މިދިޔަ އަހަރުގެ ފައިދާއިން ކޮންމެ ހިއްސާއަކަށް 77ރ. ބަހަން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ބޯޑުން ނިންމާފައިވާ ގޮތަށް، ހިއްސާދާރުން މިރޭ ފާސްކޮށްފި އެވެ.
ހުޅުމާލޭ ސެންޓްރަލް ޕާކުގާއި ބާއްވަމުންދާ އެސްޓީއޯގެ އަހަރީ އާންމު ޖަލްސާގައި ފައިދާ ބެހުމަށް ފާސްކުރުމުގެ އިތުރުން، އާންމު ހިއްސާދާރުންގެ ތެރެއިން މުހައްމަދު އަހުސަން ސަލީމް ކަނޑައަޅަން ވެސް ފާސްކުރި އެވެ. އަދި އެސްޓީއޯ އޮޑިޓްކުރާ ކުންފުންޏަކަށް މި އަހަރު ވެސް ޕީޑަބްލިޔޫސީ ހަމަޖެއްސި އެވެ.
ރިޕޯޓު ދައްކާ ގޮތުގައި ނިމިގެން ދިޔަ 2022 ވަނަ އަހަރު އާމްދަނީގެ ގޮތުގައި 18.2 ބިލިއަން ރުފިޔާ އެސްޓީއޯއަށް ލިބިފައިވެ އެވެ. އޭގެ ކުރީ އަހަރު އާމްދަނީގެ ގޮތުގައި އެސްޓީއޯއަށް ލިބިފައި ވަނީ 10.2 ބިލިއަން ރުފިޔާ އެވެ.
މިދިޔަ އަހަރު ކުންފުންޏަށް ފައިދާގެ ގޮތުގައި ދެ ބިލިއަން ރުފިޔާ ލިބިފައި ވާއިރު، އޭގެ ކުރީ އަހަރު އެ ކުންފުންޏަށް ޖުމްލަ ފައިދާގެ ގޮތުގައި ލިބުނީ 1.5 ބިލިއަން ރުފިޔާ އެވެ. އެހެންކަމުން 2021 ވަނަ އަހަރާ އަޅާ ބަލާއިރު ފައިދާގެ ގޮތުގައި އެ ކުންފުންޏަށް ލިބުނު އަދަދު ވެސް ވަނީ 41 ޕަސެންޓުގެ ކުރިއެރުމެއް ހޯދާފަ އެވެ.
ޓެކުހަށް ކެނޑުމަށްފަހު މިދިޔަ އަހަރު ސާފު ފައިދާގެ ގޮތުގައި އެސްޓީއޯއަށް ވަނީ 742 މިލިއަން ރުފިޔާ ރިކޯޑު ކުރެވިފަ އެވެ. އެއީ އޭގެ ކުރީ އަހަރާ އަޅާ ބަލާއިރު 52 ޕަސެންޓުގެ ކުރިއެރުމެކެވެ.
