މަހިބަދޫގައި އަޅާފައިވާ ޓާފް ދަނޑު ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ބްރެޒިލްގެ ލެޖެންޑަރީ ތަރި، ޕެލޭ އަށް ހާއްސަކުރަން ނިންމައި އެ ދަނޑުގެ ނަން ރަސްމީކޮށް ރީބްރޭންޑްކޮށް ހުޅުވަން ނިންމައިފި އެވެ.
އެޑްސަން އަރަންޓޭސް ޑޮ ނެސިމެންޓޯ (ޕެލޭ) 82، މަރުވީ މިދިޔަ އަހަރުގެ ޑިސެމްބަރު މަހު ކެންސަރަށް ފަރުވާ ހޯދަމުންދަނިކޮށެވެ. އޭނާގެ ބަލިހާލަތު ގޯސްވެ، މިދިޔަ އަހަރުގެ ޑިސެމްބަރު މަހުގެ ކުރީކޮޅު ހޮސްޕިޓަލްގައި އެޑްމިޓްކުރިއިރު އޭނާ އައީ ކެންސަރު ބަލީގެ އިތުރުން ހިތުގެ ބައްޔަށް ގެންދިޔައީ ފަރުވާ ހޯދަމުންނެވެ.
ޕެލޭ މަރުވުމާ ގުޅިގެން ފީފާއިން ވަނީ ދުނިޔޭގެ ކޮންމެ ގައުމެއްގައި ވެސް ޕެލޭގެ ނަމަށް ހާއްސަކޮށް އެއް ސްޓޭޑިއަމް ބޭއްވުމަށް އިލްތިމާސްކޮށްފަ އެވެ.
މަހިބަދޫ ސްޓޭޑިއަމްގެ ނަން ޕެލޭ އަށް ހާއްސަކުރުމުގެ ގޮތުން މިއަދު ހަވީރު އެ ރަށުގައި ހާއްސަ ފުޓްބޯޅަ މެޗެއް ވެސް ކުޅޭނެ އެވެ. މި މެޗުގައި ވާދަކުރާނީ ގައުމީ ފުޓްބޯޅަ ޓީމާއި މަހިބަދޫ އިން ހޮވާލެވޭ ޓީމެކެވެ. އެ ގޮތުން، ފްރެންޗެސްކޯ މޮރިއޭރޯގެ ކޯޗުކަމުގައި ކުޅޭ ގައުމީ ޓީމުގައި ހިމެނެނީ އަންނަ މަހު ކުޅޭ ސާފް ޗެމްޕިއަންޝިޕް ފުޓްބޯޅަ މުބާރާތަށް ނެގި ޕްރިލިމިނަރީ ސްކޮޑުގެ ކުޅުންތެރިންނެވެ. މަހިބަދޫ އަކީ އެހާރާއި މިހާރަށް ބެއްޔަސް ފުރަތަމަ ޑިވިޝަނުގައި ކުޅޭ ގިނަ އަދަދެއްގެ ކުޅުންތެރިން ނިސްބަތްވާ ރަށެކެވެ.
މަހިބަދޫ އަކީ ފުޓްބޯޅައިގެ ގިނަ ތަރިންތަކެއް ނެރެދީފައިވާ ރަށެކެވެ. މިގޮތުން ގައުމީ ޓީމަށް 17 އަހަރު ކުޅެދިން ރާއްޖޭގައި އުފެދުނު އެންމެ މޮޅު ގޯލްކީޕަރު، އިމްރާން މުހައްމަދު (އިންމަ) އާއި ގައުމީ ޓީމުގެ ކުރީގެ ފޯވާޑް އަހުމަދު ތޯރިގު (ޓޮމް) އަދި އަސަދުﷲ އަބްދުﷲ (އަސައްކޮ)ގެ އިތުރުން ހުނަރުވެރި ވިންގް، ހުސެއިން ނިޔާޒް މުހައްމަދު (ބޮކުރީ) އަކީ މަހިބަދޫ އަށް އުފަން ގައުމީ ޓީމަށް ރީތި ނަން ހޯދައިދިން ކުޅުންތެރިންނެވެ.
މީގެ އިތުރުން، މިހާރު ގައުމީ ޓީމުގެ ކެޕްޓަން ސަމޫހު އަލީ (ސަމުއްޓެ) އަކީވެސް މަހިބަދޫގެ ކުޅުންތެރިއެކެވެ.
ރާއްޖޭފެ ފުރަތަމަ ޑިިވިޝަނަށް މި ވަގުތު ބެލިޔަސް އެއް ރަށުން އެންމެ ގިނަ ކުޅުންތެރިން ހިމެނެނީ މަހިބަދޫގެ އިތުރުން ބ. އޭދަފުށިންނެވެ. މަހިބަދޫ ސްޕޯޓްސް ކްލަބް ވަނީ 2014 އާއި 2015 ވަނަ އަހަރު ފުރަތަމަ ޑިވިޝަނުގައި ވާދަކޮށްފަ އެވެ. މި ވަގުތު މަހިބަދޫ އޮތީ ދެ ވަނަ ޑިވިޝަނުގަ އެވެ.
މަހިބަދޫގެ ދަނޑު ޕެލޭއަށް ހާއްސަކުރަން ނިންމާފައިވާއިރު، ވޯލްޑްކަޕް ފުޓްބޯޅަ މުބާރާތް ތިން ފަހަރު ކާމިޔާބުކުރި ހަމައެކަނި ކުޅުންތެރިޔާ ޝަރަފުގައި އެންމެ ފުރަތަމަ ފުޓްބޯޅަ ދަނޑެއް ހުޅުވީ ހުޅަނގު އެފްރިކާގެ ގައުމެއް ކަމަށްވާ ގިނީ-ބިސާއުގެ ސްޓޭޑިއަމް ކަށެވެ. މީގެ އިތުރުން ރުވާންޑާ، ކޭޕް ވާޑޭގެ އިތުރުން ކޮލަމްބިއާގެ ސްޓޭޑިއަމަކަށް ވެސް ޕެލޭގެ ނަމުން ނަންދީފައިވެ އެވެ.
ކޮންމެ ގައުމެއްގައި ޕެލޭއަށް ހާއްސަ ދަނޑެއް ބޭއްވުމަށް ފީފާގެ ރައީސް ޖިއާނީ އިންފަންޓީނޯ ގޮވައިލެއްވީ މިދިޔަ ޖެނުއަރީ މަހުގަ އެވެ.
އެފްއޭއެމްގެ ރައީސް ބައްސާމް އަދީލް ޖަލީލް ކުރެއްވި ޕޯސްޓެއްގައި ވިދާޅުވެފައިވަނީ ޕެލޭ ފަދަ ލެޖެންޑަރީ ކުޅުންތެރިއެއްގެ ނަން ހިމެނޭ ގޮތަށް ދަނޑެއްގެ ނަން ރީބްރޭންޑް ކުރަން އެންމެ ރަނގަޅުވާނީ މަހިބަދޫ ފަދަ ދިވެހި ފުޓްބޯޅައިގެ ގިނަ ލެޖެންޑުން ނިސްބަތްވާ ރަށެއްގައި ކަމަށެވެ.
