ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ އުފައްދަވާ ދަ ޑިމޮކްރެޓްސްގެ ހަރުގެއަށް ބަޔަކު ކަޅުތެޔޮ ޖަހައިފި އެވެ.
އާޓިފިޝަލް ބީޗުގައި ކުރިމަތީގައި މީގެކުރިން ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މައި ހަރުގެ ހިންގި ތަނުގައި ހުޅުވި ޑިމޮކްރެޓުންގެ ޖަގަހައިގައި މިރޭ ތިބި އެ ޕާޓީގެ ބައެއް މެމްބަރުންގެ ގަޔަށް ވެސް ކަޅުތެޔޮ ޖަހާފައިވެ އެވެ.
އެ ސަރަހައްދުގައި ހުރި "އަދަދު" ގެ ނޫސްވެރިޔާ މަންޒަރު ދުށް މީހަކާ ހަވާލާދީ ބުނި ގޮތުގައި ކަޅުތެޔޮ ޖެހީ ދެ ސައިކަލެއްގައި ދިޔަ ހަތަރު މީހުންނެވެ.
މިހާރު ފުލުހުން ވެސް އަންނަނީ އެ ސަރަހައްދުގައި ހަރަކާތްތެރިވަމުންނެވެ. އެހެން ނަމަވެސް, އެކަމާ ގުޅޭގޮތުން ފުލުހުންގެ ރަސްމީ ބަހެއް އަދި ހާމަކޮށްފައި ނުވެ އެވެ.
އެ ޕާޓީ އުފެއްދުމުގައި އިސްކޮށް ހަރަކާތްތެރިވާ އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ވަނީ އެއީ ފިނޑި އަމަލެއް ކަމަށް ވިދާޅުވެ ޑިމޮކްރެޓްސް ނުސިހޭނެ ކަމަށް ވިދާޅުވެފަ އެވެ.
ސިޔާސީ ޕާޓީ އުފެއްދުމަށް ބޭނުންވާ މިންވަރަށް މެމްބަރުން ހަމަކޮށް ޖޫން އެކެއްގައި ޑިމޮކްރެޓުން ވަނީ އިލެކްޝަންސް ކޮމިޝަނަށް ހުށަހަޅާފަ އެވެ. އެ ޕާޓީގެ ފޯމުތައް ވެރިފައި ކުރުމުގެ މަސައްކަތް އީސީން ދަނީ ކުރަމުންނެވެ.
