އަންނަ ހަފުތާގައި އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން ސައުދީ އަރަބިއްޔާއަށް ވަޑައިގަންނަވާނެ ކަމަށް އިއުލާންކޮށްފި އެވެ.
ޖޫން 6-8 އަށް ބްލިންކެން ސައުދީއަށް ދަތުރު ކުރައްވާ އިރު، އެމެރިކާ އާއި ސައުދީ ގުޅިގެން މަސައްކަތް ކުރަމުން ދަނީ ހަނގުރާމަ ކުރިއަށްދާ ސޫދާނަށް ސުލްހަ ގެނައުމަށެވެ.
ސްޓޭޓް ޑިޕާޓްމަންޓުން ބުނީ ދަތުރުގައި މަޝްވަރާ ކުރައްވާނީ ދެ ގައުމުގެ ސްޓްރެޓެޖިކް ގުޅުމާއި، އިގުތިސާދީ އަދި ސަލާމަތީ ކަންކަމާ ބެހޭ ގޮތުން ކަމަށެވެ.
ބުދަ ދުވަހު އޮންނަ ގަލްފު ކޯޕޮރޭޝަން ކައުންސިލްގެ މިނިސްޓަރުންގެ ބައްދަލުވުމުގައި ބްލިންކެން ބައިވެރިވެވަޑައިގަންނަވާނެ އެވެ.
އޭގެ ފަހުން ބުރާސްފަތި ދުވަހު އޮންނާނީ އިސްލާމިކް ސްޓޭޓް (އައިއެސް) އާ ދެކޮޅަށް ހަނގުރާމަ ކުރާ ކޯލިޝަންގެ ބައްދަލުވުމެކެވެ.
ދާދި ފަހުން ވައިޓް ހައުސްގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން ވެސް ވަނީ ސައުދީ އަރަބިއްޔާއަށް ދަތުރު ކުރައްވާފަ އެވެ.
