މަޖިލިސް ހުއްޓިފައިވާ މައްސަލަ ހައްލު ކުރަން ގަވާއިދު އިސްލާހު ކުރަން އެމްޑީޕީން ހުށަހަޅައިފި

ރައްޔިތުންގެ މަޖިލީހުގެ މަސައްކަތްތައް ހުއްޓިފައިވާތީ އެ މަޖިލީހުގެ ގަވާއިދަށް އިސްލާހު ގެެނެސް އެކަން ހައްލު ކުރަން ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީން މިއަދު އެދެފި އެވެ.

ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ މަގާމުން ވަކި ކުރަން މިއަދުގެ ޖަލްސާގައި އެޖެންޑާ ކުރުމަށްފަހު ވެސް މަޖިލީހުގެ ރައީސް މުހައްމަދު ނަޝީދު ރިޔާސަތުން އެކަހެރިވެވަޑައިގެންފައިވާތީ، ޖަލްސާއެއް ނުބޭއްވުނެވެ.

ނަޝީދު ރިޔާސަތުން ދުރުވެވަޑައިގެންނެވީ އެމަނިކުފާނު ވަކި ކުރުމުގެ މައްސަލައެއް ވެސް ހުށަހަޅާފައިވާތީ އެ މައްސަލައިގައި ގޮތެއް ނިމެންދެކަށެވެ. ނަމަވެސް ގަވާއިދު ބުނާ ގޮތުން ނައިބު ރައީސް ވަކި ކުރުމުގެ ޖަލްސާގެ ރިޔާސަތު ބަލަހައްޓަންޖެހެެނީ ރައީސްއަށެވެ.

އެމްޑީޕީގެ ޕާލަމެންޓަރީ ގްރޫޕުގެ ލީޑަރު މުހައްމަދު އަސްލަމް މިއަދު މަޖިލީހުގެ އަމީން އާންމު ފާތިމަތު ނިޔުޝާއަށް ފޮނުއްވި ސިޓީއެއްގައި އެދިވަޑައިގެންފައި ވަނީ އިސްލާހުތައް ފާސް ކުރުމަށް ތަޅުމަށް ހުށަހެޅުމަށެވެ.

"ރައްޔިތުންގެ މަޖިލީހުގެ ގަވާއިދަށް އިސްލާހު ގެނައުމަށްޓަކައި ހުށަހެޅޭ މި މައްސަލައަށް ގޮތެއް ނިންމުމަށް މި ސިޓީއާއެކު އެއްކަރުދާސް ކުރެވިފައިވާ އިސްލާހުތައް މަޖިލީހުގެ ތަޅުމަށް ހުށަހަޅައި ދެއްވުން އެދި ދެންނެވިން،" އަސްލަމް އެ ސިޓީގައި ވިދާޅުވެފައިވެ އެވެ.

ރައްޔިތުންގެ މަޖިލީހުގެ ގަވާއިދަށް އެމްޑީޕީން ހުށަހަޅާ އިސްލާހުތައް

44 ވަނަ މާއްދާގެ ހ.

• މަޖިލީހުގެ ރައީސް ނުވަތަ ނައިބު ރައީސް ރިޔާސަތު ބަލަހައްޓަން އުޒުރުވެރިވެއްޖެ ނަމަ ރިޔާސަތު ބަލަހައްޓާނެ މެމްބަރެއް ރައީސް ކަނޑައަޅަންޖެހޭނެ ކަމަށް ބުނުން. އެގޮތަށް ކަނޑައަޅަންޖެހެނީ އެންމެ ގިނަ ދުވަސްވީ ފަސް މެމްބަރުން. އެއިން މެމްބަރަކަށް ވިދިވިދިގެން ބެލެހެއްޓޭނީ ތިން ޖަލްސާގެ ރިޔާސަތު.

44. ވަނަ މާއްދާގެ ށ.

• ރައީސް އާއި ނައިބު ރައީސް އިންތިހާބުވުމުން، އުޒުރުވެރިވާ ހާލަތްތަކުގައި ރިޔާސަތު ބަލަހައްޓާނެ މެމްބަރުން ކަނޑައަޅަންޖެހޭ ގޮތަށް ހެދުން.

205 ވަނަ މާއްދާގެ ބ.

• މަޖިލީހުގެ ރައީސް ނުވަތަ ނައިބު ރައީސް ވަކި ކުރާ ގަރާރެއް ހުށަހަޅަ ޖަލްސާއެއްގެ ރިޔާސަތު ބަލަހައްޓަން އުޒުރުވެރިވެއްޖެ ނަމަ ރިޔާސަތު ބަލަހައްޓާނެ މީހަކު އަމީން އާންމު ކަނޑައަޅަންޖެހޭ ގޮތަށް ހެދުން.

205 ވަނަ މާއްދާގެ ކ.

• މަޖިލީހުގެ ރައީސް މަގާމުން ވަކި ކުރުމުގެ ގަރާރެއް ހިނގަމުންދާ މަޖިލީހުގެ ވާހަކަ ދައްކާނެ މެމްބަރުންގެ ދިގުމިން ކަނޑައަޅާނީ އަމީން އާންމުކަމަށް ކަނޑައެޅުން.

އިސްލާހަށް އަމަލު ކުރުން

• އިސްލާހުތައް ތަޅުމުން ފާސްކުރުމާއެކު އަމަލު ކުރަން ފެށުމާއެކު ރައީސް ނުވަތަ ނައިބު ރައީސް ވަކި ކުރަން ކުރިން ހުށަހަޅާފައިވާ މައްސަލަތައް ވެސް އިސްލާހުތައް އެޕްލައިވުން.

ރައްޔިތުންގެ މަޖިލީހުގެ ގަވާއިދު ބުނާ ގޮތުން އެ މަޖިލީހުގެ ރައީސް ނުވަތަ ނައިބު ރައީސް ވަކި ކުރަން ބާއްވާ ޖަލްސާގައި ވާހަކަ ދައްކާނެ މެމްބަރުންނާއި ވަގުތު ކަނޑައަޅަންޖެހެނީ މަޖިލީހުގެ އާންމު ކޮމެޓީންނެވެ. ނަމަވެސް ކޮމެޓީތައް ފުރިހަމަނުވެ އޮތުމުން އާންމު ކޮމެޓީގެ އެއްވެސް މަސައްކަތެއް ނުހިނގަ އެވެ.

ކޮމެޓީތައް ފުރިހަމަނުވެ އޮތީ ކޮމެޓީތަކަށް މެމްބަރުން ލާނެ ނިސްބަތާމެދު ޕާޓީތަކަށް އެއްބަސްނުވެވިގެންނެވެ. އެމްޑީޕީން ބުނަނީ އެ ޕާޓީއަށް ގަވާއިދުން ލިބެންޖެހޭ 64 ޕަސެންޓު ކޮންމެ ކޮމެޓީއަކުން ލިބެންޖެހޭނެ ކަމަށެވެ. ނަމަވެސް އިދިކޮޅު މެމްބަރުން ބުނަނީ އެ ޕަސެންޓު ޖެހޭނީ ހުރިހާ ކޮމެޓީތަކަކަށް ބަހާލަން ކަމަށެވެ.

ކޮމެޓީތަކުގެ މައްސަލަ ހައްލު ކުރަން އެ މައްސަލަ މިހާރު ވަނީ ރައްޔިތުންގެ މަޖިލީހުގެ މާދަމާގެ ޖަލްސާއަށް އެޖެންޑާކޮށްފަ އެވެ.