އެމެރިކާގެ އެކި އިދާރާތަކުގެ ރަސްމީ ވެބްސައިޓްތަކުގައި، ހެކްކޮށްދިނުމުގެ އިސްތިހާރުތަކެއް ސްކޭމަރުން އާންމުކޮށްފި އެވެ.
އެމެރިކާގެ ސްޓޭޓްތައް، ކައުންޓީ، ލޯކަލް ގަވަމަންޓްތައް އަދި ޔުނިވާސިޓީތަކުގެ ވެބްސައިޓްތަކުގައި އާންމުކޮށްފައިވާ އިސްތިހާރުތަކުގައިވަނީ ހެކްކޮށްދިނުމުގެ ހިދުމަތްދޭ ކަމަށް ބުނެފަ އެވެ. މި އިސްތިހާރުތަކަކީ ޑޮޓް ޖީއޯވީ ވެބްސައިޓްތަކަށް އަޕްލޯޑްކުރި ޕީޑީއެފް ފައިލްތަކެއްގައި ހުރި އިސްތިހާރުތަކެކެވެ. ސްކޭމަރުން ވަނީ މިފަދަ އިސްތިހާރު ޑޮޓް އެޑިއު އެތައް ވެބްސައިޓަކަށް ވެސް އަޕްލޯޑްކޮށްފަ އެވެ.
މި ވެބްސައިޓްތަކުގެ އިތުރުން، ސްޕެއިންސް ރެޑް ކްރޮސް، ރޮކްވެލް ކޮލިންސް ނަމަކަށް ކިޔާ ކުންފުންޏެއް އަދި އަޔަލެންޑްއަށް ނިސްބަތްވާ ޓޫރިސްމް ކުންފުންޏެއްގެ ވެބްސައިޓަށް ވެސް ވަނީ އިސްތިހާރުތައް އަޕްލޯޑްކޮށްފަ އެވެ.
އަޕްލޯޑްކޮށްފައިވާ ޕީޑީއެފްތަކުގައި ވަނީ ބައިވަރު ވެބްސައިޓް ލިންކްތަކެކެވެ. މި ވެބްސައިޓްތަކުގައި ވަނީ ހެކްކޮށްދޭ އެކި އެއްޗެހި އާންމުކޮށްފަ އެވެ. އެގޮތުން އިންސްޓަގްރާމް، ފޭސްބުކް އަދި ސްނެޕްޗެޓް ފަދަ ސޯޝަލް މީޑިއާތައް ހެކްކޮށްދޭ ކަމަށް ބުނެފައިވެ އެވެ. މީގެ އިތުރުން ވީޑިއޯ ގޭމްތަކުގެ ހެކާއި ފޭކް ފޮލޮވަރުން އިތުރުކުރުމުގެ ހެކްތައް ވެ އެވެ.
މި އިސްތިހާރުތައް ހޯދާފައިވަނީ ސޮފްޓްވެއާ ތައްޔާރުކުރާ ކުންފުންޏެއް ކަމަށްވާ ސިޓިޒެން ލެބްގެ ސީނިއާ ރިސާޗާ، ޖޯން ސްކޮޓް ރެއިލްޓަން އެވެ. މި ފައިލްތަކުގެ ތާރީހުތަކަށް ބަލާލުމުން މިއީ ވަރަށް ގިނަ ދުވަސްވެފައިވާ ފައިލްތަކެއްކަން އެނގޭކަމަށް އޭނާ ބުނެފައިވެ އެވެ.
މިފަދަ ހުރިހާ އިސްތިހާރުތަކެއްވެސް ހުރީ ގާތްގަގަނޑަށް އެއްގޮތަކަށް ކަމުން މިއީ އެކަކު ނޫނީ އެއްބަޔަކުގެ މަސައްކަތެއްކަމަށް ގަބޫލުކުރެވޭކަމަށް ވެސް އޭނާ ބުނެފައިވެ އެވެ.
މިކަމާއި ގުޅިގެން އެމެރިކަން ސައިބާ ސެކިއުރިޓީ އެޖެންސީ ބުނެފައިވަނީ މި މައްސަލަތައް އެފަރާތުގެ ސަމާލުކަމަށް އައިސްފައިވާކަމަށާއި މިކަންކުރަމުންދާ ގޮތް ވެސް އެނގޭ ކަމަށެވެ. އަދި މައްސަލަ ދިމާވެފައިވާ ހުރިހާ ވެބްސައިޓްތަކަށް ހައްލު ހޯދައިދިނުމުގެ މަސައްކަތް ކުރަމުންދާ ކަމަށް އެ އިދާރާއިން ބުނެފައިވެ އެވެ.
