ބާސެލޯނާ (ޖޫން 9) - މި ވަގުތު އޮތް ހާލަތާއި ޕްރެޝަރަށް ވިސްނާއިރު، ބާސެލޯނާ އަށް އެނބުރި ނައިސް އެމެރިކާގެ އިންޓަ މިއާމީ އަށް ބަދަލުވާން ލިއޮނަލް މެސީ ނިންމި ނިންމުން ރަނގަޅު ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.
ޕީއެސްޖީއާ އެކު އޮތް ދެ އަހަރުގެ ކޮންޓްރެކްޓް ފުރިހަމަކޮށް، މެސީ، 35، މިހާރު ނިންމައިގެން ހުރީ އެމެރިކާ ލީގުގެ އިންޓަ މިއާމީ އަށް ބަދަލުވާށެވެ. އަލުން، ބާސެލޯނާ އަށް ދާން މެސީ އަށް ފުރުސަތު އޮތް ނަމަވެސް އެ ގޮތަށް ކުރިއަށް ނުދާން ނިންމި ސަބަބަކީ މި ވަގުތު ބާސެލޯނާގައި އޮތް ހާލަތު ކަމަށް މެސީ ވަނީ ބުނެފަ އެވެ.
ޓްވިޗް މެދުވެރިކޮށް މެސީގެ ޓްރާންސްފާއާ ގުޅޭގޮތުން ވާހަކަދައްކަމުން ޒަވީ ބުނީ މިދިޔަ ދެ އަހަރު ޕީއެސްޖީގައި މެސީ އަށް ކުރިމަތިވީ ވަރަށް ޕްރެޝަރު ހާލަތްތަކެއް ކަމަށާއި އެކަން ކަމަށް ބަލާއިރު، އިންޓަ މިއާމީ އަށް ދާން މެސީ އިހުތިޔާރުކުރި ސަބަބު އެނގޭ ކަމަށެވެ.
"މިއީ، ޕާސަނަލް ނިންމުމެއް، ހާލަތު މި ވަގުތު އޮތް ގޮތުން ލިއޯ (މެސީ) ޕްރެޝަރުތަކެއް ނަގަން ބޭނުމެއް ނުވާނެ. އަހަރެމެންނަށް މެސީ ވިސްނާ ގޮތަށް އެ ހާލަތަށް ބަލައިގެން އެއްޗެއް ނުބުނެވޭނެ. ޔަގީނުން ވެސް އެއީ ތާރީހު ދުށް މޮޅު ކުޅުންތެރިޔާ،" ޒަވީ ބުންޏެވެ.
މުސްތަގުބަލާ ގުޅޭގޮތުން މެސީއާ ގިނަ ވާހަކަތަކެއް ދެކެވުނު ކަމަށް ޒަވީ ވެސް ވަނީ ބުނެފަ އެވެ. އެ ގޮތުން، މި ފަހުން މެސީގެ ވާހަކަތައް ވަރަށް ބޮޑަށް ބަދަލުވެގެން ދިޔަ ކަމަށް ޒަވީ ވަނީ ބުނެފަ އެވެ.
"މެސީ އަށް ވުމަކީ ފަސޭހަ ކަމެއް ނޫން. ވިސްނާލަންވީ ދުނިޔޭގެ ކޮންމެ ދިމާލެއްގައި ވެސް މެސީ އަށް އެ އޮންނަ ފޯކަސް، އެ ވަރުގެ ފޯކަސް އެއް އޮތުމަކީ އަބަދުވެސް ކަންކަން ވީ އެންމެ ރަނގަޅަށް ކުޅުމުގެ ޕްރެޝަރު އޮންނާނެ ސަބަބެއް،" މެސީއާ އެކު ގިނަ އަހަރުތަކެއް ވަންދެން ބާސެލޯނާ އަށް ކުޅުނު ޒަވީ ބުންޏެވެ.
ބާސެލޯނާ އަށް ދިއުމަށް ޒަވީ އާއި ރައީސް ޖޮއާން ލަޕޯޓާއާ ވާހަކަ ދެެކެވުނުއިރު، ކޮންޓްރެކްޓެއްގެ ވާހަކަ ސީދާކޮށް ނުދެކެވޭ ކަަމަށް ވެސް މެސީ ބުނެފައިވެ އެވެ. އެ އަށް އިޝާރާތްކޮށް، ޒަވީ ބުނީ ވާހަަކަތައް ދެކެވުނުއިރު، ބާސެލޯނާގެ ވިސްނުން ވެސް ހުރީ މެސީ އަށް އެންމެ ރަނގަޅު ހާލަތަށް ކްލަބް ގެނެސްފައި ކޮންޓްރެކްޓާއި ދެން ހުރި ކަންކަމާ ހަމައަށް ދިއުމަށް ކަމަށެވެ.
މި މަހު 36 އަހަރު ފުރޭ މެސީ ވަނީ ބާސެލޯނާގެ ކުޅުންތެރިންތަކެއް ވިއްކާލައި، ބައެއް ކުޅުންތެރިންގެ މުސާރަ ކުޑަކޮށް އެ ހުރިހާ ކަމެއް ކޮށްގެން އަލުން ބާސެލޯނާ އަށް ދާން ބޭނުންނުވާ ކަމަށް ވެސް ބުނެފަ އެވެ.
