މެޑްރިޑް (ޖޫން 14) - ރެއާލް މެޑްރިޑަށް ކުޅެމުންދާ ބްރެޒިލްގެ ފޯވަޑް ވިނީޝިއުސް ޖޫނިއާ އަށް ސަޕޯޓްކުރުމަށް ހިންގާ ނަސްލީ ތަފާތުކުރުމާ ދެކޮޅު ކެމްޕޭންގެ ދަށުން، ސްޕެއިންއާ އާއި ބްރެޒިލް އެކުވެރިކަމުގެ މެޗެއް ކުޅޭ ގޮތަށް ހަމަޖައްސައިފިއެވެ.
މި މެޗު ކުޅުމަށް ހަމަޖެހިފައިވަނީ އަންނަ އަހަރުގެ މާޗު މަހެވެ. މި މެޗު ކުޅޭނީ ވިނީޝިއުސް ނިސްބަތްވާ ރެއާލްގެ ސްޓޭޑިއަމްގައެވެ.
ރެއާލަށް މެޗުތަކުގައި މީގެ ކުރިން ވިނީޝިއުސް އަށް ވަނީ ނަސްލީ ދިމާކުުރުންތަކާ ކުރިމަތިލާންޖެހިފައެވެ. ބްރެޒިލްގެ ފުޓްބޯލް ފެޑަރޭޝަނާއި ސްޕެއިންގެ ފުޓްބޯލް ފެޑަރޭޝަން ގުޅިގެން ނަސްލީ ތަފާތުކުރުމާ ދެކޮޅަށް ކެމްޕޭނެއް ފަށައި، ވިނީޝިއުސް އަށް ސަޕޯޓު އޮތްކަން ވަނީ ފާޅުކޮށްފައެވެ.
"ފުޓްބޯޅަައިގައި ނަސްލީ ދިމާކުރުންތަކަށް އެއްވެސް ޖާގައެއް ނޯންނާނެ،" ސްޕެއިންގެ ފުޓްބޯލް ފެޑަރޭޝަންސްގެ ރައީސް ލުއިސް ރުބިއާލެސް ވިދާޅުވި އެވެ.
ބްރެޒިލްގެ ފުޓްބޯލް ފެޑަރޭޝަންސްގެ ރައީސް އެޑްނާލްޑޯ ރޮޑްރިގޭޒް ވިދާޅުވީ ނަސްލީ ދިމާކުރުންތަކުގެ މައްސަލަތައް ޖޫރިމަނާއަކުން ނިންމާލުމަކީ އެންމެ ރަނގަޅު ގޮތެއް ނޫން ކަމަށާއި ކްލަބުތައް ވެސް ޒިންމާދާރުކުރުވަން ޖެހޭ ކަމަށެވެ.
"ނަސްލީ ދިމާކުރުންތަކާ ގުޅޭ މައްސަލަތަކުގައި މިހާރަށްވުރެ ހަރުކަށި ފިޔަވަޅުތައް އަޅައި، މިކަން ހުއްޓުވުމަށް މަސައްކަތްކުރަންޖެހޭ،" ރޮޑްރިގޭޒް ވިދާޅުވި އެވެ.
ވިނީޝިއުސް އަށް ނަސްލީ ގޮތުން ދިމާކޮށްލި މައްސަލައެއްްގައި ވެލެންސިއާގެ ގިނަ ސަޕޯޓަރުންތަކަކަށް ފިޔަވަޅު އަޅައި، އެހެން ބައެއް ފަރާތްތަކާ ގުޅޭ މައްސަލަތަކެއް ވެސް އަންނަނީ ބަލަމުންނެވެ.
