އެމެރިކާގެ ޑިޕާޓްމަންޓް އޮފް ޑިފެންސްގެ ހެޑްކުއާޓާސް "ދަ ޕެންޓަގަން" ގޮއްވާލާފައިވާ ކަމަށް ފެންނަ ފޮޓޮއެއް އިންޓަނެޓުގައި އާންމުވެ، އެމެރިކާގެ ސްޓޮކް މާކެޓަށް ބޮޑު އަސަރެއްކޮށްފި އެވެ.
ވައިރަލްވެފައިވާ ފޮޓޯ އިން ފެންނަނީ ވޮޝިންޓަން ޑީސީގައި ހުންނަ ޕެންޓަގަން ހެޑްކުއާޓާޒް ކައިރިން، ބޮމެއް ގޮއްވާލުމުން އަރާފަދަ ކަޅު ބޯ ދުންގަނޑެއްވާ ތަނެވެ. މިއީ އޭއައި ބޭނުންކޮށްގެން ތައްޔާރުކޮށްފައިވާ ފޮޓޮއެއްކަމަށް ގިނަ ބަޔަކު ދެކޭއިރު ފޮޓޯގެ ސަބަބުން އެމެރިކާޣެ ސްޓޮކް މާކެޓަށް ކޮށްފައިވާ އަސަރު މީހުން ދަނީ ހިއްސާކުރަމުންނެވެ.
ފޮޓޯ ފުރަތަމަ ޓްވީޓްކޮށްފައިވާކަމަށް ބެލެވެނީ އެމެރިކާގެ އޮންލައިން ނޫސް އެޖެންސީއެއްކަމަށްވާ "ބްލޫމްބާގް" ގެ ނަމުގައި ހަދާފައިވާ ފޭކް އަދި ވެރިފައިޑް އެކައުންޓަކުންނެވެ. އެޔަށް ފަހު އެތައް ނޫސް އެޖެންސީއަކުން ވަނީ ހަބަރު ރިޕޯޓްކޮށްފަ އެވެ.
މި އެކައުންޓް މިހާރު ޓްވިޓާ އިން ވަނީ ބޭން ކޮށްލައިފަ އެވެ. ބްލޫމްބާގް އިން ބުނެފައި ވަނީ އެއީ އެ ކުންފުންޏާއި ގުޅުން އޮތް އެކައުންޓެއް ނޫން ކަމަށެވެ.
ފޮޓޯއާއި ގުޅޭ ހަބަރުތައް ފެތުރެން ފެށުމުން އެ ސަރައްހަދުގެ ފަޔާ ޑިޕާޓްމަންޓް ވެސް ވަނީ އެއީ ދޮގެއްކަމަށް ޓްވީޓްކޮށްފަ އެވެ. އެގޮތުން ދައުރުވަމުންދާ ފޮޓޯ އެ އިދާރާގެ ސަމާލުކަމަށް އައިސްފައިވާ ކަމަށާއި ޕެންޓަންގެން ސަރަހައްދުގައި ބޮމެއް ގޮއްވާލާފައިނުވާ ކަމަށާއި ރައްޔިޔުންނަށް ނުރައްކަލެއް ނެތް ކަމަށް ބުނެފައިވެ އެވެ.
ފޮޓޯ ވައިރަލްވެގެން ދިޔަ ވަގުތު އެމެރިކާގެ ސްޓޮކް މާކެޓަށް ވަނީ ވެއްޓުމެއް އައިއްސަ އެވެ. އެގޮތުން ކުންފުނިތަކުގެ މާކެޓް ވެލިއު ނުވަތަ މާކެޓް ކެޕިޓަލައިޒޭޝަން އަށް ވަނީ 500 ބިލިއަން ޑޮލަރުގެ ބަދަލު އައިއްސަ އެވެ. މިއީ އެސްއެންޕީ ފައިވްހަންޑްރެޑްގެ 0.29 އިންސައްތައިގެ ވެއްޓުމެކެވެ. ނަމަވެސް ފޮޓޯއަކީ ފޭކެއް ކަން ކަމާބެހޭ އިދާރާތަކުން ކަށަވަރުކޮށްދޭން ފެށި ހިސާބުން މާކެޓް ވަނީ ރިކަވާ ވެފަ އެވެ.
