އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތް ކަަމަށް ކަނޑައަަޅަން ރައްޔިތުންގެ މަޖިލީހަށް ހުށަހެޅި މައްސަލަ މިއަދުގެ ޖަލްސާގައި ކުރިއަށް ގެންދަވާ ގޮތާ ހެދި މަޖިލީހުގެ މެޖޯރިޓީ އޮންނަ އެމްޑީޕީގެ މެމްބަރުންނާއި މަޖިލީހުގެ ރައީސް މުހައްމަދު ނަޝީދަށް މިއަދު ވަަރަށް ބޮޑަށް ފާޑުވިދާޅުވެއްޖެ އެވެ.
އިތުބާރުގެ މައްސަލާގައި މަޖިލީހަށް ޖަވާބުދާރީ ވެވަަޑައިގަންނަވަން އެޓާނީ އޭޖީ ރިފްއަތު މަޖިލީހަށް މިއަދު ވަޑައިގެންނެވި އެވެ. އެހެން ނަމަވެސް, ޖަލްސާ ފެށުމާ އެކު އިދިކޮޅު މެމްބަރުން އޭނާއާ ދެކޮޅަށް އަޑުއުފުއްލަވަން ފެށްޓެވުމުން މައްސަލަ ކުރިއަށް ނުގެންދެވި ގިނަ ވަގުތުތަކެއް ހޭދަވި އެވެ.
އެހެންވެ، އޭނާ މަޖިލީހަށް ޖަވާބު ދެއްވަން ފުރުސަތު ލިބިވަޑައިގެންނެވީ މަޖިލީހުގެ ސައިގަޑިއަށް ޖަލްސާ މެދުކަނޑައިލުމަށް ފަހު އަލުން ފެށުމުންނެވެ.
އެހިސާބުން ނިޒާމާ ބެހޭ މައްސަލަތައް ކަމަށް ވިދާޅުވެ ފުރުސަތު ހޯއްދަވައިގެން އިދިކޮޅު މެމްބަރުން ރިފްއަަތަށް ފާޑުވިދާޅުވާން ފެއްޓެވި އެވެ. ރައްޔިތުންގެ މަޖިލީހުގެ މެޖޯރިޓީ އޮންނަ އެމްޑީޕީ މެމްބަރުން ހަމަ އެގޮތަށް ފުރުސަތު ހޯއްދަވައިގެން އިދިކޮޅަށް ރައްދު ދެއްވަން ފެއްޓެވި އިރު ބައެއް މެމްބަރުން ފާޑުވިދާޅުވީ މަޖިލީހުގެ ރައީސް މުހައްމަދު ނަޝީދަށެވެ. އެމަނިކުފާނަށް އެންމެ ބޮޑަށް ފާޑުވިދާޅުވި އެއް މެމްބަރަކީ މަރަދޫ ދާއިރާގެ މެމްބަރު އިބްރާހީމް ޝަރީފެވެ.
"މި މަޖިލިސްގެ މެމްބަރުން ސުވާލު ކުރަންވީ ގޮތަކާއި ސުވާލު ނުކުރަންވީ ގޮތެއްގެ މަޝްވަރާއާ އަދި ހިނގަމުންދާ މައްސަލައާ މެދު ހިޔާލުފާޅުކުރުމަކީ މަޖިލީހުގެ ރިޔާސަތަށް މަޖިލީހުގެ ގަވައިދު ހުއްދަކޮށްފައި އޮތް ކަމެއް ނޫން. މަޖިލީހުގެ ރިޔާސަތުން ތިޔަ އަމަލުކުރައްވަނީ ހަމަ މުތުލަގަށް މަޖިލީހުގެ ގަވައިދާ ހިލާފަށް," އޭނާ ވިދާޅުވި އެވެ.
ނަޝީދު ވިދާޅުވީ ޝަރީފު ނެންގެވި ނުކުތާއަކީ ނިޒާމާ ބެހޭ މައްސަލައެއް ކަަމަށް ނުބައްލަވާ ކަމަށާއި ރިޔާސަތުން އަމަލުކުރަނީ ގަވައިދާ އެއްގޮތަށް ކަމަށެވެ.
