ވޮޝިންޓަން، އެމެރިކާ (ޖޫން 11) - އަލިފާނުގެ ހާދިސާއަކާ ގުޅިގެން އެމެރިކާގެ ފިލަޑެލްފިއާ ސްޓޭޓުގައި ކާރޫބާރޫ ބޮޑު ހައިވޭ އޯވާޕާސްއެއްގެ ބައި ވެއްޓިއްޖެ އެވެ.
ރިޕޯޓުތައް ބުނާ ގޮތުން އެ ހާދިސާ ހިނގަން މެދުވެރިވީ އޯވާޕާސްގެ ދަށުގައި އޮތް ތެޔޮ ޓޭންކަރެއްގައި ރޯވި ފަހުންނެވެ. ހައިވޭގެ ވެއްޓުނު ބައިގައި ހަތަރު ޓްރެފިކް ލޭން އޮވެ އެވެ.
އެހެން ނަމަވެސް މީހަކަށް އަނިޔާވިކަމުގެ ރިޕޯޓެއް ނުލިބެ އެވެ. އޮފިޝަލުން ބުނީ އެކަން ދިމާވީ އަލިފާންގަނޑެއްގެ ސަބަބުން ކަމަށެވެ. ނަމަވެސް ރޯވީ އުޅަނދެއްގައި ކަމަށް ބުނެފައެއް ނުވެ އެވެ.
ނޫސްތަކުން ބުނީ އަލިފާން ރޯވީ އާދީއްތަ ދުވަހުގެ ހެނދުނު 07:00 ހާއިރު ކަމަށެވެ. އެއީ އާއްމުކޮށް އެންމެ ޓްރެފިކް މަދު އެއް ގަޑި ކަމަށް ރިޕޯޓުތައް ބުނެ އެވެ.
އެމެރިކާގެ އުތުރުން ދެކުނަށް އޮންނަ އެ ހައިވޭއަކީ މެއީން އާއި ފްލޯރިޑާ ސިޓީ ގުޅުވާލަދޭ އަދި އިރުމަތީ އައްސޭރިފަށުގައި ހުންނަ ހުރިހާ ބޮޑެތި ސިޓީތަކެއް ގުޅުވާލަދޭ ރޫޓެކެވެ.
އޮފިޝަލުން ބުނީ އެ ހާދިސާއާ ގުޅިގެން ފިލަޑެލްފިއާ ސަރަހައްދުގައި އެ ރޫޓުގެ ބޮޑު ބައެއް ބަންދުކޮށްފައިވާ ކަމަށާއި ގިނަ ދުވަސްތަކެއް ވަންދެން ބަންދުކޮށްފައި ބާއްވަން ޖެހުން އެކަށީގެންވާ ކަމަށެވެ.
