އަމީނީ މަގު ޒަމާނީ ފެންވަރަށް ތަރައްގީ ކުރުމުގެ މަސައްކަތުގެ ތެރެއިން, މިހާރު ހަދަމުންދާ ބަޔަށް މިއަދު ކެމިކަލް މާއްދާތައް ހިމެނޭ ބިޓްމެން (އެމްސީ30) ސްޕްރޭ ކުރާނެ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނެފި އެވެ.
އަމީނީ މަގުގެ މަސައްކަތް މިހާރު ކުރިއަށް ދަނީ ދޮންއަދަރާދަ ހިނގުމުން ފަށައިގެން ރަށްދެބައި މަގާ ހަމައަށެވެ. ސެގްމެންޓް 4,5,6 އަދި 7 ގެ މަސައްކަތުގެ ތެރެއިން އެ ސަރަހައްދުގައި ތާޅު އެޅުމުގެ ކުރިން އަޅާ އެގްރިގޭޓް ބޭސް ކޯސް (އޭބީސީ) ފަށަލައިގެ މަސައްކަތް މިހަރު ވަނީ ނިމިފަ އެވެ.
އާރުޑީސީން ބުނީ އޭބީސީ ފަށަލައިގެ މައްޗަށް ތާރު އެޅުމުގެ ކުރިން މިއަދު ބިޓްމެން ސްޕްރޭ ކުރާނެ ކަމަށެވެ.
ބިޓްމެން ސްޕްރޭއަކީ ވައިގެ ތެރެއަށްވެސް ފެތުރިގެންދާ މާއްދާ އެކެވެ. އެހެންކަމުން, ސްޕްރޭ ކުރާ ވަގުތު އެ ސަރަހައްދުގައި ދިރިއުޅޭ މީހުން އެކަމަށް ސަމާލުވެ, މަގަށް ވާގޮތަށް ހުންނަ ދޮރުތަކާއި ކުޑަދޮރު ފަދަ ތަންތަން ލައްޕާފައި ބެހެއްޓުމަށް އާރުޑީސީން ވަނީ އިލްތިމާސްކޮށްފަ އެވެ.
އަމީނީ މަގު ޒަމާނީ ފެންވަރަށް ތަރައްގީ ކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ.
ނަމަވެސް, އެ މުއްދަތަށް މަސައްކަތް ނުނިމޭނެ ކަމަށް ވިދާޅުވެ ޕްލޭނިން މިނިސްޓަރު މުހައްމަދު އަސްލަމް މިދިޔަ މަހު މަޖިލީހުގައި ވިދާޅުވީ އަމީނީ މަގުގެ މަސައްކަތް ނިމޭނެ ކަމަށް މިހާރު ބެލެވޭ ތާރީހަކީ އަންނަ ސެޕްޓެމްބަރު މަހުގެ 27 އަށް ކަމަށެވެ.
މިހާތަނަށް ތާރު އަޅާ, އާންމުންނަށް ހުޅުވާލާފައި ވަނީ ފުރަތަމަ ތިން ސެގްމެންޓު އެކަންޏެވެ. އެ މަސައްކަތް އަވަސް ކުރުމަށް އެމްޓީސީސީއާ ހަވާލުކޮށްގެން ތާރު އެޅުމަށްފަހު އާންމުންނަށް ހުޅުވާލީ މިދިޔަ މާޗް ހަ ވަނަ ދުވަހު އެވެ. އެއީ ސްޓެލްކޯއާ ހަމައަށެވެ.
އެއަށްފަހު ދެން އޮތީ ރޯދައިގެ ކުރިން އިމާދުއްދީން ސްކޫލާ ހަމައަށް ތާރު އަޅާ ނިންމާލާ ގޮތަށެވެ. ނަމަވެސް, އެ މަސައްކަތް ލަސްވެ, އޭޕްރީލް މަސް ތެރޭގައި ނިންމާލާނެ ކަމަށް ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވި އެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް އާރުޑީސީއާ ހަވާލުކޮށްފައި ވަނީ 84 މިލިއަން ރުފިޔާއަށެވެ.
