ސަރުކާރު ޖަވާބުދާރީ ކުރުވަން ރައްޔިތުންގެ މަޖިލީހުގެ ތެރެއިން އެކުގައި މަސައްކަތް ކުރުމަށް އިދިކޮޅު ޕީޕީއެމުން އެހެން ޕާޓީތަކަށް އަދި ވަކިވަކި މެންބަރުންނަށް ދައުވަތު ދީފި އެވެ.
އެ ޕާޓީއިން މިއަދު ބުނީ އިދިކޮޅު ކޯލިޝަނުގައި ހިމެނޭ ޕީޕީއެމް އަދި ޕީއެންސީގެ ޕީޖީ ގްރޫޕާއެކު ސަރުކާރު ޖަވާބުދާރީ ކުރުވުމުގައި އެކުގައި މަސައްކަތް ކުރަން ބޭނުންވާ ހުރިހާ މެންބަރުންނަށް އަދި ޕާޓީތަކަށް ދައުވަތު އަރުވާ ކަމަށެވެ.
އިދިކޮޅުން މިފަދަ ދައުވަތެއް ދީފައި މިވަނީ ވެރިކަންކުރާ މައި ޕާޓީ އެމްޑީޕީއަށް މަޖިލީހުގައި އޮތް ސުޕާ މެޖޯރިޓީ ގެއްލިފައިވާ ވަގުތެއްގަ އެވެ. އެމްޑީޕީއަށް ސުޕާ މެޖޯރިޓީ ގެއްލުނީ އެ ޕާޓީގެ ތެރޭގައި އޮތް މައްސަލަތައް ބޮޑުވެ އެ ޕާޓީގެ ރައީސް މުހައްމަދު ނަޝީދު ޕާޓީގެ ތެރޭގައި އުފެއްދެވި "ފިކުރެއްގެ ދިރުން' ފެކްޝަނުގައި ހިމެނުނު 12 މަޖިލިސް މެންބަރަކު އެމްޑީޕީއިން ވަކިވުމުންނެވެ. އޭގެ އިތުރުން އެމްޑީޕީއިން ވަނީ އެ ފެކްޝަނަށް ނިސްބަތްވި މެދު ހެންވޭރު ދާއިރާގެ މެންބަރު އަލީ އާޒިމްވެސް ޕާޓީން ވަކިކުރި އެވެ.
އެ މެންބަރުންނާއި އެމްޑީޕީން ވަކިވި އިސް ބޭފުޅުން އެއްވެ 'ދަ ޑިމޮކްރެޓްސް' ގެ ނަމުގައި އާ ޕާޓީއެއް އުފެއްދުމުގެ މަސައްކަތް ފައްޓާފައިވާއިރު، މަޖިލީހުގައި މިވަގުތު ތިބި އެމްޑީޕީގެ މެންބަރުންގެ އަދަދަކީ 55 އެވެ. އޭގެ ތެރޭގައި އެމްޑީޕީ ދޫކުރައްވަން އަދި ނުނިންމަވާ މަޖިލީހުގެ ރައީސް ނަޝީދުވެސް ހިމެނެ އެވެ. ނަޝީދުގެ ޑިމޮކްރެޓްސް ޕާޓީން ވަނީ އަދިވެސް އިތުރު މަޖިލިސް މެންބަރުން އެ ޕާޓީއާ ގުޅޭނެ ކަމަށް ބުނެފަ އެވެ.
މި ފަހުން ދިމާވި އެކި މައްސަލަތަކުގައި އޭރު އެމްޑީޕީގެ ތެރޭގައި އޮތް "ފިކުރެއްގެ ދިރުން" ފެކްޝަން އަދި މިހާރު ޑިމޮކްރެޓްސް އިން ވަނީ އިދިކޮޅު ކޯލިޝަނާއެކު މަސައްކަތް ކޮށްފަ އެވެ. އޭގެއިތުރުން ސަރުކާރު ކޯލިޝަނުގައި ހިމެނުނަސް ވަކިން އިންތިހާބުގައި ވާދަކުރާނެކަން އިއުލާންކޮށްފައިވާ ޖޭޕީއިންވެސް ވަނީ އިދިކޮޅާއެކު މަސައްކަތް ކޮށްފަ އެވެ. މި މަސައްކަތްތަކުގައި އެމްއެންޕީއިންވެސް ބައިވެރިވެފައިވެ އެވެ.
މި ހުރިހާ ޕާޓީތަކެއްގެ މެންބަރުން އެއްކޮށްލުމުން އަންނަ އަދަދަކީ 26 އެވެ. މަޖިލީހުގައި މިހާރު ތިބި މިނިވަން ހަތަރު މެންބަރުންގެ ތާއީދު ލިބިއްޖެ ނަމަ އެ އަދަދު 30 އަށް އަރާނެ އެވެ.
އެމްޑީޕީން ގިނަ މެންބަރުންތަކެއް ވަކިވެފައިވާ މި ދަނޑިވަޅުގައި އެ ޕާޓީއިން ވަނީ ވަކިވެ އާ ޕާޓީ އުފައްދަން އުޅޭ މެންބަރުންނާ ދެކޮޅަށް މަސައްކަތް ފަށާފަ އެވެ. އެގޮތުން 50 މެންބަރުންގެ ސޮޔާއެކުގަ އެމްޑީޕީން މިއަދު ވަނީ އެ ޕާޓީން ވަކިވެވަޑައިގެންނެވި މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލަ މިއަދު މަޖިލީހަށް ހުށަހަޅާފަ އެވެ.
