ޕެރިސް (13 ޖޫން) - ޕީއެސްޖީއާ އެކު ހަދާފައިވާ ކޮންޓުރެކްޓް އާކުުރުމަށް އެ ޓީމުގެ ތަރި ކީލިއަން އެމްބާޕޭ ބޭނުންނުވާތީ، އޭނާ ވިއްކާލުމަށް ޕީއެސްޖީން ވިސްނަމުންދާ ކަމަށް މީޑިއާ ރިޕޯޓްތައް ބުނެފިއެވެ.
ޕީއެސްޖީއާ އެކު އެމްބާޕޭ ،24، ހަދާފައިވާ ކޮންޓުރެކްޓް ހަމަވާނީ އަންނަ ސީޒަންގެ ނިޔަލަށެވެ. ކޮންޓުރެކްޓް އާނުކުރާނެ ކަމަށް އެމްބާޕޭ ވަނީ މިހާރު ޕީއެސްޖީ އަށް އަންގައިފަ އެވެ.
އެހެންކަމުން، ޕީއެސްޖީން އޭނާގެ ކޮންޓުރެކްޓް ހަމަވަންދެން އެ ކްލަބުގައި ބަހައްޓައިފިނަމަ، އަންނަ އަހަރު އޭނާ އަށް ހިލޭ ޓްރާންސްފާއެއްގައި އެހެން ކްލަބަކަށް ބަދަލުވެވޭނެއެވެ. އެކަމަކު ހިލޭ ޓްރާންސްފާއެއްގައި އެމްބާޕޭ ދޫކޮށްލަން ޕީއެސްޖީން ބޭނުމެއްނުވެއެވެ.
ކޮންޓުރެކްޓް އާކުރަން ބޭނުންުވާ ކަމަށް އެމްބާޕޭ އެންގީ ކްލަބަށް ފޮނުވި ސިޓީއަކުންނެވެ. އެކަމަކު، މި ސިޓީ ކްލަބަށް ލިބުނު ކުރިން ފްރާންސްގެ މީޑިއާއަކަށް ލިބިފައިވާތީ، ޕީއެސްޖީން ވަނީ ހިތްހަމަނުޖެހިފަ އެވެ.
ޕީއެސްޖީން އެމްބާޕޭއާ އެކު އިތުރަށް މަޝްވަރާކޮށްގެން ވެސް ޖުލައި މަސް ނިމެންވާއިރަށް ކޮންޓުރެކްޓް އާކުރާނެ މަގެއް ނުފެނިއްޖެނަމަ، އެ ކްލަބުން މި ޓްރާންސްފާގައި އޭނާ ވިއްކާލުމުގެ ފުރުސަތު ބޮޑެވެ.
ކޮންޓުރެކްޓް އާކުރުމާ މެދު ގޮތެއް ނިންުމަށް ޕީއެސްޖީން އެމްބާޕޭއާ ވަނީ 31 ޖުލައިގެ ނިޔަލަށް ފުރުސަތު ދީފަ އެވެ. އެކަމަކު، ކޮންޓުރެކްޓް އާނުކުރާނެ ކަމަށް އޭނާ އެންގިއިރު، އެކަމާ ގުޅޭ މަޝްވަރާތައް ކުރަމުންދާތާ ގިނަ ދުވަސްތަކެއްވެއްޖެއެވެ.
މީގެ އަހަރެއް ކުރިން އެމްބާޕޭ ވަނީ ރެއާލް މެޑްރިޑަށް ބަދަލުވުމާ ގާތަށް ޖެހިފަ އެވެ. އެކަމަކު، އެންމެ ފަހު ވަގުތު އޭނާ ވަނީ ރެއާލް އަށް ފުރަގަސްދީ ޕީއެސްޖީގެ ކޮންޓުރެކްޓް އާކޮށްފަ އެވެ.
