ރައްޔިތުންގެ މަޖިލީހުގެ ރައީސާއި ނައިބު ރައީސްގެ ވަކިކުރުމުގެ މައްސަލަ އެކު އެކުގައި ހުށަހެޅުމަކީ މަޖިލިސް މަރުތަޅު އެޅުވުން ކަމަށް، މަޖިލީހުގެ ރައީސް މުހައްމަދު ނަޝީދު ސިފަކުރައްވައިފި އެވެ.
ނަޝީދުގެ ނުރަސްމީ ޓްވިޓާ ހޭންޑުލް "އެމްއެން އަންއޮފިޝަލް" އިން މިރޭ ކުރެއްވި ޓްވީޓެއްގައި އެމަނިކުފާނު ތުހުމަތުކުރެއްވި ގޮތުގައި އެމްޑީޕީން އެގޮތަށް ކަންތައް ކުރީ ރައީސް އިބްރާހީމް މުހައްމަދު ސޯލިހުގެ ރޭއްވެވުމަކުންނެވެ. އެއީ "ހީލަތްތެރި ރޭވުމެެއް" ކަމަށް ވެސް އެމަނިކުފާނު ސިފަކުރެއްވި އެވެ.
މަރުތަޅެއް އެޅުމަކީ ކުރިއަށް ދެވޭނެ އެއްވެސް ގޮތެއް ނޯންނަ ހާލަތަކަށް އައުމެވެ. މަޖިލީހުގައި އެހާލަތު އުފެދުނު ގޮތް ނަޝީދު ތަފްސީލުކޮށް ނުދެއްވިޔަސް، މަޖިލީހުގެ ނައިބު ރައީސް އީވާ އަބްދުﷲ ވަނީ ސޯޝަލް މީޑިއާގައި އެކަން ތަފްސީލުކުރައްވައިފަ އެވެ.
"މެޖޯރިޓީ ލީޑަރު ވިދާޅުވަނީ އިތުބާރު ނެތްކަމުގެ މައްސަލައެއް އޮއްވާ މަޖިލީހުގެ ރައީސަކަށް ރިޔާސަތެއް ނުބެލެހެއްޓޭނެކަމަށް. ދެން ވިދާޅުވަނީ ނައިބުރައީސްގެ މައްސަލަ ނުނިންމައި ކުރިއަކަށް ނުދެވޭނޭ. މަޖިލީހުގެ ގަވައިދުގައި ބުނަނީ ނައިބު ރައީސްގެ އިތުބާރު ނެތްކަމަށް ހުށަހަޅާ މައްސަލައެއް ކުރިއަށް ދާއިރު ރިޔާސަތު ބެލެހެއްޓެވޭނީ ރައީސަށޭ،" އީވާ ވިދާޅުވި އެވެ.
އެއީ ރިޔާސީ އިންތިހާބަށް އެންމެ ތިން މަހަށް ވެފައި ވާއިރު ސަރުކާރުން ރާވައިގެން ކުރާ ކަމެއް ކަމަށް ވެސް އޭނާ ތުމަތުކުރެއްވި އެވެ.
މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުން މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ އިތުބާރުގެ މައްސަލައެއް ހުށަހަޅައި ނޯޓިސް ހަމަވެފައި ވަނިކޮށް އެހެން ކަމެއް ކުރިއަށް ގެންދަން މަޖިލީހުގެ ގަވައިދު ތަންނުދޭ ކަމަށެވެ. އީވާ ވަކިކުރަން ހުށަހެޅި މައްސަލައިގެ ނޯޓިސް އަންނަ ހޯމަ ދުވަހު ހަމަވާނެ ކަަމަށް ވެސް އޭނާ ވިދާޅުވި އެެވެ.
"ރައްޔިތުންގެ މަޖިލީހުގެ ގަވައިދުގެ 205 ވަނަ މާއްދާގެ (ރ) ގައި ވާ ގޮތުން ރައްޔިތުންގެ މަޖިލީހުގައި އިތުރު އެއްވެސް ކަމަކާ ބަހުސް ކުރެވޭނީ މަޖިލީހުގެ ރައީސްގެ ނުވަތަ ނައިބުރައީސްގެ މައްސަލައެއް ހުށަހެޅި ނޯޓިސް ދެވި، ނޯޓިސްގެ މުއްދަތު ހަމަވެފައި ވާ ނަމަ އެއްވެސް މަަސައްކަތެއް ކުރިއަށް ގެންދެވޭނީ އެ މައްސަލާގައި ގޮތެއް ނިންމުމަށް ފަހު،" އަސްލަމް ވިދާޅުވި އެވެ.
ރައްޔިތުންގެ މަޖިލީހުގެ ގަވައިދުގައި އެގޮތަށް އެކަން އޮތް ނަމަވެސް އެ މައްސަލަ ކުރިއަށް ނުގެންދަން ރިޔާސަތުން ނިންމަވައިފާނެ ކަމަށާއި އެހާލަތުގައި އެމްޑީޕީން ކަންތައްކުރާނީ ކިހިނެތްތޯ ނޫސްވެރިއަކު ސުވާލުކުރުމުން އަސްލަމް ވިދާޅުވީ ގާނޫނާ އެއްގޮތަށް ކަންތައް ކުރަން ހުރިހާ ބޭފުޅުންނަށް ވެސް އިލްތިމާސްކުރައްވާ ކަމަށެވެ.
"ހިތް އެދޭ ގޮތަށް، ބައެއް ބޭފުޅުންނަކީ ގާނޫނުތައް މާނަކުރައްވާ ބޭފުޅުން، އަދި ބައެއް ބޭފުޅުންނަކީ ގާނޫނަށް އެހައި ބޮޑަށް ބައްލަވައިލެއްވުމެއް ނެތި ގާނޫނާ ދުރަށް ޖެހިވަޑައިގަންނަވާ ބޭފުޅުން. ދެން އެފަދަ ބޭފުޅުންނަށް، އެބޭފުޅުން ގާނޫނުން ބޭރުވާނީ ކިހާ މިންވަރަކަށްކަން އެނގިވަޑައިގަންނަވާނީ،" އަސްލަމް ވިދާޅުވި އެވެ.
އިިލްތިމާސަކީ ހުރިހާ ބޭފުޅުން ވެސް ގާނޫނުގެ އިމުގެ ތެރެއަށް ވެދެވަޑައިގެން ގާނޫނީ ހުކޫމަތެއް ހިނގާތަން ދެއްކެވުން ކަމަށް ވެސް އޭނާ ވިދާޅުވި އެވެ.
