ޕެރިސް (ޖޫން 5) - ކޮންޓްރެކްޓް ހަމަވުމުން ޕީއެސްޖީ ދޫކޮށްލާނެކަން އިއުލާނުކޮށްފައިވާ އާޖެންޓީނާގެ ތަރި، ލިއޮނަލް މެސީގެ ސޮއި ހޯދަން ސައުދީ އަރަބިއްޔާގެ އަލް-ހިލާލްގެ އޮފިޝަލުން ޕެރިހަށް ގޮސްފައިވާ ކަމަށް ރިޕޯޓްތައް ބުނެފި އެވެ.
ހަތް ފަހަރު ބެލޮންޑިއޯ އެވޯޑް ހާސިލްކޮށްފައިވާ މެސީ، 35، ހޯދަން ސައުދީގެ އަލް ހިލާލް އިން ހުށަހަޅާ ޑީލްގެ ޖުމްލަ އަގު 500 މިލިއަން ޑޮލަރަށް އަރާނެ ކަމަށް ރިޕޯޓްތައް ބުނެ އެވެ. އެ ގޮތުން، މެސީ އަށް ދެ ފަހަރެއްގެ މަތިން ނުރަސްމީ ގޮތެއްގައި މިހާރު ވަނީ އެ ޑީލްގެ ކަންކަން ހުށަހަޅައިފަ އެވެ. އޭރު ބައެއް މީޑިއާތަކުން ވަނީ މެސީ، އަލް-ހިލާލް އަށް ދާން ހުރިހާ ކަމެއް ނިމިފައިވާ ކަމަށް ވެސް ރިޕޯޓްކޮށްފަ އެވެ. އެކަމަކު، މެސީ ވަނީ އޭރު އެކަން ދޮގުކޮށްފަ އެވެ.
މެސީ ޑީލާ ގުޅޭ ކަންކަން ރަސްމީ ސިފައެއްގައި ކުރިއަށްގެންދިއުމަށް، އަލް-ހިލާލްގެ އޮފިޝަލުން މިހާރު ވަނީ ޕެރިހަށް ގޮސް، މަސައްކަތް ފަށައިފަ އެވެ. އެ ގޮތުން، އަލް-ހިލާލްގެ އޮފިޝަލުން ބޭނުންވަނީ މެސީގެ އޭޖެންޓް، އޭނާގެ ބައްޕަ، ޖޯޖް މެސީއާ ބައްދަލުކޮށް ކުރިއަށް އޮތް، ދެ ދުވަހެއްގެ ތެރޭގައި މުޅި ޑީލް ނިންމުމަށް ކަމަށް ސައުދީ އަރަބިއްޔާގެ ޓީވީ އަލް-އެހްބަރިއާ އިން ރިޕޯޓްކޮށްފައިވެ އެވެ.
އެހެން މީޑިއާ ރިޕޯޓެއް ބުނާގޮތުން، ކުރިއަށް އޮތް ހަފްތާ ބަންދު ތެރޭގައި އަލް-ހިލާލް ކުޅުންތެރިއެއްގެ ގޮތުގައި މެސީ ތައާރަފްކުރަން އިވެންޓެއް ބާއްވަން ވެސް އަންނަނީ މަޝްވަރާ ކުރަމުންނެވެ.
މެސީގެ ސޮއި ހޯދަން އޭނާގެ ކުރީގެ ކްލަބް، ބާސެލޯނާ އާއި މަޝްހޫރު ފުޓްބޯޅަ ކުޅުންތެރިޔާ، ޑޭވިޑް ބެކަމްގެ ހިއްސާ އޮންނަ އިންޓަ މިއާމީން ވެސް އަންނަނީ މަސައްކަތް ކުރަމުންނެވެ. މާލީ ގޮތުން ގިނަ ކަންތައްތަކެއް ހަމަޖެހިގެން ނޫން ގޮތަކަށް މެސީ އަށް އަލުން ބާސެލޯނާ އަށް ދެވެން ނެތެވެ. ބާސެލޯނާ އިން އަންނަނީ އެކަން ކުރެވޭނެ ގޮތެއް އޮތްތޯ، ސްޕެނިޝް ލީގާ މަޝްވަރާ ކުރަމުންނެވެ.
މީގެ ދެ އަހަރު ކުރިން، މެސީ ޕީއެސްޖީ އަށް ދާން ޖެހުނީ ވެސް ބާސެލޯނާގެ މާލީ ހާލަތާ ހެދި އެ ޓީމުގެ ކޮންޓްރެކްޓް އާ ނުކުރެވިގެންނެވެ. ޕީއެސްޖީގައި މެސީ އަށް ދެ ފަހަރު ލީގު ޗެމްޕިއަންކަން ލިބުނު ނަމަވެސް ޗެމްޕިއަންސް ލީގު ހޯދޭނެ ގޮތެއް ނުވި އެވެ. ދެ ފަހަރު ވެސް ކެޓީ ޗެމްޕިއަންސް ލީގުގެ ގަދަ 16 ބުރުންނެވެ.
ފަހަކަށް އައިސް ޕީއެސްޖީ ކުޅުނު ގިނަ މެޗުތަކުގައި އެ ޓީމުގެ ބައެއް ސަޕޯޓަރުން ވަނީ ހިތްހަމަނުޖެހުމުގެ ޝުއޫރުތައް ފާޅުކޮށް މެސީއާ ދިމާކޮށްލައިފަ އެވެ. އެއީ، އެ ކްލަބްގެ ކޮންޓްރެކްޓް އާ ނުކުރަން މެސީ ނިންމި ހިސާބުން ފެށިގެން މެޗުތަކުގައި އައި ކަމެކެވެ.
ޕީއެސްޖީގައި މެސީ މަޑުނުކުރާނެކަން ޔަގީންވީ އެ ކްލަބްގެ ހުއްދަ ނުހޯދައި ސައުދީ އަރަބިއްޔާ އަށް ދަތުރެއް ދިޔަ ކަމަށް ބުނެ، ސަސްޕެންޑްކުރި ހިސާބުންނެވެ. ދެ ހަފްތާ އަށް ދިން ސަސްޕެންޝަން ވަނީ ހަފްތާއެއްހާ ދުވަސް ތެރޭ އުވާލައިފަ އެވެެ.
