ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމާ މެދު އެމްޑީޕީގެ ޕާލަމެންޓްރީ ގްރޫޕްގައި ނެގި ވޯޓުގައި އެގޮތަށް ފާސްކުރަން ފެނިވަޑައިނުގަންނަވާ ކަމަށް ފަސް މެމްބަރަކު ވޯޓު ދެއްވައިފި އެވެ.
އެމްޑީޕީގެ ޕާލަމެންޓްރީ ގްރޫޕުން ރައްޔިތުންގެ މަޖިލީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ ގްރޫޕްގެ ލީޑަރު އަދި ހިތަދޫ އުތުުރު ދާއިރާގެ މެމްބަރު މުހައްމަދު އަސްލަމް ވިދާޅުވީ މިއަދުގެ ވޯޓުގައި ބައިވެރިވެވަޑައިގެންނެވީ 41 މެމްބަރުން ކަމަށާއި އެގޮތަށް ފާސްކުރަން ފެނިވަޑައިނުގަންނަވާ ކަމަށް ވޯޓް ދެއްވީ ފަސް މެމްބަރަކު ކަމަށެވެ. އެހެން ނަމަވެސް އެއީ ކޮން ކޮން މެމްބަރުންނެއް ކަން އޭނާ ހާމައެއް ނުކުރައްވަ އެވެ.
އެކަމާ ބެހޭ ގޮތުން ނޫސްވެރިއަކު ކުރި ސުވާލަކަށް ދެއްވި ޖަވާބުގައި ވިދާޅުވީ އެ މެމްބަރުންގެ ނަންތައް ވިދާޅުވާން ދަތި ކަމަށެވެ.
ވޯޓް ނުދެއްވި މެމްބަރުންނަށް ފިޔަވަޅެއް އަޅާނަންތޯ "އަދަދު"ން ސުވާލުކުރުމުން އަސްލަމް ވިދާޅުވީ ވޯޓް ނުދެއްވި މެމްބަރުން ވެސް ތިއްބެވީ ނަޝީދު ވަކިކުރުމުގެ މައްސަލަ ކުރިއަށް ނުގެންދަވާ ގޮތަށް ނޫން ކަމަށެވެ.
"އެބޭފުޅުން ވެސް އެކަން ކުރިއަށް ނުގެންދެވުމަކަށް ނޫން އެހެން ނަމަވެސް އަޅުގަނޑުމެންގެ މަޝްވަރާގެ އެހެން މަރުހަލާތަކެއްގެ ވާހަކަ އެ ބޭފުޅުން ދެއްކެވީ،" އަސްލަމް ވިދާޅުވި އެވެ.
ނަޝީދު ވަކިކުރުމާ މެދު ގޮތެއް ނިންމަން އެމްޑީޕީގެ ޕީޖީ ގްރޫޕުން ބޭއްވި ބައްދަލުވުމަށް ވަޑައިގެންނެވީ 42 މެމްބަރުން ކަމަށް ވާތީ، އެ ބައްދަލުވުމަށް ވަޑައިނުގެންނެވި މެމްބަރުންގެ އަދަދަކީ 14 އެވެ. ޕީޖީ ބައްދަލުވުމުގެ ރިޔާސަތުން އެ ވޯޓުގައި ބައިވެރިވެފައި ނުވެ އެވެ.
