އަހުމަދުއާބާދު، އިންޑިއާ (މެއި 29) - އިންޑިއަން ޕްރިމިއާ ލީގު (އައިޕީއެލް)ގެ ފައިނަލް މެޗު މިރޭވެސް ނުކުޅެވިއްޖެ ނަމަ ޗެމްޕިއަންކަން ގުޖުރާތަށް ލިބޭނެ އެވެ.
ދުނިޔޭގެ އެންމެ އަގުބޮޑު ކްރިކެޓު ލީގު ކަމަށްވާ އިންޑިއަން ޕްރިމިއާ ލީގުގެ ފައިނަލުގައި މި އަހަރު ވާދަކުރަނީ އެންމެ ފަހުގެ ޗެމްޕިއަން ގުޖުރާތު ޓައިޓަންސް އާއި ޗެންނާއީ ސުޕަ ކިންގްސް އެވެ. ފައިނަލް މެޗު ކުޅެން ހަމަޖެހިފައި އޮތީ ރޭގަ އެވެ. ނަމަވެސް އިންޑިއާގެ އަހުމަދުއާބާދަށް ބޯކޮށް ވާރޭވެހުމުގެ ސަބަބުން މެޗު މިއަދަށް ފަސްކުރަން ޖެހުނީ އެވެ.
އިއްޔެ ހަވީރާ ހަމައަށް އަހުމަދުއާބާދުގެ މޫސުން ފެނުނީ ރަނގަޅަށެވެ. ނަމަވެސް މެޗު ފެށުގެ ބައިގަޑިއެއްހާއިރު ކުރިން ބޯކޮށް ވާރޭވެހެން ފެށި އެވެ. ރޭ ބައެއް ވަގުތުތަކުގައި ކުޑަކޮށް ވާރޭ ތުނިކުރި ނަމަވެސް މެޗު ކުރިއަށްގެންދެވޭ ވަރަށް ވާރޭ ހުއްޓާ ނުލަ އެވެ.
މެޗު އޮފިޝަލުން ފުރަތަމަ ނިންމައިގެން ތިބީ އަވަހަށް ވާރޭ ހުއްޓާލައިފި ނަމަ ކުރިން ހަމަޖެހިފައި އޮތް ގޮތަށް ފުލް މެޗު ކުޅޭށެވެ. ނަމަވެސް މެޗު ފަށަން ހަމަޖެހިފައިވާ ގަޑިއަށްވުރެ ދޮޅު ގަޑިއިރު ލަސްވުމުން ފަސް އޯވަރަށް ކުޅޭ ފައިނަލެއް ގޮތަށް މެޗު ކުރިއަށްގެންދަންވެސް މެޗުގެ އޮފިޝަލުން ތިބީ ނިންމައިގެންނެވެ. ނަމަވެސް އެއްވެސް ވަރަކަށް މެޗު ކުރިއަށް ނުގެންދެވޭ ވަރުވުމުން މެޗު މިއަދަށް ފަސްކުރީ އެވެ.
އައިޕީއެލްގެ ފައިނަލު މެޗު އެއްވެސް ހާލަތެއް ދިމާވެގެން ނުކުޅެވިއްޖެ ނަމަ އެ ޖެހިގެން އަންނަ ދުވަހު ކުޅޭ ގޮތަށް ރިޒާވް ދުވަހެއް ޝެޑިއުލްގައި އޮންނަނީ ހިމަނާފަ އެވެ.
