ރިޔާދް، ސައުދީ އަރަބިއްޔާ (ޖޫން 7) - ގަލްފްގެ އެކުވެރި ގައުމުތަކާ އެކު ގުޅުން ވަރުގަަދަ ކުރަން އެމެރިކާއިން ބޭނުންވާ ކަމަށް އެ ގައުމުގެ ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވެއްޖެ އެވެ.
ބްލިންކެން އެގޮތަށް ވިދާޅުވީ ސައުދީ އަރަބިއްޔާއަށް ކުރައްވަމުންދާ ދަތުރުގެ ތެރެއިން ގަލްފް ގައުމުތަކުގެ ޑިޕްލޮމެޓުންނާ އެކު ގަލްފް ކޯޕޮރޭޝަން ކައުންސިލް ބައްދަލުވުމުގަ އެވެ.
އޭގެ ކުރިން ބްލިންކެން ވަނީ ސައުދީ ފޮރިން މިނިސްޓަރު އަމީރު ފައިސަލް ބިން ފަރްހާން އާއި ވަލީ އަހުދު އަމީރު މުހައްމަދު ބިން ސަލްމާންއާ ބައްދަލުކުރައްވައިފަ އެވެ.
"އެމެރިކާއިން މި ސަރަހައްދަށް މި އައީ ތި ގައުމުތަކާ އެކު ގުޅުން ވަރުގަދަ ކުރަން ފުންކޮށް އިންވެސްޓުކޮށްގެން ތިބިކަން އަންގައިދޭން،" ބްލިންކެން ވިދާޅުވި އެވެ.
ބްލިންކެން ސައުދީއަށް ދަތުރުކުރައްވާ އިރު، ދެ ގައުމުގެ ގުޅުން މި ވަގުތު އޮތީ ނުތަނަވަސްކަމެއްގަ އެވެ. އެއީ ޗައިނާ އާއި ރަޝިއާއާ އެކު އޮންނަ ގުޅުން ސައުދީއިން ފުޅާ ކުރަމުން ދާތީ އެވެ.
އޭގެ އިތުރުން ސައުދީ އާއި އިރާނުގެ ގުޅުން ރަނގަޅުވުމަކީ ވެސް އެމެރިކާއިން ކަންބޮޑުވާނެ ކަމެކެވެ. ހަތް އަހަރަށް ފަހު ރިޔާދްގައި އިރާންގެ އެމްބަސީ ހުޅުވީ ބްލިންކެން ދަތުރު ފެއްޓެވި ދުވަހު އެވެ.
ހަމަ އެ ދުވަހު ވެނެޒުއޭލާގެ ރައީސް ނިކޮލަސް މަޑޫރޯ ވެސް ވަލީ އަހުދާ ބައްދަލުކުރެއްވި އެވެ. މަޑޫރޯއަކީ އެމެރިކާއާ ގުޅުން ގޯސް ލީޑަރެކެވެ.
މިދިޔަ މަހު ޖިއްދާގައި އޮތް އަރަބި ލީގު ސަމިޓަށް 12 އަހަރަށް ފަހު ސީރިއާގެ ރައީސް ބައްޝާރުލް އަސަދަށް ދައުވަތު ދިނުމުން ވެސް އެމެރިކާއިން ނުރުހުން ފާޅުކުރި އެވެ.
