ޕެރިސް (ޖޫން 8) - އަލުން ބާސެލޯނާއާ ގުޅެން އެ ޓީމުގެ އެކި ފަރާތްތަކާ ވާހަކަ ދައްކައި، އެ ގޮތަށް އެކަން ކުރަން ބޭނުންވި ނަމަވެސް ބާސެލޯނާގެ މާލީ ހާލަތު އޮތްގޮތުން އެ ކްލަބާ ގުޅެން ބޭނުމެއްނުވި ކަމަށް އެމެރިކާ ލީގުގެ އިންޓަ މިއާމީ އަށް ބަދަލުވާން ނިންމި ލިއޮނަލް މެސީ ބުނެފި އެވެ.
ޕީއެސްޖީ އަށް މިދިޔަ ދެ އަހަރު ކުޅެދިނުމަށް ފަހު، އެ ކްލަބްގެ ކޮންޓްރެކްޓް ފުރިހަމަކޮށް، މެސީ، 35، މިހާރު މިސްރާބު ޖަހާފައި މިވަނީ ސީނިއާ ކެރިއަރުގައި ފުރަތަމަ ފަހަރަށް ޔޫރަޕުން ބޭރުގެ ޓީމަކަށް ކުޅުމަށް ކަމަށެވެ. ހަތް ފަހަރު ބެލޮންޑިއޯ ހޯދާފައިވާ މެސީ ދެން ފެންނާނީ މަޝްހޫރު ފުޓްބޯޅަ ތަރި، ޑޭވިޑް ބެކަމްގެ ހިއްސާ އޮންނަ އިންޓަ މިއާމީންނެވެ.
އިންޓަ މިއާމީ އަށް ބަދަލުވާން ނިންމި ނިންމުމާ ގުޅޭގޮތުން ވާހަކަ ދައްކަމުން މެސީ ބުނީ ޔޫރަޕުން އޭނާ އަށް ގިނަ އޮފާތަކެއް ލިބުނު ކަމަށާއި ބާސެލޯނާ އަށް އޮތް އިހުތިރާމެއްގެ ސަބަބުން ޔޫރަޕްގެ އެހެން ޓީމަކަށް ދެން ދާން ބޭނުންނުވީ ކަމަށެވެ.
ބާސެލޯނާ އަށް ދިއުމަށް އޮތް ހުރަހަކަށްވީ އެ ކްލަބަށް ދިމާވެފައި އޮތް މާލީ ހާލަތް ކަމަށް ދޭހަވާ ގޮތަށް މެސީ ވަނީ ވާހަކަ ދައްކައިފަ އެވެ.
"އަހަންނަށް އަޑު އިވުނު އެ މީހުން (ބާސެލޯނާ) ޖެހޭނީ ކުޅުންތެރިންތަކެއް ވިއްކާލަން ނޫނީ ގިނަ ކުޅުންތެރިންތަކެއްގެ މުސާރަ ބޮޑުކުރަން ކަމަށް (އަހަރެންގެ ޑީލް ނިންމަންޏާ). އެ ގޮތަށް އެކަން ކުރަން އަހަރެން ބޭނުމެއް ނޫން. އަހަރެން ކްލަބް ދޫކޮށްލިއިރު ވެފައި ހުރި ގޮތްތައް އަލުން ތަކުރާރުވާން ނޭދެން، ވާނެ ގޮތެއް ބަލައި އިންތިޒާރެއްގައި މި ކަހަލަ ކަންކަމުގައި ހުރުން ވެސް ރަނގަޅެއް ނޫން،" މީގެ ދެ އަހަރު ކުރިން، މާލީ ހާލަތު ގޯސްވެ، ކޮންޓްރެކްޓް އާ ނުކުރެވިގެން ބާސެލޯނާ ދޫކޮށްލަން ޖެހުނު ގޮތަށް އިޝާރާތް ކޮށް މެސީ ބުންޏެވެ.
މި މަހު 36 އަހަރު ފުރޭ މެސީ ބުނީ ފައިސާ އަށް ކްލަބް ބަދަލުކުރާނަމަ މި ފަހަރު އޭނާ ބަދަލުވާނީ ސައުދީ އަރަބިއްޔާގެ ޓީމަކަށް ކަމަށެވެ. ސައުދީ އަރަބިއްޔާގެ އަލް ހިލާލް އިން މެސީ އަށް 500 މިިލިއަން ޑޮލަރުގެ އަގުހުރި ކޮންޓްރެކްޓެއް ހުށަހަޅާފައިވެ އެވެ. އެކަމަކު، މެސީ އެ އަށް އެއްބަހެއްނުވެ އެވެ.
އަނެއްކޮޅުން، ބާސެލޯނާ އިން މެސީ އަލުން އެ ޓީމަށް ގެންދަންކުރި މަސައްކަތުގައި އެއްވެސް އިރެއްގައި ކޮންޓްރެކްޓް ޕްރޮޕޯސަލެއް ރަސްމީ ސިފައެއްގައި ނާންނަ ކަމަށް މެސީ ވަނީ ބުނެފަ އެވެ.
އެ ގޮތުން، އަލުން ބާސެލޯނާ އަށް ދިއުމަށް އެ ޓީމުގެ ކޯޗު ޒަވީ ހެނާންޑޭޒް އާއި ރައީސް ޖޮއާން ލަޕޯޓާއާ ވާހަކަ ދެެކެވުނުއިރު، ކޮންޓްރެކްޓެއްގެ ވާހަކަ ސީދާކޮށް ނުދެކެވޭ ކަަމަށް ވެސް މެސީ ބުނެފައިވެ އެވެ. އޭގެ އިތުރުން، އޭނާ އަލުން ބާސެލޯނާ އަށް ދިއުމާ މެދު ހިތްހަމަނުޖެހޭ ފަރާތްތަކެއް ވެސް އެ ކްލަބްގައި ހުރިކަން މެސީގެ ވާހަކައިގައި ވަނީ ފާހަގަކޮށްފަ އެވެ.
މެސީ، އިންޓަ މިއާމީ އަށް ބަދަލުވާން ނިންމިކަން އިއުލާނުކުރިތާ މާ ގިނައިރެއްނުވެ، ބާސެލޯނާ އިން ނެރުނު ބަޔާނުގައި ބުނެފައިވަނީ ބާސެލޯނާގެ ރައީސް ލަޕޯޓާ، އަށް މެސީގެ ނިންމުން ގަބޫލުކުރެވޭ ކަމަށާއި އެ ގޮތަށް ނިންމި އެންމެ ބޮޑު ސަބަބަކީ އެހާ ވާދަވެރި ނޫން ލީގެއްގައި ޕްރެޝަރު މާހައުލުން ބޭރުގައި މެސީ ފުޓްބޯޅަ ކެރިއަރުގެ ދެން އޮތް ބައި ކުރިއަށް ގެންދަން ބޭނުންވުން ކަމަށެެވެ.
ކެރިއަރުގެ މިހާ ހިސާބުން މެސީ ވިސްނުމަކީ އާއިލާ އަށް ވަގުތު ދެވޭ ގޮތަށް ކަންކަން ރޭވުން ކަމަށް ވެސް ވަނީ ބުނެފަ އެވެ.
