ކޮލޮމްބޯ، ސްރީލަންކާ (މޭ 22) - ލަންކާގެ ތެލުގެ ވިޔަފާރީގެ ތެރެއަށް ވަނުމަށް ޗައިނާގެ ކުންފުންޏަކަށް ހުއްދަ ދީފި އެވެ.
ހޯމަ ދުވަހު އެއްބަސްވުމުގައި ސޮއިކުރުމުން ސިނޯޕެކް ވެފައި ވަނީ 20 އަހަރުގެ ތެރޭގައި ލަންކާ ތެލުގެ ވިޔަފާރީގެ ތެރެއަށް ވަންނަން ފުރުސަތު ލިބުނު ފުރަތަމަ ކުންފުންޏަށެވެ.
ރައީށް ރަނިލް ވިކްރަމަސިންހަ ވިދާޅުވީ ހުރަހެއް ނެތި ގަވާއިދުން ތެޔޮ ލިބޭނެކަން ކަށަވަރު ކުރަން މާކެޓުގައި ވާދަވެރިކަން މުހިއްމު ކަމަށެވެ.
މިދިޔަ އަހަރު ތެލުގެ ދަތިކަން ދިމާވެ، ރައީސް ގޮތަބަޔާ ރާޖަޕަކްސަ އިސްތިއުފާ ދެއްވަން މަޖުބޫރުވި އެވެ. އެއީ ޑޮލަރު ހުސްވެ، ތެޔޮ އިމްޕޯޓް ކުރެވޭނެ ގޮތެއް ނެތުމުންނެވެ.
ކާރިސާ އެންމެ ގޯސްވި އިރު، އެތައް ދުވަހެއް ވަންދެން ޕެޓްރޯލާއި ޑީސެލް ހޯދަން ކިޔުގައި މަޑުކުރަން ޖެހުނެވެ.
އެނާޖީ މިނިސްޓަރު ކަންޗަނާ ވިޖެސޭކަރަ ވިދާޅުވީ މިހާރު ދައުލަތުގެ ސިލޯން ޕެޓްރޯލިއަމް ކޯޕޮރޭޝަންގެ ދަށުން ހިންގާ 150 ސްޓޭޝަނެއް ހަވާލުކުރާނީ ސިނޯޕެކްއާ ކަމަށެވެ.
އެއްބަސްވުމުގެ ދަށުން 20 އަހަރު ވަންދެން ސިނޮޕެކްއަށް ލަންކާގައި ވިޔަފާރި ކުރެވޭނެ އެވެ. އަދި އިތުރު ޕެޓްރޯލް ސްޓޭޝަންތައް ހުޅުވަން އިންވެސްޓް ކުރުމުގެ ފުރުސަތު ލިބޭނެ އެވެ.
ޗައިނާ އާއި އޮސްޓްރޭލިއާ އަދި އެމެރިކާގެ ކުންފުނިތަކުން ލަންކާގެ ތެލުގެ ވިޔަފާރީގެ ތެރެއަށް ވަނުމަށް ހުއްދަ ދިނީ މިދިޔަ މާޗް މަހު އެވެ.
އޭގެ ތެރެއިން އެންމެ ފުރަތަމަ އެއްބަސްވުމުގައި ސޮއިކުރީ ޗައިނާ ކުންފުންޏަކާ އެކު އެވެ. މީގެ ކުރިން ލަންކާގައި ހަރަކާތްތެރިވީ ދައުލަތުގެ ކުންފުނި އަދި އިންޑިއަން އޮއިލް ކޯޕޮރޭޝަނުންނެވެ.
