ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ މެމްބަރުންތަކެއް އެ ޕާޓީން ވަކިވުމުން، ކޮމެޓީތަކުގެ ހަމަ ބަދަލުވެފައިވާ ކަމަށާއި ކޮމެޓީތަކުގައި ޕާޓީތައް ނިސްބަތްވާ އަދަދު ޖެހޭނީ މަޖިލީހުން އަލުން ފާސް ކުރަން ކަމަށާއި އެ މަސައްކަތް ކުރަން ހުރަހެއް ނެތް ކަމަށް ރައްޔިތުންގެ މަޖިލީހުގެ އަމީން އާންމު ފާތިމަތު ނިޔުޝާ މިއަދު ވިދާޅުވެއްޖެ އެވެ.
މަޖިލީހުގެ ނައިބު ރައީސް އީވާ އަބްދުﷲ މަގާމުން ވަކި ކުރަން ހުށަހަޅާފައިވާ ގަރާރު ހުށަހަޅަން ގަވާއިދު ބުނާ ގޮތުން މާދަމާ ޖަލްސާއެއް ބާއްވަންޖެހެ އެވެ. އެ ޖަލްސާގައި ވާހަކަ ދައްކާނެ މެމްބަރުންގެ އަދަދާއި ވަގުތު ކަނޑައަޅަންޖެހެނީ އާންމު ކޮމެޓީންނެވެ.
އެކަމަކު ކޮމެޓީތައް އެކުލަވާލެވިފައި ނެތުމުން ރައްޔިތުންގެ މަޖިލީހުގެ އިދާރާއިން އެ ޖަލްސާ މާދަމާއަށް އެޖެންޑާކޮށްފައެއް ނުވެ އެވެ.
އެ މައްސަލައިގައި އެމްޑީޕީން ބުރާސްފަތި ދުވަހު ބުނީ މަޖިލީހުގެ ދާއިމީ ކޮމެޓީތައް ދެމިއޮންނާނެ ކަމަށާއި އެ ކޮމެޓީގެ މަސައްތަކަށް ގޮވާލުމަކީ އަމީން އާންމުގެ ޒިންމާއެއް ކަމަށެވެ. އެމްޑީޕީން އެކަމުގައި ދެކޭ ގޮތް ސިޓީއަކުން ހާމަކޮށްފައި އޮއްވައި މަޖިލީހުން ދިން ޖަވާބުގައި ނިޔުޝާ ވިދާޅުވީ މިހާރު ކުރިއަށްދަނީ މަޖިލީހުގެ މައިނޯރިޓީ އަދި މެޖޯރިޓީ ލީޑަރުގެ މަޝްވަރާގެ މަތިން ޕާޓީތަކަށް ނިސްބަތްވާ މެމްބަރުން ކޮމެޓީތަކުގައި ހިމެނޭ ނިސްބަތް ކަނޑައެޅުން ކަމަށާއި ކޮމެޓީތަކުގެ މަސައްކަތް ހިންގޭނީ އެއަށްފަހު ކަމަށެވެ.
"ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތިން މަޖިލީހުގެ ދާއިމީ ކޮމެޓީތައް ހިންގެން އޮތީ ރައްޔިތުންގެ މަޖިލީހުގެ ގަވާއިދުގެ 131 ވަނަ މާއްދާގެ ދަށުން މަޖިލީހުގެ ދާއިމީ ކޮމެޓީތަކުގައި ސިޔާސީ ޕާޓީތަކަށް ނިސްބަތްވެވަޑައިގަންނަވާ މެމްބަރުންނާއި ވަކި ޕާޓީއަކަށް ނިސްބަތްވެވަޑައިގެންނުވާ މެމްބަރުން ހިމެނިވަޑައިގަންނަވާ ނިސްބަތަށް އަންނަ ބަަދަލުތައް މަޖިލީހުން ފާސް ކުރައްވައިގެން،" ނިޔުޝާ ވިދާޅުވެފައިވެ އެވެ.
އީވާގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހަޅާފައިވާތީ ދެން މަޖިލީހުން އިތުރު މަސައްކަތެއް ކުރެވެނީ އެ ގަރާރާމެދު ގޮތެއް ނިންމުމަށްފަހު ކަމަށް އެމްޑީޕީން ފޮނުވި ސިޓީގައި ބުނެފައިވާ މަޖިލީހުން ބުނެފައިވެ އެވެ. ނަމަވެސް އަމީން އާންމު މިއަދު ވިދާޅުވީ މަޖިލީހުން އިތުރު މަސައްކަތެއްނުކޮށް ގަރާރާމެދު ގޮތެއް ނިންމަންޖެހޭނީ ގަރާރު މަޖިލީހަށް އިއްވުމަށްފަހު ކަމަށެވެ.
