ރައްޔިތުންގެ މަޖިލީހުގެ ނައިބު ރައީސްގެ އިތުބާރު ނެތް ކަމުގެ މައްސަލަ މަޖިލީހުގައި ކުރިއަށްގެންދިޔުމަށް ހުރަސް އަޅައި މަޖިލިސް ހުއްޓުވާފައިވާތީ ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީގެ ޕާލިމެންޓަރީ ގްރޫޕުން މަޖިލީހުގެ އަމީން އާންމު ފާތިމަތު ނިޔުޝާއާ ބައްދަލުކުރަމުން އެބަދެ އެވެ.
އީވާ ވަކި ކުރަން ހުށަހަޅާފައި އޮތް މައްސަލަ މިއަދު ބާއްވަން މަޖިލީހުގެ ގަވާއިދުން ލާޒިމު ކުރެ އެވެ. ނަމަވެސް, އެ ޖަލްސާގެ އިންތިޒާމު ކަނޑައަޅަންޖެހޭ އާންމު ކޮމެޓީ ފުރިހަމަ ނުވާ ކަމަށް ބުނެ އަމީން އާންމު އެ މައްސަލަ އެޖެންޑާ ކުރަން ވަނީ ދެކޮޅު ހައްދަވައިފަ އެވެ. އީވާގެ އިތުރުން މަޖިލިސް ރައީސްގެ އިތުބާރުގެ މައްސަލައެއް ވެސް ވަނީ ހުށަހަޅާފަ އެވެ.
ކޮމިޓީތަކުގެ މެމްބަރުން ހަމަނުވާ ކަމަށް ބުނެ މަޖިލީހުގެ މަސައްކަތްތައް ކުރިއަށް ނުގެންދެވި ދައުލަތުގެ އެއް ބާރު ވަނީ އެއްކޮށް ހުއްޓިފަ އެވެ. އެމްޑީޕީގެ ޕީޖީން ވަނީ ތަކުރާރުކޮށް އެ މައްސަލަ އެޖެންޑާގައި ހިމަނައި މަޖިލިސް ކުރިއަށްގެންދެވޭނެ ގޮތެއް ހޯދައިދިނުމަށް މިއަދުގެ މަޖިލީހުގައި ވެސް ރިޔާސަތުގެ ކިބައިން އެދިފަ އެވެ. އެހެން ނަމަވެސް, ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފް ވަނީ މަޖިލީހުގެ ނިޒާމު ގެއްލިފައި އޮތުމުން ޖަލްސާ ނިންމާލައްވާފަ އެވެ.
އެމްޑީޕީގެ ޕީޖީ ގްރޫޕުގައި ހިމެނޭ މެމްބަރަކު ވަނީ އެކަމާ ގުޅިގެން އަމީން އާންމު ނިޔުޝާ އަދި އިދާރީ އިސް މުވައްޒަފުންނާ އެކު ޕީޖީ ލީޑަރު މުހައްމަދު އަސްލަމް މިވަގުތު ބައްދަލުކުރައްވަމުން ގެންދަވާކަން "އަދަދު" ނޫހަށް ކަށަވަރުކޮށްދެއްވާފަ އެވެ.
އެ ބައްދަލުވުމުގައި މަޖިލީހުގެ ޖަލްސާތައް ކުރިއަށްގެންދިޔުމަށް މިހާރު ހުރި ހުރަސްތައް ނައްތާލައި ޖަލްސާތައް އަލުން ފެށޭނެ ގޮތެއް ހޯދުމަށް މަޝްވަރާކުރަމުންދާކަން ވެސް ވަނީ އެނގިފަ އެވެ. އަދި, ކޮމިޓީތައް އެކުލަވާލުމާ ގުޅޭގޮތުން ވެސް މަޝްވަރާތައް ކުރިއަށްގެންދާކަން ވަނީ އެނގިފަ އެވެ.
ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ނ. ގައި ބުނެފައި އޮންނަ ގޮތުން މަޖިލީހުގެ ރައީސް ނުވަތަ ނައިބު ރައީސްގެ ވަކި ކުރަން ހުށަހެޅުމުން އެކަން އަމީން އާންމު ރައީސްއަށާއި މެމްބަރުންނަށް ރަސްމީ ތިން ދުވަހުގެ ތެރޭގައި އަންގައި ނޯޓިހެއް ފޮނުވަންޖެހެ އެވެ. އަދި, އެ ނޯޓިހުގެ ތާރީހުން ފެށިގެން 14 ދުވަސް ދިނުމަށްފަހު ދެން އެންމެ އަވަހަށްޖެހޭ ރަސްމީ ބަންދު ނޫން ދުވަހެއްގައި ރައީސް މަގާމުން ވަކި ކުރުމުގެ ޖަލްސާ ބާއްވަންޖެހެ އެވެ.
އިވާގެ މައްސަލައިގައި ނޯޓިސް ހަމަވެ، ޖަލްސާ ބާއްވަންޖެހޭ ތާރީހަކީ މިއަދެވެ.
ރައްޔިތުންގެ މަޖިލީހުގެ ނައިބު ރައީސް ވަކި ކުރުމުގެ އިޖުރާއަތުގެ ތެރެއިން ގަރާރު އިއްވަން ބާއްވާ ޖަލްސާ އެޖެންޑާާ ނުކުރެއްވުމަށްފަހު އެ މަޖިލީހުގެ އަމީން އާންމު ފާތިމަތު ނިޔުޝާ ވިދާޅުވީ އެ ޖަލްސާ އެޖެންޑާ ކުރެވޭނީ އާންމު ކޮމެޓީ އެކުލަވާލެވިގެން ކަމަށެވެ.
