އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތް ކަމަށް ކަނޑައަޅަން އިދިކޮޅުން ރައްޔިތުންގެ މަޖިލީހަށް ހުށަހެޅި މައްސަަލަ އާއި މަޖިލީހުގެ ނައިބު ރައީސް އީވާ ވަކިކުރަން އެމްޑީޕީން ހުށަހެޅި މައްސަލަ މަޖިލީހުގައި މާދަމާ (ހޯމަ ދުވަހު) ބާއްވާ ޖަލްސާއަށް އަލުން އެޖެންޑާކުރަން އެމްޑީޕީން އެދިއްޖެ އެވެ.
މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުން މަޖިލީހުގެ އަމީން އާއްމު ފާތިމަތު ނިޔުޝާއަށް ފޮނުވި ސިޓީގައި ބުނީ ރިފްއަތުގެ އިތުބާރު ނެތްކަމުގެ މައްސަލަ މާދަމާގެ ޖަލްސާއަށް އެޖެންޑާކޮށްދެއްވަން "ތަކުރާރުކޮށް" ދަންނަވާ ކަމަށެވެ.
އޭޖީ ރިފްއަތުގެ އިތުބާރު ނެތްކަމަށް ކަނޑައަޅަން ހުށަހެޅި މައްސަލަ މަޖިލީހަށް އެންމެ ފަހުން އެޖެންޑާކުރީ މިދިޔަ އަންގާރަ ދުވަހު އެވެ. އެހެން ނަމަވެސް ރިޔާސަތުން ރައްުޔިތުންގެ މަޖިލީހުގެ ރައީސް މުހައްމަދު ނަޝީދު އިޖުރާއީ މައްސަލަތަކެއް ދެއްކެވުމަށް ފަހު އެ މައްސަލަ ޕާކްކުރީ އެވެ. އެމަނިކުފާނު އެ މައްސަލަ ޕާކްކުރެއްވީ އޭޖީ މަޖިލީހުގެ އިމްތިޔާޒަށް އަރާވަޑައިގެންފައިވާ ކަމަށް ތުހުމަތުކޮށް، ފަރެސްމާތޮޑާ ދާއިރާގެ ޕީޕީއެމް މެމްހަރު ހުސައިން މުހައްމަދު ލަތީފު ހުށަހެޅުއްވި މައްސަލައަކާ ގުޅިގެންނެވެ.
އެމްޑީޕީގެ ޕީޖީ ގްރޫޕްގެ ލީޑަރުގެ ހައިސިއްޔަތުން އަސްލަމް ނިޔުޝާއަށް ފޮނުއްވި ސިޓީގައި ވިދާޅުވީ ރިފްއަތުގެ އިތުބާރު ނެތް ކަމަށް ހުށަހެޅި މައްސަލަ އެޖެންޑާކުރުމަށް ފަހު ތަޅުމުގައި ބަހުސްކޮށްގެން ކުރިއަށް ގެންދަން ތަކުރާރުކޮށް އެދޭ ކަމަށެވެ. އެޖެންޑާކުރުމަށް ފަހު އެ މައްސަލަ ޕާކްކުރީ ގަވައިދާ ހިލާފަށް ކަމަށް ވެސް އެ ސިޓީގައި ބުންޏެވެ.
ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގައި ބަޔާންކޮށްފައިވާ ފަދައިން އީވާގެ އިތުބާރު ނެތް ކަމުގެ މައްސަލަ މާދަމާގެ އެޖެންޑާގައި ހިމަނަންޖެހެ އެވެ. އެ އެ މައްސަލަ ނުހިމަނައި ވަނީ އެޖެންޑާ ނެރެފަ އެވެ.
ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ރ. ގައި ބުނެފައި އޮންނަ ގޮތުން، އެ މަޖިލީހުގެ ރައީސް އަދި ނައިބު ރައީސް ވަކި ކުރާ ގަރާރު މަޖިލީހަށް އިއްވައިފި ނަމަ އިތުރު މަސައްކަތެއްގެ ބަހުސް ކުރެވޭނީ ގަރާރާ މެދު ގޮތެއް ނިންމުމަށްފަހެވެ.
އެމްޑީޕީގެ ޕާލަމެންޓަރީ ގްރޫޕުން ދެކެނީ ރައްޔިތުންގެ މަޖިލީހުގައި މިހާރު އިތުރު މަސައްކަތެއް ކުރެވޭނީ އީވާ ވަކި ކުރަން ހުށަހަޅާފައި އޮތް ގަރާރާމެދު ގޮތެއް ނިންމުމަށްފަހު ކަމަށެވެ.
އީވާގެ މައްސަލަ އެޖެންޑާކުރުމަށް އެދި ކުރިން ވެސް އެމްޑީޕީން ސިޓީ ފޮނުވާފައިވެ އެވެ.
