ގދ. ގައްދޫ މެޖިސްޓްރޭޓު ކޯޓުގެ އިސް މެޖިސްޓްރޭޓުކަމުގެ މަގާމުގައި ކުރިން ހުންނެވި، މުހައްމަދު ޝަނީޒް އަބްދުﷲ މިއަދު ހައި ކޯޓުގެ ފަނޑިޔާރުކަމަށް އައްޔަންކޮށްފި އެވެ.
ހައި ކޯޓުގެ ބެންޗުން ދެ މަގާާމެއް ހުސްވީ، އެ ކޯޓުގެ އިސް ފަނޑިޔާރުކަން ކުރެއްވި ހާތިފް ހިލްމީ އާއި ފަނޑިޔާރު ޝުއައިބު ހުސެއިން ޒަކަރިއްޔާ އާއި ރިޓަޔާ ކުރެއްވުމުންނެވެ.
އޭގެ ތެރެއިން އެއް މަގާމަށް މީގެ ކުރިން ބޭފުޅަކު އައްޔަންކޮށްފައިވާއިރު، މިއަދު ޝަނީޒް އެ ކޯޓަށް އައްޔަން ކުރުމުން ބެންޗު މިހާރު ވަނީ ފުރިހަމަވެފަ އެވެ. އޭނާ އައްޔަން ކުރަން ނިންމީ، މެއި 24، ގައި ބޭއްވި ޖުޑިޝަލް ސާވިސް ކޮމިޝަން (ޖޭއެސްސީ) ގެ ބައްދަލުވުމުގަ އެވެ.
އޭނާ އަކީ ކޮލެޖް އޮފް އިސްލާމިކް ސްޓަޑީޒްއިން ބެޗެލާސް އިން ޝަރީއާ އެންޑް ލޯ އަދި ވިލާ ކޮލެޖުން މާސްޓާސް އޮފް ޝަރީއާ އެންޑް ލޯ ހާސިލުކުރައްވައިފަ އެވެ. އޭނާ ވަނީ ފާއިތުވި ނުވަ އަހަރު ޝަރުއީ ދާއިރާއަށް ހިދުމަތްކުރައްވައިފަ އެވެ.
ޝަނީޒްގެ އިތުރުން ދެން އެ މަގާމަށް ކުރިމަތިލެއްވީ:
- މަރްޔަމް ވަހީދު, ބެލޫން, ސ.ފޭދޫ
- އަލީ އަހްމަދު, ބިއްދޮށުގެ, ފ.ނިލަންދޫ
- މުހައްމަދު މިންހާޖް, ހިރިލަންދޫގެ, ސ.ފޭދޫ
އެ ދެ މަގާމުގެ ތެރެއިން މަގާމަކަށް ފަނޑިޔާރަކު ހޮވަން އިއުލާނު ކުރުމުން ކުރިމަތިލި ބޭފުޅުންގެ ތެރެއިން މީގެ ކުރިން އައްޔަންކޮށްފައި ވަނީ ކްރިމިނަލް ކޯޓުގެ އިސް ގާޒީ ކަމުގައި ހުންނެވި އަހުމަދު ޝަކީލެވެ.
ޝަކީލަކީ ވ. އާރަށް ވިއްކާލި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ސާބިތުވި މަނީލޯންޑަރިން އަދި ރިޝްވަތު ހިފުމުގެ މައްސަލަ ބެއްލެވި ގާޒީ އެވެ.
ފަނޑިޔާރުން އައްޔަން ކުރުމަށް މިއަދު ޖޭއެސްސީއިން ބޭއްވި ރަސްމިއްޔާތުގައި ކްރިމިނަލް ކޯޓަށް އާއިޝަތު ނުޒުހާ އަދި ގއ. ވިލިނގިލީ ކޯޓަށް އައިޝަތު ޝިހާބު ވެސް އައްޔަންކޮށްފައިވެ އެވެ.
