ޕެރިސް (މެއި 28) - ސްޓްރާސްބޯއާ 1-1 އިން އެއްވަރުކޮށް، ޕީއެސްޖީން ރޭ 11 ވަނަ ފަހަރަށް ފްރެެންްޗް ލީގުގެ ޗެމްޕިއަންކަން ހޯދައި ލީގުގެ ތާރީހުގައި އެންމެ ކާމިޔާބު ޓީމުގެ ރެކޯޑް ހެދިއިރު، މި މެޗުގައި ގޯލު ޖަހައި ޕީއެސްޖީގެ ލިއޮނަލް މެސީ ޔޫރަޕްގެ ވަރުގަދަ ފަސް ލީިގުގައި ލަނޑު ޖެހުމުގެ ރެކޯޑެއް ހަދައިފި އެވެ.
ޕީއެސްޖީ އަކީ ފްރެންޗް ލީގުގެ ތާރީހުގައި އެންމެ ގިނަ ފަހަރަށް ލީގު ހޯދި ޓީމެވެ. މީގެ ކުރިން 10 ލީގު ތަށްޓާ އެކު ޕީއެސްޖީ އޮތީ ސެއިން އެޓިއެން އާއި މާސޭއާ އެއްވަރުވެފަ އެވެ.
ސްޓްރާސްބޯ ދަނޑުގައި ރޭ ކުޅުނު މެޗުގައި ޕީއެސްޖީން ލީޑުނެގީ 59 ވަނަ މިނިޓްގަ އެވެ. ޕީއެސްޖީގެ ކީލިއަން އެމްބާޕޭ ދިން ބޯޅައަކަށް އަރައި މެސީ ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ. މިއީ ޔޫރަޕްގެ ވަރުގަދަ ފަސް ލީގުގައި މެސީ ޖެހި 496 ވަނަ ގޯލެވެ. މިއާ އެކު، މީގެ ކުރިން މި ރެކޯޑް އޮތް ކްރިސްޓިއާނޯ ރޮނާލްޑޯ އަތުން މި ރެކޯޑް ގެއްލުނީ އެވެ. ރޮނާލްޑޯ ރެކޯޑް ހެދީ 495 ގޯލު ޖަހައިގެންނެވެ.
ރެލިގޭޝަނުން ސަލާމަތްވި ސްޓްރާސްބޯ އަށް ރޭގެ މެޗުގައި އެއްވަރުކޮށްދިން ގޯލު ޖަހައިދިނީ ކުރިން ޕީއެސްޖީ އަށް ކުޅުނު ކެވިން ގަމެއިރޯ އެވެ.
މިއީ އެންމެ ފަހުން 11 އަހަރު ތެރޭ ޕީއެސްޖީން ފްރެންޗް ލީގު ޗެމްޕިއަންކަން ޕީއެސްޖީން ހޯދި ނުވަ ވަނަ ފަހަރެވެ. ޕީއެސްޖީ އަށް މި ފަހަރުގެ ލީގު ޗެމްޕިއަންކަން ހޯދައިދިން ކޯޗު ކްރިސްޓޮފް ގަލްޓިއޭ އަށް އެ ޓީމުގެ މަގާމުގައި ދެމި ހުރުމަށް ގޮންޖެހުންތަކެއް އެބަހުއްޓެވެ.
ރޭގެ މެޗަށް ފަހު ގަލްޓިއޭ ބުނީ ޖަރުމަނު ލީގުގައި އެންމެ ފަހު ދުވަހު ވީ ގޮތް އޭނާ އަށް ފެނުނު ކަމަށާއި އޭގެއިން ވެސް އެނގޭ ކަމަކީ ލީގެއްގެ ޗެމްޕިއަންކަން ހޯދުމަކީ ފަސޭހަކަމެއް ނޫން ކަމަށެވެ.
މި ސީޒަނަށް ފަހު މެސީ ވެސް ޕީއެސްޖީ ދޫކޮށްލާނެ ކަމަށް ރިޕޯޓްތައް ބުނެ އެވެ. މެސީ، ޕީއެސްޖީއާ އެކު ކޮންޓްރެކްޓްގައި ހުރީ އަންނަ މަހުގެ ނިޔަލަށެވެ. މި ފަހަރު ލީގުގައި 16 ގޯލު ޖަހައި، 16 ގޯލު ޖަހަން ފުރުސަތު ތަނަވަސްކޮށްދިން މެސީ، އަށް ޕީއެސްޖީން އާ ކޮންޓްރެކްޓެއް ދިން ނަމަވެސް އޭނާ އެ އަށް އެއްބަހެއްނުވެ އެވެ.
