ބްރަސެލްސް، ބެލްޖިއަމް (މޭ 23) - އެފް-16 ޖެޓުތައް ދުއްވަން ޔޫކްރެއިންގެ ޕައިލެޓުން ތަމްރީންކޮށްދޭން ތައްޔާރު ކަމަށް ޕޮލޭންޑުން ބުނެފި އެވެ.
"އަޅުގަނޑުމެން ތައްޔާރު. އެފް-16 އުޅަނދުގައި ޕައިލެޓުން ތަމްރީންކޮށްދޭން ޕޮލޭންޑުން ތައްޔާރު. އެކަހަލަ ތަމްރީނެއް އަދި ކުރެވިފައެއް ނެތް،" ޑިފެންސް މިނިސްޓަރު މާރިއަސްޒް ބްލާސްޒަކް ވިދާޅުވި އެވެ.
ބްލާސްޒަކް ވިދާޅުވީ އެ ތަމްރީނަކީ ޔޫރަޕިއަން ޔޫނިއަން (އީޔޫ) ގެ ފުޅާ ޕްރޮގްރާމެއްގެ ތެރޭގައި ހިމެނޭ ކަމެއްގެ ގޮތުގައި ހެދުން މުހިއްމު ކަމަށެވެ.
އީޔޫގެ ފޮރިން ޕޮލިސީ ޗީފް ޖޯސެޕް ބޮރެލް ދާދި ފަހުން ވިދާޅުވީ އެފް-16 ޖެޓުތަކަށް ޕައިލެޓުން ތަމްރީން ކުރަން ބައެއް ގައުމުތަކުން ފަށާފައިވާ އިރު އޭގެ ތެރޭގައި ޕޮލޭންޑު ހިމެނޭ ކަމަށެވެ.
އެމެރިކާގައި އުފައްދާ އެ އުޅަނދުތަކުގައި ޔޫކްރެއިންގެ ޕައިލެޓުން ތަމްރީން ކުރުމުގެ ވާހަކަ އީޔޫއިން ދައްކަން ފެށީ އެމެރިކާއިން އެކަމަށް ރުހުން ދިނުމުންނެވެ.
ރަޝިއާ ބަލިކޮށް، ހަނގުރާމައިން ކުރި ހޯދަން އެ ޖެޓުތައް ކޮންމެހެން ވެސް މުހިއްމު ކަމަށް ޔޫކްރެއިނުން ބުނެ އެވެ. ޕައިލެޓުން ތަމްރީންކޮށްދޭން ތައްޔާރު ކަމަށް މީގެ ކުރިން ވެސް ޕޮލޭންޑުން ބުނެފައިވެ އެވެ.
