މޯލްޑިވްސް އެއާޕޯޓްސް ކޮންޕެނީ ލިމިޓެޑު (އެމްއޭސީއެލް) އިން މިއަހަރުު ހައްޖަށް ފޮނުވުމަށް ހަމަޖެހިފައިވާ ފަސް މުވައްޒަފުންނަށް އެކަމުގެ ލިޔުން ހަވާލުކޮށްފި އެވެ.
ކޮވިޑާ ގުޅިގެން، ކުންފުނީގެ ހަރަދުގައި މުވައްޒަފުން ހައްޖަށް ފޮނުވުން ދެ އަހަރު ދުވަހަށް މެދުކަނޑާލާފައި އޮތުމަށްފަހު، އަލުން މުވައްޒަފުން ހައްޖަށް ފޮނުވުމަށް ނިންމައި، އެ ފުރުސަތު ލިބޭ މުވައްޒަފުން ހޮވާފައި ވަނީ ކުންފުންޏަށް އެންމެ ގިނަ ދުވަހު ހިދުމަތް ކޮށްފައިވާ މުވައްޒަފުންގެ ތެރެއިން، ކުންފުނީގެ އުސޫލުތަކާ އެއްގޮތައް އެކަށައަޅާފައިވާ ޝަރުތުތައް ހަމަވާ މުވައްޒަފުންނަށް ބަލައިގެންނެވެ. އެގޮތުން ހޮވުނު މުވައްޒަފުންނަށް ލިޔުން ހަވާލުކޮށްފައިވަނީ ބުރާސްފަތި ދުވަހު ހުޅުލޭ އައިލަންޑު ހޮޓަލުގައި އެކަމަށް ހާއްސަކޮށް ބޭއްވި ރަސްމިއްޔާތެއްގަ އެވެ. ލިޔުން މުވައްޒަފުންނާ ހަވާލުކޮށްދެއްވާފައި ވަނީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު، މަހްޖޫބު ޝުޖާއު އެވެ.
އެމްއޭސީއެލްގެ ހައްޖު ސްޕޮންސާޝިޕަކީ ކުންފުނީގައި ގިނަ ދުވަހު މަސައްކަތް ކުރަމުންދާ ހީވާގި މުވައްޒަފުންނަށް އެމީހުންގެ ބުރަ މަސައްކަތުގެ އަގު ވަޒަންކުރުމުގެ ގޮތުން ކޮންމެ އަހަރަކުވެސް ދޭ ފުރުސަތެކެވެ.
މެދުކެނޑުމަކަށްފަހު ހައްޖުގެ އަޅުކަން އަދާކުރުމަށް މައްކާއަށް ދެވޭގޮތް ވުމާއެކު، މިދިޔަ އަހަރުން ފެށިގެން ހައްޖު ކޯޓާ ހޯދުމަށް އެމްއޭސީއެލް އިން ކަމާބެހޭ ފަރާތްތަކާއެކު ދިޔައީ މަޝްވަރާކުރަމުން ކަމަށް އެ ކުންފުނިން ބުނެ އެވެ. މި އަހަރު އެމްއޭސީއެލް އިން ހައްޖަށް ފޮނުވުމަށް ހަމަޖެހުނު ފަސް ޖާގައަކީ އެ މަސައްކަތުގެ ތެރެއިން މި އަހަރު ދިވެހިރާއްޖެއިން ހައްޖަށް މީހުން ގެންދިޔުމަށް، މިނިސްޓަރީ އޮފް އިސްލާމިކް އެފެއާޒަށް، ރިޒާވްކޮށްފައިވާ ކޯޓާގެ ތެރެއިން، ލިބުނު ޖާގަތަކެކެވެ.
މުވައްޒަފުންނާ ލިޔުން ހަވާލު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު، އިބްރާހިމް ތޯހާ ވިދާޅުވީ މުވައްޒަފުންގެ ކުރިއެރުމާއި ތަރައްގީއަށާއި އެހެނިހެން ފުރުސަތުތައް ހޯދައިދިނުމަށް ވެސް ކުންފުނިން އަބަދު ވެސް މަސައްކަތް ކުރާ ކަމަށެވެ. އެގޮތުން މުވައްޒަފުން ހައްޖަށް ފޮނުވުމުގެ ސްޕޮންސާޝިޕަކީ ވެސް ފާހަގަ ކުރެވޭ ކާމިޔާބީއެއް ކަމަށް އޭނާ ވިދާޅުވި އެވެ.
