ވޮޝިންޓަން، އެމެރިކާ (ޖޫން 7) - އެމެރިކާގެ ރިޔާސީ އިންތިހާބުގައި ވާދަކުރަން ނިންމަވައި ކުރީގެ ނައިބު ރައީސް މައިކް ޕެންސް ކެމްޕެއިން ފައްޓަވައިފި އެވެ.
ޕެންސް ވާދަކުރައްވަން ޖެހޭނީ ރިޕަބްލިކަން ޕާޓީގެ ޓިކެޓަށް ކުރީގެ ރައީސް ޑޮނަލްޑް ޓްރަމްޕްއާ ދެކޮޅަށެވެ. ރިޔާސީ އިންތިހާބު އޮންނާނީ 2024 ގަ އެވެ.
ޕެންސް އާއި ޓްރަމްޕްގެ އިތުރުން ވެސް ބައެއް ބޭފުޅުން ވަނީ ޓިކެޓަށް ވާދަކުރަަން ނިންމައިފަ އެވެ. އޭގެ ތެރޭގައި ފްލޯރިޑާގެ ގަވަރުނަރު ރޮން ޑެސާންޓިސް ހިމެނެ އެވެ.
އުމުރުން 64 އަހަރުގެ ޕެންސަކީ ޓްރަމްޕްގެ ނައިބު ރައީސްގެ މަގާމު ފުރުއްވި ބޭފުޅެކެވެ. ޕެންސް މަގްބޫލުވީ ޓްރަމްޕަށް ވަފާތެރި ބޭފުޅެއްގެ ގޮތުގަ އެވެ.
އެހެން ނަމަވެސް 2020 ގެ ރިޔާސީ އިންތިހާބުގެ ނަތީޖާއާ ދެކޮޅަށް ޓްރަމްޕް މަސައްކަތް ފެއްޓެވުމުން، ޕެންސް އެމަނިކުފާނާ ދުރަށް ޖެހިވަޑައިގެންނެވި އެވެ.
ޓްރަމްޕް އާއި ޕެންސް އަދި ޑެސާންޓިސްގެ އިތުރުން ރިޕަބްލިކަން ޕާޓީގެ ޓިކެޓަށް ވާދަކުރަނީ ނިއު ޖާޒީގެ ކުރީގެ ގަވަރުނަރު ކްރިސް ކްރިސްޓީ، ކުރީގެ ގަވަރުނަރުން ނިކީ ހޭލީ އަދި އާސާ ހަޗިންސަން އެވެ.
ހިޔާލު ހޯދުމުގެ ވޯޓުތަކުން ދައްކާ ގޮތުގައި އެހެން ހުރިހާ ކެންޑިޑޭޓުންނަށް ވުރެ ކުރީގައި އުޅުއްވަނީ ޓްރަމްޕެވެ. ޓްރަމްޕްއާ އެންމެ ގާތްކޮށް ވާދަކުރަނީ ޑެސާންޓިސް އެވެ.