ނަޝީދުގެ ދިފާއުގައި މެދު ހެންވޭރު ދާއިރާގެ މެމްބަރު އަލީ އާޒިމް ތެދުވެވަޑައިގެން ވިދާޅުވީ އެމަނިކުފާނު އަމަލުކުރައްވަމުން ގެންދަވަނީ ގަވައިދާ ހިލާފަށް ކަަމަަށް އެމްޑީޕީގެ މެމްބަރުން ތަކުރާރުކޮށް ވިދާޅުވާ އިރު މަޖިލީހުގެ މެޖޯރިޓީ އޮތީ އެ ޕާޓީއަށް ކަަމަށެވެ.
"މަޖިލީހުގެ ރައީސް ކީއްވެތޯ ތިޔަ ގޮނޑިކޮޅުގައި ބައިންދައިގެން އެ ތިއްބަވަނީ. ގަވައިދާ ހިލާފަށް ކުރާ ކަމަށް ވެއްޖެއްޔާ އެކަން މިތަނަށް ހުށަހަޅައިގެން ކުރިއަށް ގެންދަންވީނުންތޯ؟" އާޒިމް ވިދާޅުވި އެވެ.
ނަޝީދު ވިދާޅުވީ މަޖިލީހުގެ މެމްބަރުންގެ ފުރިހަމަ އިތުބާރު އެމަނިކުފާނަށް އެބަ އޮތް ކަމަށެވެ. އެހެން ވިދާޅުވުމުން އެމަނިކުފާނަށް ރައްދު ދެއްވައި ކެނދިކުޅުދޫ ދާއިރާގެ މެމްބަރު އަހުމަދު އީސާ ވިދާޅުވީ އެމަނިކުފާނަށް މިހާރު ތާއީދު ނުކުރައްވާ ކަމަށެވެ.
"އިއްޒަތްތެރި ރައީސް އަޅުގަނޑު ހަމަ ރެކޯޑަށް ޓަކައި ދަންނަވައިލަން މަޖިލީހުގެ ގަވައިދާ ހިލާފަށް ރައްޔިތުންގެ މަޖިލީހުގެ ޖަލްސާއެއް ރިޔާސަތުން ގެންދަވާތީ ރިޔާސަތަށް އަޅުގަނޑުގެ ތާއީދެއް ނެތް،" އީސަ ވިދާޅުވި އެވެ.
ނަޝީދު ވިދާޅުވީ ކެނދިކުޅުދޫ ދާއިރާގެ މެމްބަރު އެހެން ވިދާޅުވީމާ ވަރަށް ހިތާމަފުޅު ކުރައްވާ ކަމަށެވެ.
"ވަރަށް ހިތާމަކުރަން ތިޔަ މައްސަލައިގައި. ކެނދިކުޅުދޫ ދާއިރާގެ މެމްބަރު ތިޔަހެން ވިދާޅުވީމާ ވަރަށް ހިތާމަކުރަން،" ހިނިފުޅު ވަޑުވަމުން ނަޝީދު ވިދާޅުވި އެވެ.
އެމަނިކުފާނު ވިދާޅުވީ އީސަ އެގޮތުގައި ހުންނަވާނެ ކަމަށް ގަބޫލުނުކުރައްވާ ކަމަށާއި އެކަމާ ދާއިރާގެ ރައްޔިތުންނާ މަޝްވަރާ ކުރައްވާނެ ކަމަށް ވެސް ދެކެވަޑައިގަންނަވާ ކަމަށެވެ.
"ކޮންމެވެސް އެހެން ސަބަބަކަށްޓަކައި އިއްޒަތްތެރި މެމްބަރު ދެންމެ ތިޔަ ވިދާޅުވި ވާހަކަ ތިޔަ ވިދާޅުވީ. އަޅުގަނޑު އެއްގޮތަކަށް ވެސް އިއްޒަތްތެރި މެމްބަރު ތިޔަ ވިދާޅުވި ވާހަކަ ގަބޫލެއް ނުކުރަން،" ނަޝީދު ވިދާޅުވި އެވެ.
ރައީސް އިބްރާހީމް މުހައްމަދު ސޯލިހަށް ތާއީދުކުރައްވާ މެމްބަރުންނާއި ނަޝީދަށް ތާއީދުކުރައްވާ މެމްބަރުން ދެބައިވުމުގެ ކުރިން އީސައަކީ ނަޝީދާ ވަރަށް އަރިސްކޮށް އުޅުއްވި ބޭފުޅެކެވެ.
