ހަނޯއީ، ވިއެޓްނާމް (ޖޫން 12) - ވިއެޓްނާމްގެ ދެ ޕޮލިސް ސްޓޭޝަނެއްގައި ދިން ބަޑީގެ ހަމަލާތަކުގައި މަރުވި މީހުންގެ އަދަދު ނުވަޔަކަށް އަރައިފި އެވެ.
އޭގެ ތެރޭގައި ހަތަރު ފުލުހުން ހިމެނެ އެވެ. އާދީއްތަ ދުވަހުގެ ހެނދުނު ހިނގި ހާދިސާއާ ގުޅިގެން މިހާތަނަށް 26 މީހުން ހައްޔަރުކޮށްފައިވެ އެވެ.
އޮފިޝަލުން ބުނީ ހަމަލާތައް ދިނީ ސައިކަލުތަކެއްގައި ބަޑި އާއި އެހެން ނުރައްކާތެރި ހަތިޔާރު ހިފައިގެން އައި ބޮޑު ގްރޫޕަކުން ކަމަށެވެ.
މަރުވީ ހަތަރު ފުލުހުންނާއި ދެ ޕަަބްލިކް އޮފިޝަލުންނާއި އާއްމު ތިން މީހުންނެވެ. އިތުރު ދެ ފުލުހުންނަށް ސީރިއަސް އަނިޔާތަކެއް ލިބިފައިވެ އެވެ.
ތުހުމަތު ކުރެވޭ އިތުރު މީހުން ހޯދުމުގެ މަސައްކަތް ދަނީ ކުރަމުންނެވެ.
ވިއެޓްނާމްގެ މެދުތެރޭގައި އޮންނަ އުސް ހިސާބުތަކުގައި އުޅޭ ބައެއް ގަބީލާތަކުގެ މީހުން ބޭނުންވަނީ ވަކި ދައުލަތެއްގެ ގޮތުގައި ކުރިއަށް ދިޔުމަށެވެ.
ވިއެޓްނާމްގައި އާއްމުން ބަޑި ގެންގުޅުމަކީ މަނާ ކަމެކެވެ. އަދި ކަޅު ބާޒާރުގަައި ވެސް ބަޑި ހޯދަން އުނދަގުލެވެ. އެހެންވެ، ބަޑި ޖެހުމުގެ ހާދިސާތައް ވަރަށް ނުހިނގަ އެވެ.
