ރައީސް އިބްރާހިމް މުހައްމަދު ސޯލިހު މިއަދު އައްޑޫ ހުޅުމީދުއަށް ކުރެއްވި ދަތުރުފުޅުގެ ތެރެއިން، މީދޫ ދާއިރާގެ ޕީޕީއެމްގެ އިސް ހިދުމަތްތެރިއެއް ކަމަށްވާ މުހައްމަދު އިބްރާހިމް ދީދީ (ބޭބެ) މިއަދު އެމްޑީޕީއަށް ސޮއިކުރައްވައިފި އެވެ.
އިބްރާހިމް ދީދީ އެމްޑީޕީއަށް ސޮއިކުރެއްވީ މިއަދު މީދޫ ޝަމްސުއްދީން ސްކޫލުގައި ރައީސް ސޯލިހު ރައްޔިތުންނާއެކު ބޭއްވި ބައްދަލުވުމުގެ ތެރެއިންނެވެ.
އެމްޑީޕީއަށް ސޮއި ކުރެއްވުމަށްފަހު، އިބްރާހިމް ދީދީ މީޑިއާތަކަށް ވިދާޅުވީ، އޭނާއަކީ ޕީޕީއެމް އުފެދުނީއްސުރެ އެ ޕާޓީގެ ހަރަކާތްތައް އިންތިޒާމު ކުރުން ފަދަ އެކި ހިދުމަތްތައް ކުރަމުން އައި މީހެއް ކަމަށެވެ.
އެކަމަކު، ޕާޓީއަށް ޓަކައި އޭނާ ވި ގުރުބާނީ މިއަދު ޕީޕީއެމްގެ އިސް ބޭފުޅުން ހަނދާނެއް ނެތް ކަމަށް ވިދާޅުވި އެވެ. އަދި, އޭނާގެ މަސައްކަތްތައް ބަލައިގެންފައި ވެސް ނުވާ ކަމަށް ވިދާޅުވި އެވެ.
އެއާ ހިލާފަށް ރައީސް ސޯލިހަކީ ރައްޔިތުންނާ ވަރަށް ގާތް ގުޅުމެއް ގެންގުޅުއްވާ ބޭފުޅެއް ކަމަށް މުހައްމަދު އިބްރާހިމް ވިދާޅުވި އެވެ. އަދި, އެމަނިކުފާނުގެ ސަރުކާރުގައި ރާއްޖޭގެ ކުޑަ ރަށެއް ބޮޑު ރަށެއް ތަފާތުކުރުމެއް ނެތި ތަރައްގީގެ މަޝްރޫއުތައް ހިންގަމުންދާ ކަމަށް ވިދާޅުވި އެވެ.
އައްޑޫގައި ސަރުކާރުން ފެށި ބިން ހިއްކުމުގެ މަޝްރޫއާއި ގަން އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއަކީ ވަރަށް މުހިންމު މަޝްރޫއުތަކެއް ކަމަށް ވެސް އޭނާ ވިދާޅުވި އެވެ. އަދިm މުސްތަގުބަލުގައި އެކަމުން އަތޮޅަށް ވަރަށް ބޮޑެތި ފައިދާތަކެއް ކުރާނެ ކަމަށް ވިދާޅުވި އެވެ.
އިބްރާހިމް ދީދީ މިއަދު ވިދާޅުވި ގޮތުގައި، އޭނާއާއެކު އެމްޑީޕީއަށް 50 އެއްހާ މީހުން ސޮއި ކުރާނެ އެވެ.