"މަޖިލީހުގެ 50 މެމްބަރުން ސޮއިކުރައްވައި ރައްޔިތުންގެ މަޖިލީހުގެ ނައިބު ރައީސް މަގާމުން ވަކިކުރުމުގެ މައްސަލަ ހުށަހަޅުއްވައ،ި ރައްޔިތުންގެ މަޖިލީހުގެ ގަވާއިދުގެ 206 ވަނަ މާއްދާއަށް ރިއާޔަތްކޮށް އެ ގަވާއިދުގެ 205 ވަނަ މާއްދާގެ ނ. ގައިވާ ގޮތުގެމަތިން އެ މައްސަލައިގެ ނޯޓިސް މަޖިލީހުގެ މެމްބަރުންނަށާއި މަޖިލީހުގެ ނައިބު ރައީސްއަށް ދީފައިވީ ނަމަވެސ،ް އެ މައްސަލަ މަޖިލީހުގެ ޖަލްސާއަށް އަދި ހުށަހެޅިފައިނުވާކަން ފާހަގަކުރަން،" އަމީން އާންމު ވިދާޅުވެފައިވެ އެވެ.
ނައިބު ރައީސް ވަކި ކުރަން ގަރާރެއް ހުށަހަޅައިފި ނަމަ، ރަސްމީ ތިން ދުވަހުގެ ތެރޭގައި، މަޖިލީހުގެ މެމްބަރުންނަށް އެ މަޖިލީހުގެ އިދާރާއިން އެކަމުގެ ނޯޓިހެއް ފޮނުވަންޖެހެ އެވެ. އަދި އެ ނޯޓިހުގެ ތާރީހުން 14 ދުވަހުގެ މުއްދަތު ދިނުމަށްފަހު އެންމެ އަވަހަށް އަންނަ ރަސްމީ ދުވަހު އެ ގަރާރު މަޖިލީހުގައި އިއްވަންޖެހެ އެވެ.
މާދަމާއަކީ އެ ގަރާރު މަޖިލީހުގައި އިއްވުމަށް ޖަލްސާ ބާއްވަންޖެހޭ ދުވަހެވެ. ނަމަވެސް އޭގެ ކުރިން ކުރަންޖެހޭ ބައެއް މަސައްކަތް ނުވެ އޮތުމުންނާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ވެސް އިތުބާރު ނެތްކަމުގެ މައްސަލަ ހުށަހަޅާފައި އޮތުމުން، އީވާ ވަކި ކުރަން ބޭނުންވާ ގަރާރު އިއްވޭނެ ކަމެއް ނޭނގެ އެވެ.
ސަރުކާރާ އިދިކޮޅު، ރައްޔިތުންގެ މަޖިލީހުގެ މެމްބަރުން ބުނަނީ މިއަދުގެ ޖަލްސާ ބާއްވަން ޖެހުނު ނަމަވެސް ބޭއްވޭނެ ގާނޫނީ މަގެއް ނެތް ކަމަށެވެ. އަދި އެކަމަށް ގާނޫނާއި ގަވާއިދުގައި ފަރުވާއެއް ލިޔެވިފައި ނެތް ކަމަށް ވެސް އެ މެމްބަރުން ދެކެ އެވެ. އެކަމަކު، ސަރުކާރަށް ތާއީދު ކުރާ މެމްބަރުން ބުނަނީ، ޖަލްސާ ބާއްވައި މަޖިލިސް ކުރިއަށް ގެންދަން ހުރަހެއް ނެތް ކަމަށެވެ. މަޖިލީހުގެ ގަވާއިދު އޮތީ މަރުތަޅު އެޅޭނެ ގޮތަށް ނޫން ކަމަށް އެ މެމްބަރުން ދެކެ އެވެ.
ޖަލްސާ ނުބޭއްވޭނެ ކަމަށް ބުނާ މައިގަނޑު ސަބަބަކީ ކޮމެޓީތަކުގެ ޖަލްސާގައި ވާހަކަ ދައްކާނެ މެމްބަރުން އާންމުނ ކޮމެޓީން ކަނޑަނޭޅި އޮތުމާއި ރައީސް އަދި ނައިބު ރައީސްގެ މައްސަލަ އެއް ފަހަރާ ހުށަހަޅާފައި އޮތުމުންނެވެ. އިދިކޮޅުން ބުނަނީ، ނައިބު ރައީސް ވަކި ކުރާ ޖަލްސާގެ ރިޔާސަތު ރައީސް ބަލަހައްޓަންޖެހޭއިރު، ރައިސްގެ މައްޗަށް އިތުބާރު ނެތްކަމުގެ މައްސަލައެއް ހުށަހަޅާފައި އޮއްވައި ރިޔާސަތުގައި ނީންދެވޭނެ ކަމަށެވެ.
ނަމަވެސް އެމްޑީޕީން ބުނަނީ ކޮމެޓީތައް ދެމި އޮތް ކަމަށާއި އެހެންކަމުން އާންމު ކޮމެޓީގެ މަސައްކަތް ކުރެވޭނެ ކަމަށެވެ. އަދި ރައީސްގެ އިތުބާރު ނެތްކަމުގެ މައްސަލަ ހުށަހަޅާފައި އޮތް ނަމަވެސް ގަރާރު އިއްވާފައިނުވާތީ ނައިބު ރައީސް ވަކި ކުރާ މައްސަލައިގެ ރިޔާސަތު ރައީސްއަށް ބެލެހެއްޓޭނެ ކަމަށް އެމްޑީޕީން ދެކެ އެވެ.
