެން މީހެއްގެ އެހީތެރިކަމާ ނުލައި ވޯޓް ލެވޭ ގޮތަށް، އިންތިހާބުތަކާ ބެހޭ އާއްމު ގާނޫނު ބަދަލުކުރަން ހުށަހަޅާފައިވާ ބިލުގެ މަސައްކަތް އޭގެ ތެރޭގައި ހިމެނެ އެވެ.
ބަޔާނުގައި އެމްޑީޕީން ގޮވައިލީ މަޖިލީހުގައި މިހާރު ހުއްޓިފައިވާ މަސައްކަތްތައް ކުރިއަށް ގެންދެވޭނެ މަގު، މެމްބަރުންނާއި މަޖިލީހުގެ އިދާރާއިން ފަހިކޮށްދިނުމަށެވެ.
