ޓްވިޓާއަކީ ދުނިޔޭގެ އެންމެ އިތުބާރު ހިފޭ، ތެދު މައުލޫމާތު ހިމެނޭ މަންސައަށް ހަދާނެކަމަށް އެކުންފުނީގެ އާ ސީއީއޯ ލިންޑާ ޔަކަރީނޯ ބުނެފި އެވެ.
މީގެ ހަފްތާއެއްހާ ދުވަސް ކުރިން އިލޯން މަސްކްގެ ބަދަލުގައި ސީއީއޯ ކަމާއި ހަވާލުވި ޔަކަރީނޯ، މިހެން ބުނެފައިވަނީ އޭނާ ކޮށްފައިވާ ޓްވީޓްތަކެއްގަ އެވެ. ޔަކަރީނޯ ކުރި ޓްވީޓެއްގައި ބުނެފައިވަނީ ޓްވިޓާގެ ސީއީއޯ ކަމާއި ހަވާލުވި ފަހުން ވަރަށް ގިނަ ބަޔަކު އެއީ ކީއްވެގެންތީ އަހާކަމަށެވެ. އެކަމުގެ އަދި އެކަމުގެ ޖަވާބު ކަމަށް ބުނެ އިތުރު އެތައް ޓްވީޓްތަކެއް ކޮށްފައިވެ އެވެ.
އެގޮތުން، ޓްވިޓާގައި ދޮގު ހަބަރު ފެތުރުމާއި ވަކި ކޮޅަކަށް ބުރަވާ ފަދަ މައުލޫމާތު ފެތުރުމާއި ބެހޭ ގޮތުން ޔަކަރީނޯ ބުނެފައިވަނީ، އޭނާގެ ސީއީއޯ ކަމުގެ ދަށުގައި ނުވަތަ "ޓްވިޓާ 2.0" ގައި، އެއަކީ ދުނިޔޭގެ އެންމެ އިތުބާރުހިފޭ އަދި އެންމެ އަވަހަށް މައުލޫމާތު ލިބޭ މަންސައަށް ހަދާނެ ކަމަށެވެ. އަދި މިއީ "ހުސް" ވައުދެއް ނޫން ކަމަށާއި މިއީ މަސައްކަތް ކުރެވެމުންދާ ހަގީގަތެއް ކަމަށް އޭނާ ބުނެފައިވެ އެވެ.
"ފްރީ ސްޕީޗް އެބްސޮލޫޓިސްޓް" އެއް ކަމަށް އަމިއްލައަށް ބުނެފައިވާ އިލޯން މަސްކް، ޓްވިޓާ ގަތުމަށް ފަހު ވަނީ އެ މަންސާގެ ކޮންޓެންޓް މޮޑަރޭޝަން ޕޮލިސީސް އަށް ވަރަށް ބޮޑަށް ފާޑު ކިޔައިފަ އެވެ. އަދި, ހަގީގީ "ފްރީ ސްޕީޗް" އަށް ތަންދޭ ތަނަކަށް ޓްވިޓާ ހަދާނެ ކަމަށް މަސްކް ބުނެފައިވެ އެވެ.
އެގޮތުން, މަސްކްވަނީ މީގެ ކުރިން ބޭންކޮށްފައިވާ، އާންމު ގާނޫނާއި ގަވާއިދުތަކާ ދެކޮޅަށް ތާއީދުކުރާ ބައެއް ޓްވިޓާ އެކައުންޓްތައް އަލުން ހިންގުމަށް ފުރުސަތު ދީފަ އެވެ. މީގެ ނަތީޖާއަކަށްވީ ގިނަ އެޑްވަޓައިޒަރުން ޓްވިޓާ ދޫކޮށްލުމެވެ. މިކަމާ ހެދި މިދިޔަ އަހަރުގެ ޑިސެމްބަރު މަހު ޓްވިޓާގެ އާމްދަނީ ވަނީ އޭގެ ކުރި އަހަރާ ބަލާ އިރު 40 އިންސައްތަ ދަށަށް ގޮއްސަ އެވެ.
މަސްކް ސީއީއޯ ކަމުން ދުރުވެ ޔަކަރީނޯއާ މި މަގާމު ހަވާލުކުރީ މިފަދަ ކަންކަން ހައްލުކޮށް، މަސްކްގެ އަމާޒުތަކަށް ވާސިލުވާނެ އައު ގޮތްތަކެއް ހޯދުމަށް ކަމަށް ބެލެވެ އެވެ. ޔަކަރީނޯ ވަނީ މީގެ ކުރިން އައު ޓެކްނޮލޮޖީތަކުގެ ތެރެއިން، ކާމިޔާބުކަމާއެކު އެންބީސީ ޔުނިވާސަލް ކުރިއަށް ގެންގޮސްފަ އެވެ.
އެގޮތުން އޭނާގެ ބެލުމުގެ ދަށުން ވަނީ އެކުންފުނީގެ އެޑްވަޓައިސިން ސޭލްސްއަށް ބޮޑު ކުރިއެރުމެއް ގެނެއްސަ އެވެ. އަދި އެންބީސީގެ ސްޓްރީމިން ޕެލްޓްފޯމް "ޕީކޮކް" ލޯންޗްކުރުމުގައި ވެސް ޔަކަރީނޯ ވަނީ ބޮޑު ދައުރެއް އަދާކޮށްފަ އެވެ.
ޓްވިޓާގެ ހިންގުމާ ޔަކަރީނޯ ހަވާލުވުމާއެކީ މަސްކް ދެން އަދާކުރާނެ ރޯލަކީ އެކްޒެކެޓިވް ޗެއާމަން އަދި ޗީފް ޓެކްނޮލޮޖީ އޮފިސާގެ ރޯލެވެ. ޓްވިޓާގެ ހިންގުމާއި ހަވާލުވެ ހުރެ އެހެން ވިޔަފާރިތަކަށް ސަމާލުކަން ދިނުމަކީ ގޮންޖެހުމަކަށް، ދުނިޔޭގެ އެންމެ މުއްސަދި އެއް ފަރާތްކަމުގައިވާ މަސްކަށް ވަނީ ވެފަ އެވެ. އެހެންކަމުން ޔަކަރީނޯއާއި ޓްވިޓާ ހިންގުން ހަވާލުކުރުމަށް ފަހު ޓެސްލާ އާއި ސްޕޭސްއެކްސް ފަދަ އޭނާގެ އެހެން ކުންފުނިތަކަށް މަސްކަށް އިތުރު ވަގުތު ދެވޭނެ އެވެ.
