ރައްޔިތުންގެ މަޖިލީހުގެ 13 މެމްބަރަކު އެމްޑީޕީން ވަކިވެވަޑައިގެންނެވުމާ ގުޅިގެން، މަޖިލީހުގެ ކޮމިޓީތަކުގެ އެކުލެވުމަށް ގެންނަ ބަދަލާ މެދު ގޮތެއް ކަނޑައަޅަން އެޖެންޑާކޮށްފައި ވަނިކޮށް އެ މައްސަލައާ ހިސާބަށް ނުދަނީސް އެކަމުގައި މެމްބަރުން އަރައިރުންވެ، މަޖިލީހުގެ މިއަދުގެ ޖަލްސާ މެދުކަނޑާލައިފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބުރައީސް އީވާ އަބްދުﷲ މަގާމުން ވަކިކުރަން އެމްޑީޕީން ހުށަހެޅުމުން، މަޖިލީހުގައި އެޅުނުކަމަށް ބުނާ މަރުތަޅުގެ އެއް އަސްލަކީ ކޮމިޓީތަކުގެ އެކުލެވުމަށް ގެންނަން ޖެހޭ ބަދަލު ނުގެނެސް އޮތުމެވެ.
މަޖިލީހުގެ ނައިބު ރައީސް އީވާ ވަކިކުރުމުގެ މައްސަލަ އެޖެންޑާކޮށް ކުރިއަށް ގެންދަން ދަތިވާ ސަބަބެއް ކަމަށް މަޖިލީހުގެ ރިޔާސަތުން ރައީސް މުހައްމަދު ނަޝީދު ވިދާޅުވެފައި ވަނީ އާއްމު ކޮމިޓީގެ އެކުލެވުމާ މެދު ގޮތެއް ނުނިމި އޮތުމެވެ.
މަޖިލީހުގެ މިއަދުގެ ޖަލްސާ ފެށީ ކޮމިޓީތަކުގެ މައްސަަލަ އެޖެންޑާކޮށްގެންނެވެ. އެޖެންޑާގައި ފުރަތަމަ ކަމަކަށް އޮތީ އެ މައްސަަލަ ކަމަށް ވިޔަސް މަޑުއްވަރި ދާއިރާގެ ޕީއެންސީ މެމްބަރު އާދަމް ޝަރީފު ކުއްލި މައްސަލައެއް ހުށަހަޅުއްވާފައި ވާތީ ރިޔާސަތުން ވިލުފުށި ދާއިރާގެ މެމްބަރު ހަސަން އަފީފު ފުރަތަމަ ފުރުސަތު ދެއްވީ އެ މައްސަލަ އަށެވެ.
ކުއްލި މައްސަލަ ހުުށަހަޅަން އާދަމް ޝަރީފު ފެށްޓެވުމާއި އެކު، މެދު ހެންވޭރު ދާއިރާގެ މެމްބަރު އަލީ އާޒިމާއި އެމްޑީޕީ މެމްބަރުންނާ ދެމެދު އަރިރުމެއް ފެށުނެވެ. އެ އަރައިރުމުގެ ތެރެއިން ނިޒާމާ ބެހޭ މައްސަލައެއް ކަމަށް ވިދާޅުވެ ފުރުސަތު ހޯއްދަވައިގެން އާޒިމް ނެންގެވީ ކޮމިޓީތަކަށް މެމްބަރުން އައްޔަންކުރަން އެމްޑީޕީން ހުށަހަޅާފައިވާ ގޮތާ މެދުގަ އެވެ. އާޒިމާއި އެމްޑީޕީ މެމްބަރުންނާ ދެމެދު ހިނގި އަރައިރުމުގައި ހުތުރު ބަހުން މުއާމަލާތްކުރާ އަޑު ވެސް އިވުނެވެ.
އެކަމުގައި މެމްބަރު އާޒިމާއި ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި އުނގޫފާރު ދާއިރާގެ މެމްބަރު މުހައްމަދު ވަހީދު ވެސް އެ މައްސަލާގައި ކަންބޮޑުވުން ފާޅުކުރެއްވި އެެވެ.
"އިއްޒަތްތެރި ރައީސް، މަޖިލީހުގެ ކޮމިޓީތަކަށް މެމްބަރުން ކަނޑައަޅާއިރު ކީއްވެގެންތޯ މުޅި މަޖިލީހުގެ ޖުުމްލަ މެމްބަރުންގެ އަދަދު، އެއީ ޕާޓީތަކަށް ނިސްބަތްވާ، އެއީ ކޮމިޓީތަކަށް ކަނޑައަޅާ އަދަދުގެ ގޮތުގައި [ބަލަނީ؟]، އޭގެ އިތުރުން ކޮންމެ ކޮމިޓީއަކަށް ވަކިން އެ ޕަސެންޓޭޖް މިދެނީ، އެއީ ކޮން އުސޫލަކުންތޯ؟" ހަސަން ލަތީފު ވިދާޅުވި އެވެ.
ކަންބޮޑުވުން ފާޅުކުރެއްވުމުން ރިޔާސަތުން ވިލުފުށި ދާއިރާގެ މެމްބަރު ހަސަން އަފީފު ވިދާޅުވީ ކޮމިޓީތަކުގެ އެކުލެވުމާ މެދު ވާހަކަ ދައްކަވަން، އެެޖެންޑާގެ އެ އައިޓަމާ ހިސާބަށް ދިއުމުން ފުރުސަތު ދެއްވާނެ ކަމަށެވެ.
ސިޔާސީ ޕާޓީތަކުގެ މެދުގައި މަޝްވަރާ ކުރުމަށް ފުރުސަތު ދިނުމުގެ ގޮތުން ރިޔާސަތުގައި އިންނެވި ހަސަން އަފީފް ވަނީ ޖަލްސާ މެދުކަނޑާލާފަ އެވެ.
