ރައްޔިތުންގެ މަޖިލީހުގެ މިއަދުގެ ޖަލްސާ މަޖިލީހުގެ ރައީސް މުހައްމަދު ނަޝީދު ކުރިއަށް ގެންދެވި ގޮތާއި މެދު މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުގެ ގިނަ ޝަކުވާތަކެއް އެބަހުރި ކަމަށް އެ ގްރޫޕުން ބުނެފި އެވެ.
އެޓާނީ ޖެނެރަލް އިބްރާހީމް ރިފްއަތުގެ އިތުބާރުނެތް ކަމަށް ކަނޑައަޅަން މަޖިލީހަށް ހުށަހެޅި މައްސަލައިގެ ބަހުސް މިއަދު ހުއްޓައިލީ މަޖިލީހުގެ ތަޅުމުގައި މެމްބަރުން އަޑުގަދަކުރައްވައި ނިޒާމު ގެއްލުވައިލުމުންނެވެ.
ޖަލްސާ ކުއްލިއަކަށް ނިންމައިލުމުން އެމްޑީޕީގެ ޕާލަމެންޓްރީ ގްރޫޕުން މަޖިލީހުގެ އިދާރާގައި ބޭއްވި މީޑިއާ ބްރީފިން އެއްގައި އެ ގްރޫޕްގެ ތަރުޖަމާނު، ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު ވިދާޅުވީ މިއަދުގެ ޖަލްސާގައި ރިޔާސަތުން އަމަލުކުރެއްވީ "ވަރަށް ހައިރާންކުރުވަނިވި ގޮތަކަށް" ކަމަށެވެ. އޭޖީގެ އިތުބާރު ނެތްކަމަށް ހުށަހެޅި މައްސަލައިގައި މަޖިލީހުގެ ރިޔާސަތުންނާއި އިިދިކޮޅު މެމްބަރުން ކަންތައް ކުރެއްވި ގޮތާ މެދުގައި ވެސް އެމްޑީޕީގެ މެމްބަރުންގެ ބޮޑެތި ކަންބޮޑުވުންތައް އެބަހުރި ކަމަށް ވެސް އޭނާ ވިދާޅުވި އެވެ.
"ޖަލްސާ ފެށިގެން ކުރިއަށް ދާން ފެށުމާ އެކީގައި އިދިކޮޅު ފަރާތްތަކުން، ހާއްސަ ގޮތެއްގައި ތިން މެމްބަރަކު ، ރިޔާސަތާ ވަރަށް ކައިރިއަށް އަދި ބަންޑާރަނައިބާ ވެސް ވަރަށް ކައިރިއަށް ވަޑައިގެން އެ ބޭފުޅުން އިހުތިޖާޖް ކުރައްވަމުން ގެންދިޔަ، އެހެން ނަމަވެސް ރިޔާސަތުން އެ ބޭފުޅުންނަށް އެއްވެސް އިންޒާރެއް ނުދެއްވާ،" މުހައްމަދު ވިދާޅުވި އެވެ.
އޭނާ ތުހުމަތުކުރެއްވި ގޮތުގައި އޭގެ ބަދަލުގައި ރިޔާސަތުން ހުއްޓުވީ އެމްޑީޕީގެ މެމްބަރުންގެ ވާހަކަތަކެވެ. މިއަދު މަޖިލީހުގެ ޖަލްސާ ހޫނުވި ވަގުތު އެމްޑީޕީގެ ބައެއް މެމްބަރުންގެ ނަން ރިޔާސަތުން އިއްވައި އެ މެމްބަރުންނަށް ނަސޭހަތް ދެއްވި އެވެ. މުހައްމަދު ވިދާޅުވީ އެމްޑީޕީގެ ހަތަރު މެމްބަރެއްގެ ނަން އިއްވި ނަމަވެސް ޖަލްސާއިން ބޭރު ނުކުރައްވާ ކަމަށެވެ.
"އެހެން ނަމަވެސް އަޅުގަނޑު ގަބޫލުކުރާ ގޮތުގައި އަދި އަޅުގަނޑުމެންގެ ޕާލަމެންޓްރީ ގްރޫޕް ގަބޫލުކުރާ ގޮތުގައި މިއޮތީ ވަރަށް ބޭ އިންސާފުން ރިޔާސަތުން ކަންތައްކުރައްވާފައި،" އޭނާ ވިދާޅުވި އެވެ.
ނަޝީދު ރިޔާސަތުން ދުރުކުރުމެއް އަދި ނެތް
މިއަދުގެ ޖަލްސާއާއި މަޖިލީހުގެ އެހެން ޖަލްސާ ތަކުގައި ވެސް މަޖިލީހުގެ ރައީސް މުހައްމަދު ނަޝީދު އަމަލުކުރައްވާ ގޮތާ މެދު އެމްޑީޕީގެ މެމްބަރުން ގެންދަވަނީ ކަންބޮޑުވުންތައް ފާޅުކުރައްވަމުންނެވެ. ނަޝީދަށް ތާއީދުކުރައްވާ މެމްބަރުން އެމްޑީޕީން ވަކިވެވަޑައިގެން އާ ޕާޓީއެއް އުފެއްދުމުގެ މަސައްކަތް ވެސް ގެންދަވަނީ ކުރައްވަމުންނެވެ.
އެކަން އެހެން އޮތް އިރު ނަޝީދު މަޖިލީހުގެ ރިޔާސަތުން ދުރު ނުކުރަނީ ކީއްވެތޯ ނޫސްވެރިއަކު ސުވާލުކުރުމުން މުހައްމަދު ވިދާޅުވީ އެމަނިކުފާނަކީ އެމްޑީޕީގެ ރައީސް ކަމަށާއި އެހެންވީމާ، މައްސަލަތަކެއް ތަކުރާރު ވިޔަސް، އެމަނިކުފާނުގެ އިތުބާރުނެތް ކަމުގެ މައްސަލައެއް "ޓަސްލާފައި" ނުވައްދަފާނެ ކަމަށެވެ.
"އެނގިވަޑައިގަންނަވާނެ ރިޔާސަތުގައި އެ އިންނެވީ އަޅުގަނޑުމެން ޕާޓީގެ ވެސް ރައީސް. އެހެންވީމާ އަޅުގަނޑުމެން އަދި ދިމާވާ މައްސަލަތަކެއް ދިމާވަމުން ދާއިރު ޓަސްލާފައި، ރައީސްގެ އިތުބާރުނެތް ކަމުގެ މައްސަލައެއް ކުރިއަށް ގެންގޮސްފާނެ،" މުހައްމަދު ވިދާޅުވި އެވެ.
އެހެން ނަމަވެސް ނަޝީދުގެ އިތުބާރު ނެތްކަމުގެ މައްސަލައެއް ވެއްދުމާ މެދު ފުންކޮށް ވިސްނަމުން ގެންދަވާ ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމްގެ ފަރާތްޕުޅުން އެނގިވަޑައިގެންފައިވާ ކަމަށް ވެސް މުހައްމަދު ވިދާޅުވި އެވެ.
