ލަންޑަން (މެއި 25) - އިނގިރޭސި ޕްރިމިއާ ލީގުގެ ޗެމްޕިއަންކަން ޖެހިޖެހިގެން ތިން ވަނަ ސީޒަނުގައި ހޯދާފައިވާ މެންޗެސްޓާ ސިޓީއާ 1-1 އިން އެއްވަރުކޮށް، ބްރައިޓަން އިން އަންނަ ސީޒަނުގެ ޔޫރޮޕާ ލީގުގެ ޖާގައެއް ހޯދައިފި އެވެ.
ސިޓީން ލީގު ތަށި އުފުލާލި ފަހުން ކުޅުނު ފުރަތަމަ މެޗުގައި އެ ޓީމު އަތުން ހޯދި ޕޮއިންޓާ އެކު ބްރައިޓަން އޮތީ ލީގުގެ ހަ ވަނައިގަ އެވެ. އެއީ 37 މެޗުން 62 ޕޮއިންޓް ހޯދައިގެންނެވެ. ހަތް ވަނައިގައި އޮތް އެސްޓަން ވިލާ އަށް ދެން ބްރައިޓަން އަށް ވުރެ ކުރި ހޯދޭނެ ގޮތެއް ނެތުމާ އެކު، ބްރައިޓަން އަށް ގަދަ ހައެއް ޔަގީންވެ، އަންނަ ސީޒަނުގެ ޔޫރޮޕާ ލީގުން ފުރުސަތު ފަހިވީ އެވެ.
ބްރައިޓަން ދަނޑުގައި ކުޅުނު މި މެޗުގެ 25 ވަނަ މިނިޓްގައި ސިޓީން ލީޑުނެގީ އާލިން ބްރައުޓް ހާލަންޑް ހުސްކޮށްލާފައި ދިން ބޯޅައަކުން ފިލް ފޯޑެން އެވެ. އެކަަމަކު، މާގިނައިރު އެ ލީޑުގައި ނުއޮވެވުނެވެ. ބްރައިޓަން އިން ވަނީ މެޗުގެ 38 ވަނަ މިނިޓްގައި ޕެރަގުއޭގެ މިޑްފީލްޑަރު، ޖޫލިއޯ އެންސީސޯ ހިތްގައިމު ގޯލެއް ޖަހައި، ބްރައިޓަން އަށް އެއްވަރުކޮށްދިނެވެ. އޭރިއާބޭރުން އެންސީސޯ ޖެހި ބޯޅަ އަމާޒުވީ ގޯލުގެ މަތީ ކަނަށެވެ. މިއީ މި ފަހަރު ލީގުގައި އެންސީސޯގެ 11 ވަނަ ގޯލެވެ.
މެޗުގެ 78 ވަނަ މިނިޓްގައި ސިޓީގެ ހާލަންޑް ވަނީ އެ ޓީމަށް ގޯލެއް ޖަހައިދީފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެ ގޯލު ބަލައިނުގަންނަން ނިންމި އެވެ. އެއީ، އެ އެޓޭކްގައި ފައުލެއް ކޮށްފައިވާތީ އެވެ.
ސިޓީގެ ގޯލުގައި ހުރި ކީޕަރު، ސްޓެފަން އޯޓޭގާ އަށް ގިނަ ހަމަލާތަކަކާ ކުރިމަތިލާން ޖެހުނު މި މެޗު އެއްވަރުވެގެން ނިމުނުއިރު، ސިޓީން ލީގުގައި ދަމަހައްޓަމުން އައި މޮޅުވުމުގެ ސިލްސިލާ އަށް 12 މެޗަށް ފަހު ވަނީ ނިމުން އަތުވެފަ އެވެ.
