މެންޗެސްޓާ (މެއި 26) - އިނގިރޭސި ޕްރިމިއާ ލީގުގައި ރޭ ޗެލްސީ 4-1 އިން ބަލިކޮށް މެންޗެސްޓާ ޔުނައިޓެޑުން ގަދަ ހަތަރެއް ޔަގީންކޮށް އަންނަ ސީޒަނުގެ ޗެމްޕިއަންސް ލީގުން ޖާގައެއް ހޯދައިފި އެވެ.
އަންނަ ސީޒަނުގައި ޕްރިމިއާ ލީގުން ޗެމްޕިއަންސް ލީގަށް ކޮލިފައިވީ ލީގު ޗެމްޕިއަންކަން ހޯދި މެންޗެސްޓާ ސިޓީ އާއި އާސެނަލްގެ އިތުރުން ތިން ވަނައިގައި ނިންމި ނިއުކާސަލް ޔުނައިޓެޑާއި ހަތަރެއްގައި އޮތް ޔުނައިޓެޑް އެވެ. ނިއުކާސަލް އިން 20 އަހަރު ފަހުން ޗެމްޕިއަންސް ލީގުގައި ވާދަކުރާއިރު، އާސެނަލުން ޗެމްޕިއަންސް ލީގުގައި މި ކުޅެނީ ހަ އަހަރުގެ މެދުކެނޑުމަކަށް ފަހު އެވެ.
ޔުނައިޓެޑުން ރޭ ޗެލްސީ ބަލިކުރުމާ އެކު، ލިވަޕޫލަށް ގަދަ ހަތަރެއްގެ ދޮރު ބަންދުވީ އެވެ. އަންނަ ސީޒަނުގައި ލިވަޕޫލް ކުޅޭނީ ޔޫރޮޕާ ލީގުގަ އެވެ.
ރޭ އޯލްޑް ޓްރެފޯޑް ސްޓޭޑިއަމްގައި ކުޅުނު މެޗުގައި ޗެލްސީ އަށް ލީޑުނަގައިދޭން މިކައިލޯ މުޑްރިކަށް އޭރިއާތެރެއިން ހުސްކޮށް ލިބުނު ބޯޅަ ރަނގަޅަށް ފޮނުވައިނުލެވުނެވެ. ޔުނައިޓެޑަށް ލީޑުނަގައިދިނީ ހިލޭ ޖެހުމަކުން ހުރަސްވި ބޯޅައެއްގައި ކަސެމީރޯ ބޮލުން ވައްދާލި ގޯލުންނެވެ. ހަ ވަނަ މިނިޓްގައި ކަސެމީރޯ ޖެހި މި ގޯލު ބަލައިގަތީ ވީޑިއޯ އެސިސްޓަންޓް ރެފްރީ (ވީއޭއާރް) މެދުވެރިކޮށް، އޮފްސައިޑް ނޫންތޯ ކަށަވަރު ކުރުމަށް ފަހު އެވެ.
ޗެލްސީ އަށް އެއްވަރުކޮށްދޭން ގިނަ ފުރުސަތުތަކެއް ލިބިގެންދިޔައިރު، އޭގެއިން އެއްވެސް ބޯޅައެއްގައި ބޭނުމެއް ނުހިފުނެވެ. ޔުނައިޓެޑްގެ އޭރިއާތެރެއިން ޗެލްސީގެ ކައި ހަވާޓްޒް ވެއްޓިގެންފައި ބޮލުން ޖެހި ބޯޅަ އަރިމަތިން ދިޔައިރު، ކޯނާ ގެލަގާ ޖެހި ބޯޅަ ދިޔައީ ދަނޑިކައިރިން ބޭރުންނެވެ.
ދެ ވަނަ ހާފުގައި ވެސް ފުރަތަމަ ގޯލު ޖަހާނެ ފުރުސަތުތައް ނަގާލީ ޗެލްސީންނެވެ. ޔުނައިޓެޑުން ތިން ވަނަ ގޯލު ޖެހީ 73 ވަނަ މިނިޓްގައި ޕެނަލްޓީ އަކުން ބްރޫނޯ ފެނާންޑޭސް އެވެ. މިއީ، ފެނާންޑޭސް އަށް އޭރިއާތެރެއިން ޗެލްސީގެ ވެސްލީ ފޮފާނާ ކުރި ފައުލަކަށް ދިން ޕެނަލްޓީ އެކެވެ. އޭގެ ފަސް މިނިޓް ފަހުން، ހުސްކޮށް ލިބުނު ފުރުސަތެއްގެ ބޭނުންހިފައި، މާކަސް ރަޝްފޯޑް ވަނީ ޔުނައިޓެޑްގެ ހަތަރު ވަނަ ގޯލު ޖަަހައިފަ އެވެ. ރަޝްފޯޑް ކުޅެން އެރީ ޔުނައިޓެޑްގެ އެންޓޮނީ އަށް އަނިޔާވެގެން ސްޓްރެޗަރުގައި ބޭލުމުންނެވެ.
މުޅި މެޗުގައި ވެސް ގޯލު ޖަހާނެ ގިނަ ފުރުސަތުތަކެއް ނަގާލި ޗެލްސީން ވަނީ މެޗުގެ ފުރިހަމަ ވަގުތު ހަަމަވާން މިނިޓަކަށް ވެފައި ހުއްޓައި ގޯލެއް ޖަހައިފަ އެވެ. މި ލަނޑަކީ ބަދަލަކަށް ކުޅެން އެރި ދެ ކުޅުންތެރިން ގުޅިގެން ކުރި އެޓޭކެއްގައި ޖެހި ގޯލެކެވެ. އަމިއްލަ ހާފުގެ ތެރެއިން ޗެލްސީގެ ޔާއޯ ފެލިކްސް ހިފައިގެން ދިޔަ ބޯޅަ އޭރިއާބޭރު ރޮނގުކައިރިން ވަނީ ގޯލުގެ ތިރީ ކަނަށް އަމާޒުކޮށްލައިފަ އެވެ.
ޗެލްސީގެ ކޯޗުކަމާ ފްރޭންކް ލަމްޕާޑް އަލުން ހަވާލުވި ފަހުން، ކުޅުނު 10 މެޗުގެ ތެރެއިން އަށް މެޗުން ބަލިވިިއިރު، ރޭގެ މެޗަކީ ސީޒަނުގައި އެ ޓީމު ބަލިވި 16 ވަނަ މެޗެވެ. ޗެލްސީ މި ވަގުތު ލީގުގެ 12 ވަނައިގައި އޮތްއިރު، މިއީ 1996 ވަނަ އަހަރަށް ފަހު ޗެލްސީން ލީގުގެ މިހާ ފަހަތުގައި ނިންމާ ފުރަތަމަ ފަހަރެވެ. އަނެއްކޮޅުން، މިއީ، އިނގިރޭސި ލީގު ރީބްރޭންޑްކޮށް ޕްރިމިއާ ލީގަށް ބަދަލުވި ފަހުން ޕޮއިންޓްގެ އަދަދަށް ބަލާނަމަ ޗެލްސީގެ އެންމެ ދަށް ފަހަރެވެ.