ފައިނަލް މެޗު މިއަދުވެސް ނުކުޅެވިއްޖެނަމަ ތަށި ލިބެނީ ކޮންބަޔަކަށް؟
އައިޕީއެލްގެ ފައިނަލް މެޗު މިއަދު އެއްވެސް ސަބަބަކާ ހުރެ ނުކުޅެވިއްޖެ ނަމަ ޗެމްޕިއަންކަން ލިބޭނީ ގުޖުރާތަށެވެ. މުބާރާތުގެ ގަވާއިދުގައި ވާ ގޮތުން އެއްވެސް ގޮތަކަށް މެޗުު ނުކުޅެވޭ ހާލަތެއް ދިމާވެއްޖެ ނަމަ ތަށި ލިބެނީ ލީގު ބުރުގައި ގިނަ ޕޮއިންޓް ހޯދާފައި އޮތް ޓީމަކަށެވެ. މިއަހަރުގެ އައިޕީއެލްގެ ލީގު ބުރުގެ އެއްވަނަ ހޯދީ 20 ޕޮއިންޓް ހޯދި ގުޖުރާތެވެ. 17 ޕޮއިންޓް ހޯދި ޗެންނާއީ އޮތީ ދެވަނައިގަ އެވެ.
ލީގު ބުރުގައި ހޯދި ނަތީޖާއަށް ބަލައި ޗެމްޕިއަންކަން ގުޖުރާތަށް ދިނުމަކީ އެންމެ ފަހު ސިނާރިއޯ އެވެ. ވިއްސާރައިގެ ސަބަބުން 20 އޯވަރު ކުރިއަށް ނުގެންދެވޭ ކަަމަށްވާނަމަ މެޗުގެ އޯވަރު މަދުކޮށް ކުރިއަށް ގެންދަން މަސައްކަތްކުރާނެ އެވެ. ފަސް އޯވަރުވެސް ކުރިއަށް ނުގެންދެވިއްޖެ ނަމަ ސުޕަ އޯވަރެއް ކުޅެގެންވެސް ޗެމްޕިއަން ކަނޑައެޅިދާނެ އެވެ. ސުޕަ އޯވަރު ކުޅޭނީ އެއް އޯވަރުވިޔަސް ކުޅެވޭނެ ހާލަތަށް ޕިޗު ތައްޔާރުވެފައި އޮތް ކަމަށް މެޗުގެ އޮފިޝަލުން ނިންމައިފި ނަމަ އެވެ.
މިއަހަރުގެ ފައިނަލަކީ ގިނަ ގޮތްގޮތުން ފާހަގަކޮށްލެވޭ ފައިނަލެކެވެ. މި ފައިނަލަކީ ޗެންނާއީ އައިޕީއެލްގައި ކުޅޭ 10 ވަނަ ފައިނަލެވެ. މިއީ ފަހަރުގައި އިންޑިއާގެ އެންމެ ލެޖެންޑަރީ ކެޕްޓަން މަހިންދުރަ ސިންގް ދޯނީގެ ފަހު މެޗަށްވުން ގާތެވެ. ދޯނީގެ ގާތް މީހުން މައުލޫމާތު ދޭ ގޮތުގައި 41 އަހަރުގެ ދޯނީ ހުރީ އައިޕީއެލްގެ ފައިނަލަށްފަހު ރިޓަޔާކުރަން ނިންމައިގެންނެވެ.
މިއަހަރުގެ އައިޕީއެލްގެ ތަށި ޗެންނާއީ އިން ހޯދައިފި ކަމަށްވާނަމަ އެޓީމަށް މުބާރާތުގެ ޗެމްޕިއަންކަން ފަސް ވަނަ ފަހަރަށް ލިބޭނެ އެވެ. މީގެ ކުރިން ފަސް ފަހަރު ތަށި ހޯދާފައިވަނީ މުމްބާއީ އިންޑިއަންސް އެކަންޏެވެ.
ގުޖުރާތުގެ ކެޕްޓަން ހާދިކް ޕާންޑިޔާއަށްވެސް މި ފައިނަލް މެޗު ހާއްސަ ވާނެ އެވެ. މިހާތަނަށް ހާދިކް ކުޅުނު ފަސް ފައިނަލު މެޗުގައިވެސް ކުރި ހޯދި ޓީމްގައި ހާދިކް ހިމެނުނެވެ. މިދިޔަ ސީޒަންގައި އައިޕީއެލްގައި ކުޅެން ފެށި ގުޖުރާތަކީ މިދިޔަ ސީޒަނާ މި ސީޒަންގެވެސް އެންމެ ފޯމުގައި އޮތް ޓީމެވެ.
