ދިވެހި ދައުލަތުން ދޭ ހާއްސަ ފަތުރުވެރިކަމުގެ އެވޯޑު "މޯލްޑިވްސް ޓުއަރިޒަމް އެވޯޑްސް" އަށް ކުރިމަތިލާން އިއްޔެ ހުޅުވާލައިފި އެވެ.
ފަތުރުވެރިކަމުގެ ހިދުމަތް ދިނުމުގައި އެންމެ މަތީ ފެންވަރު ގެންގުޅޭ ފަރާތްތަކުގެ އަގުވަޒަން ކުރުމަށް ދޭ އެ އެވޯޑަށް ކުރިމަތިލުމުގެ ސުންގަނޑި ހަމަވާނީ މި ހިނގާ ޖުލައި 13، ގެ ނިޔަލަށެވެ.
މޯލްޑިވްސް ޓުއަރިޒަމް އެވޯޑްސްގެ 49 ފަރާތަކަށް ދޭނެ އެވެ. އެއީ ރިސޯޓުތަކުގެ ކެޓަގަރީން 16 އެވޯޑަކާއި ގެސްޓްހައުސް އަދި ހޮޓާތަކުގެ ކެޓަގަރީން 15 އެވޯޑަކާއި ފަތުރުވެރިކަން ކުރާ އުޅަނދުފަހަރުގެ ކެޓަގަރީން 13 އެވޯޑަކާއި ޓްރެވަލް އެޖެންސީ، ފީނުން އަދި މޫދުކުޅިވަރުގެ ދާއިރާއިން ދޭ ފަސް އެވޯޑެކެވެ.
އެ އެވޯޑަށް ކުރިމަތިލުމުން ޖަޖު ކުރުމުގައި ބަލާނީ ޖޫން، 2022، އިން ފެށިގެން މެއި 31، 2023 ގެ ނިޔަލަށް ފޯރުކޮށްދިން ހިދުމަތްތަކަށެވެ.
އެ އެވޯޑަށް ކުރިމަތިލާން ޖެހޭނީ އޮންލައިންކޮށް ޓުއަރިޒަމް މިނިސްޓްރީން ފޯރުކޮށްދީފައިވާ ފޯމެއް ފުރައިގެނެވެ.
މޯލްޑިވްސް ޓުއަރިޒަމް އެވޯޑަކީ ކޮންމެ އަހަރަކު ވެސް ދޭ ގޮތަށް ހަމަޖައްސައި، ސަރުކާރުން މިދިޔަ އަހަރު ތައާރަފު ކުރި އެވޯޑެކެވެ. އެ އެވޯޑު ދިނުމުގެ މަގްސަދަކީ ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތަކާއި ދޭ ހިދުމަތުގެ އަގު ވަޒަން ކުރުމާއެކު ރާއްޖޭގެ ބްރޭންޑް އިމޭޖް ދެމެހެއްޓުމަށް ކުރާ މަސައްކަތަށް ހިތްވަރުދިނުމެވެ.
އޭގެ އިތުރުން، ފަތުރުވެރިކަން ކުރާ ފަރާތްތަކުން ދިވެހި މުޖްތަމައަށް ކޮށްދޭ ހިދުމަތްތަކުގެ އަގު ވަޒަން ކުރުމަކީ ވެސް އެ އެވޯޑު ދިނުމުގެ ބޭނުމެކެވެ.
